ដោយៈ មុនី​រ័ត្ន / ភ្នំពេញៈ សម្តេច​អគ្គមហាសេនាបតី​តេ​ជោ ហ៊ុន សែន ជា​ប្រធាន​គណបក្ស ប្រជាជន​កម្ពុជា និង​ជា​នាយករដ្ឋមន្ត្រី គឺជា​មេដឹកនាំ ប្រកបដោយ​ទសពិធរាជធម៌ និង​សច្ចធម៌ ដោយ​មិនដែល​សន្យា​ភូតភរ ឬ​ធ្វើ​ប្រជាភិថុតិ ជាមួយ​ប្រជាជន​ឡើយ ហើយ​សម្តេច​តេ​ជោ ក៏​តែង​នៅជាប់​ក្បែរ​ប្រជាជន ក្នុង​គ្រប់​កាលៈទេសៈ ដោយ​មិន​បោះបង់ ទោះបី​មាន​វិបត្តិ គ្រោះភ័យ​ធំ យ៉ាងណាក៏ដោយ​។ ដូច្នេះ ដរាបណា ប្រជាជន​កម្ពុជា នៅតែ​គោរព​ស្រឡាញ់ និង​ផ្តល់​ការទុកចិត្ត​មកលើ គណបក្ស​ប្រជាជន​កម្ពុជា នោះ​សម្តេច​តេ​ជោ និង​មន្ត្រី​គណបក្ស គ្រប់​ជាន់ថ្នាក់ នឹង​នៅតែ​ស្មោះត្រង់​បម្រើ និង​ការពារ​ប្រជាពលរដ្ឋ និង​ប្រទេសជាតិ ឱ្យបាន​សុខសាន្ត និង​មានការ​អភិវឌ្ឍ រីកចម្រើន​លូតលាស់ ជឿនលឿន​បន្ថែមទៀត​។

​នេះ​ជាការ​បញ្ជាក់​របស់លោក ហ៊ុន ម៉ា​ណែ​ត ក្នុង​ពិធី​សម្ពោធ​ឆ្លង​មហា​កុដិ និង​សមិទ្ធផល​នានា ក្នុង​វត្ត​ឥន្ទ​រិទ្ធី ហៅ​វត្ត​បារាយណ៍ ស្ថិត​ក្នុងភូមិ​បារាយណ៍ ឃុំ​ឈូក ស្រុក​ក្រូចឆ្មារ ខេត្ត​ត្បូងឃ្មុំ កាលពី​ថ្ងៃទី​៨ ខែកក្កដា ឆ្នាំ​២០២២​។​

​លោក ហ៊ុន ម៉ា​ណែ​ត បាន​បន្តថាៈ អំណោយផល នៃ​សុខសន្តិភាព និង​លំនឹង​ស្ថិរភាព ផ្នែក​សង្គម​-​សេដ្ឋកិច្ច តាមរយៈ​ជ័យជម្នះ​លើ​សមរភូមិ ក្នុង​វិបត្តិ​ជំងឺ​កូ​វីដ​-១៩ កន្លងមកនេះ បានផ្តល់​ឱកាស​ដល់ ប្រជាពលរដ្ឋ​ទាំងអស់គ្នា អាច​រស់នៅក្នុង​ជីវភាព ប្រក្រតី​ឡើងវិញ លើ​គ្រប់ផ្នែក​គ្រប់​វិស័យ និង​គ្រប់​ទីកន្លែង ដែល​ជាក់ស្តែង​នោះ គឺ​ការជួបជុំ​ចូលរួម​សម្ពោធ សមិទ្ធផល​នានា​ជាច្រើន ប្រកបដោយ​ក្តី​រីករាយ ជុំ​ញាតិ​ជុំ​មិត្ត និង​សទ្ធា​ជ្រះថ្លា ក្នុងការ​បំពេញ បុណ្យ​កុសល ដូច​ក្នុងថ្ងៃនេះ​ផ្ទាល់​។ វិបត្តិ​កូ​វីដ​-១៩ ដែល​បានអូសបន្លាយ រយៈពេល​ជាង ២​ឆ្នាំ បាន​ជះឥទ្ធិពល​អវិជ្ជមាន ដល់​ស្ថានភាព​សុខភាព​សាធារណៈ និង​ដំណើរការ​អភិវឌ្ឍ​ជាតិ ព្រមទាំង​ជីវភាព​រស់នៅ​របស់ ប្រជាពលរដ្ឋ នៅ​ទូទាំងប្រទេស ប៉ុន្តែ​ក្រោម​ការដឹកនាំ ដ៏​ឈ្លាសវៃ និង​ត្រឹមត្រូវ​របស់ សម្តេច​តេ​ជោ នាយករដ្ឋមន្ត្រី យុទ្ធសាស្ត្រ និង​វិធានការ​ម៉ឺងម៉ាត់ ជាច្រើន ត្រូវបាន​ដាក់ចេញ​យ៉ាង​លឿន​រហ័ស ប្រកបដោយ​ការទទួលខុសត្រូវ​ច្បាស់លាស់ ប្រាកដប្រជា និង​ចំ​គោលដៅ រហូត​បានធ្វើឱ្យ​សភាពការណ៍ មាន​ភាព​ធូរស្រាល​ស្ងប់ស្ងាត់ និង​អាច​គ្រប់គ្រង​បាន ដោយបាន​ធ្វើឱ្យ​អត្រា​ឆ្លង​ប្រចាំថ្ងៃ មានការ​ធ្លាក់ចុះ​យ៉ាងគំហុក ហើយ​អត្រា​ស្លាប់ ក៏បាន​ធ្លាក់​មកដល់​ចំនួន​សូន្យ ដែលជា​ស្ថានការណ៍​មួយ មាន​លក្ខណៈ​ល្អ ប្រសើរ​បំផុត បើ​ធៀប​ទៅនឹង​ចំនួន​ប្រជាជន សរុប​របស់​ប្រទេស​កម្ពុជា ហើយ​ទន្ទឹមនឹងនេះ យើង​ក៏បាន​ឈានដល់ ការបើក​ដំណើរការ ប្រទេស​ឡើងវិញ លើ​គ្រប់​វិស័យ ដែលជា​កត្តា​កំណត់​មួយ ដើម្បី​ស្តារ និង​រក្សា​ស្ថិរភាព លំនឹង​ផ្នែក​សង្គម​-​សេដ្ឋកិច្ច ក្រោយ​ទទួលរង​ផលប៉ះពាល់ នៅក្នុង​វិបត្តិ​សាកល ដ៏​ធ្ងន់ធ្ងរ​មួយ​នេះ​។

