​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប៉ូលិស​បាន​និយាយថា យ៉ាងហោច​ណាស់​មនុស្ស ១៣​នាក់​បាន​ស្លាប់​នៅ​ពេល​ភ្លៀង​ធ្លាក់​ភ្លាមៗ​បាន​បង្ក​ជា​ទឹកជំនន់​ភ្លាមៗ​ក្នុងអំឡុងពេល​ធម្មយា​​ត្រា​សាសនា​ហិណ្ឌូ​ប្រចាំ​ឆ្នាំ​ទៅ​កាន់​រូងភ្នំ​ទឹកកក​ហេមពាន្ត​នៅ​តំបន់​កា​ស្មៀរ​ដែល​គ្រប់គ្រង​ដោយ​ឥណ្ឌា​កាលពី​ថ្ងៃ​សុក្រ​ទី​៨​កក្កដា​។​

​ក្រុមមន្ត្រី​បាន​និយាយថា ក្រៅពី​អ្នកស្លាប់​ទាំងនេះ មនុស្ស​យ៉ាង​តិច​ជាង​៣០​នាក់​បាន​បាត់​ខ្លួន​ខណៈ​អ្នក​ប្រណិបតន៍​សាសនាមួយ​ចំនួន​ដែល​រងរបួស​ត្រូវបាន​ដឹក​តាម​ឧទ្ធម្ភាគចក្រ​ទៅកាន់​មន្ទីរពេទ្យ​​ដើម្បី​ព្យាបាល​។ អាជ្ញាធរ​បាន​ប្រញាប់ប្រញាល់​បញ្ជូន​ក្រុមគ្រូពេទ្យ​និង​បុគ្គលិក​ពេទ្យ​ជាច្រើន​នាក់​ទៅកាន់​តំបន់​រដិបរដុប​នេះ និង​កំពុង​ចាត់ចែង​សង្គ្រោះ​បឋម​ដល់​អ្នក​របួស​។​

​ក្រុមមន្ត្រី​បាន​និយាយថា ភ្លៀង​ធ្លាក់​ខ្លាំង​កាលពី​ល្ងាច​ថ្ងៃ​សុក្រ​នៅ​ជិត​រូងភ្នំ​ដែល​គោរព​បូជា​ដោយ​អ្នក​កាន់​សាសនា​ហិណ្ឌូ បាន​ធ្វើឱ្យ​ទឹក​មួយ​ផ្ទាំង​ធំ​ធ្លាក់ចុះ​មក ហើយ​បាន​អូស​យក​ជំរំ​តង់​ប្រហែល​២០ និង​ផ្ទះបាយ​បណ្តោះអាសន្ន​ចំនួន​ពីរ​។ មនុស្ស​ប្រហែល ១០.០០០ នាក់​បាន​ស្ថិតនៅលើ​ភ្នំ​នៅ​ពេល​ភ្លៀង​បង្អុរ​ចុះមក​។​

​នាយកដ្ឋាន​គ្រប់គ្រង​គ្រោះមហន្តរាយ​ក្នុង​តំបន់​បាន​និយាយថា បុគ្គលិក​សង្គ្រោះបន្ទាន់​កំពុង​ស្វែងរក​អ្នក​បាត់​ខ្លួន ទោះបីជា​អាកាសធាតុ​មិន​ល្អ​ក៏​ដោយ​៕

​បុគ្គលិក​សង្គ្រោះបន្ទាន់​កំពុង​ស្វែងរក​អ្នក​បាត់​ខ្លួន​បន្ទាប់ពី​មនុស្ស​១៣​នាក់​ស្លាប់​ក្នុង​ជំនន់​ភ្លាមៗ​ក្នុងអំឡុងពេល​ធម្ម​យាត្រា​សាសនា​ហិណ្ឌូ​ប្រចាំ​ឆ្នាំ​ទៅ​កាន់​រូងភ្នំ​ទឹកកក​ហេមពាន្ត​នៅ​តំបន់​កា​ស្មៀរ​ដែល​​គ្រប់គ្រង​ដោយ​ឥណ្ឌា​កាលពី​ថ្ងៃ​សុក្រ​ទី​៨​កក្កដា