ដោយៈ​ សុផល​/​ភ្នំពេញ​: ស្ថានភាព​ភ្ញៀវទេសចរ​អន្តរជាតិ កំពុងមាន​កំណើន​ត្រលប់​មកវិញ​ជា​បណ្តើរៗ ដោយ​ក្នុងនោះ​គិត​ត្រឹម​ប្រាំ​មួយខែ​ឆ្នាំ​២០២២​នេះ​ស្ថានភាព​ទេសចរ​ក្នុង​តំបន់​អ៊ឺរ៉ុប​និង​អាម៉េរិក​មានការ​កើនឡើង​ពី ២០​ភាគរយ​-២៥​ភាគរយ និង​សម្រាប់​តំបន់​អាស៊ី​ប៉ាស៊ីហ្វិក បាន​កើនឡើង​១​ភាគរយ​ដោយសារ​មិនទាន់ មានដំណើរ​ការ​ទេសច​រ​ជន​ជាតិចិន​។​

​នេះ​បើតាម​ប្រសាសន៍​របស់លោក​ថោង រដ្ឋ​សក្ដិ អគ្គនាយក​អភិវឌ្ឍន៍​ទេសចរណ៍ និង​សហ​ប្រតិ​ប​ត្ដិ​ការ​អន្តរជាតិ និង​ជា​ប្រធាន​លេខាធិការដ្ឋាន​ស្ដីទី​នៃ​ក្រុមការងារ​រាជរដ្ឋាភិបាល និង​ឯកជន ដើម្បី​ស្ដារ និង​លើកស្ទួយ វិស័យ​ទេសចរណ៍​ក្នុង​និង​ក្រោយ​វិបត្តិ​ជំ​ងឹ​កូ​វីដ​១៩​នៅក្នុង​កិច្ចប្រជុំ​“​បូកសរុប​លទ្ធផល​ការងារ​ស្របតាម​ផែនទី​ចង្អុល​ផ្លូវ​គិត​ត្រឹម​ឆមាស​ទី​១ ឆ្នាំ​២០២២”​នា​ព្រឹក​ថ្ងៃទី​០៨ ខែកក្កដា ឆ្នាំ​២០២២ នៅ​ទីស្តីការ​ក្រសួងទេសចរណ៍​។​

​លោក​ថោង រដ្ឋ​សក្ដិ បានឱ្យដឹង​ទៀតថា​៖​នៅ​ខែកក្កដា ឆ្នាំ​២០២២ នេះ​កម្ពុជា​ទទួលបាន​ការហោះ​ហើរ​ចូលមក​បន្ថែម​គួរឱ្យកត់សម្គាល់​។ បច្ចុប្បន្ននេះ កម្ពុជា​បានទទួល​ទេសចរ​អន្តរជាតិ​ជារួម​កើនឡើង​ជិត ១៥០ បើ​ធៀប​នឹង​រយៈពេល​ដូចគ្នា​ក្នុង​ឆ្នាំ​២០២១​។​

​លោក​បាន​បន្ថែមថា​៖​បច្ចុប្បន្ននេះ​ប្រទេស​ជា​សមាជិក​អាស៊ាន​ទាំងអស់​កំពុង​ដាក់​អទិភាព​អនុវត្ត​ផែនការ​សកម្មភាព​ឆ្នាំ​២០២២-២០២៣ លើ​ស្ថានភាព​ទេសចរណ៍ ដោយ​ផ្តោត​សំខាន់​ចំនួន ០៣​ចំនុច​គឺ​៖

១. ជំរុញ​ញ​បន្ថែម​នូវ​ការស្តារ​សេដ្ឋកិច្ច​ឡើងវិញ រួម​ជាមួយនឹង​ការគិតគូរ​ពី​បរិស្ថាន និង​ការប្រែប្រួល​អាកាសធាតុ​
២. ការធ្វើ​ឌី​ជី​ថ​លូ​ប​ណី​យក​ម្ម និង​
៣. ការគិតគូរ​ពី​ការរៀបចំ​សហគមន៍​ទេសចរណ៍ អេកូ​ទេសចរណ៍​ជា​ផលិតផល​ទាក់ទាញ​ទេសចរណ៍​

​បន្ថែម​ពីនេះ​ទៀត លោក​ថោង រដ្ឋ​សក្ដិ បាន​ពិនិត្យ​លើ​លទ្ធផល​ការងារ​ដែល​សម្រេចបាន​ជារួម​កន្លងមក និង​បាន​វាយតម្លៃថា អង្គភាព​ពាក់ព័ន្ធ​ទាំងអស់ បាន​បំពេញការងារ​ស្របតាម​ផែនទី​ចង្អូ​ល​ផ្លូវ​ដោយ​សម្រេចបាន ៨០% បើ​គិត​ត្រឹម​ឆមាស​ទី​១ ឆ្នាំ​២០២២​នេះ​។ យ៉ាងណាមិញ​លេខាធិការដ្ឋាន​រង់ចាំ​របា​យ​ការណ៍​បន្ថែម​ពី​ផ្នែក​ឯកជន​ក្នុង​វិស័យ​ទេសចរណ៍​ដើម្បី​ដាក់បញ្ចូល​និង​បំពេញបន្ថែម​ក្នុង​របាយការណ៍​សមិទ្ធ​ផល​របស់​ក្រុមការងារ​៕​សរន​