​លោក ហ៊ុន ម៉ា​ណែ​ត បានបញ្ជាក់​ថាៈ ដោយ​បញ្ហា​កូ​វីដ​-១៩ នៅតែ​ជា​បញ្ហា​ប្រឈម​ធំ សម្រាប់​ជាតិ ក៏ដូចជា​ពិភពលោក​ទាំងមូល សម្តេច​តេ​ជោ ប្រមុខ​រាជរដ្ឋាភិបាល បាន​ត្រៀម រួចរាល់​ជាស្រេច ក្នុង​ការបន្ត​ផ្តល់​វ៉ាក់សាំង ការពារ​ជំងឺ​កូ​វីដ​-១៩​បន្ថែមទៀត ជាពិសេស វ៉ាក់សាំង​ដែល​ផលិត នៅក្នុង​ស្រុក​តែម្តង សម្រាប់​ចាក់ ជូន​ប្រជាពលរដ្ឋ​យើង ដើម្បី​បន្ត​បង្កើន​ភាពស៊ាំ ក្នុង​សហគមន៍ នៅ​ទូទាំងប្រទេស ដែល​គាំទ្រ​ដល់​និរន្តរភាព នៃ​ការការពារ​សុខភាព របស់​ប្រជាពលរដ្ឋ និង​ដំណើរ​ការបើក​ប្រទេស លើ​គ្រប់​វិស័យ ដែល​បាន​ដំណើរការ យ៉ាង​មាន​ប្រសិទ្ធភាព និង​ប្រសិទ្ធ​ផល មកដល់ពេលនេះ​។ សូម​អរគុណ​ចំពោះ​ប្រជាពលរដ្ឋ​ទាំងអស់ ដែលមាន​ជំនឿ​ទុកចិត្ត មកលើ​រាជរដ្ឋាភិបាល និង​បាន​ចូលរួម​គាំទ្រ អនុវត្ត​គ្រប់​វិធានការ ដែល​រាជរដ្ឋាភិបាល បានដាក់​ចេញ ហើយក៏​សូម យក​ឱកាស​នេះ អំពាវនាវ​ដល់​បងប្អូន​ប្រជាពលរដ្ឋ ឱ្យ​បន្ត​ទទួលយក​ការចាក់​វ៉ាក់សាំង បង្ការ​ជំងឺ​កូ​វីដ​-១៩ ដូ​ស​ជំរុញ​ទី​៣ ទី​៤ និង​ទី​៥ ដើម្បី​ថែរក្សា​សុខភាព​ឱ្យ​រឹងមាំ ពីព្រោះ​ពុំមាន​អ្វី​សំខាន់ និង​មានតម្លៃ​ជាង​សុខភាព​នោះទេ​។

​លោក​បាន​លើកឡើងថាៈ យុវជន​ជំនាន់​ក្រោយ មានភ័ព្វ​សំណាង​ណាស់ ដែល​បានរស់នៅ ក្នុងសង្គម​មួយ ដែល​ប្រកបដោយ​សុខសន្តិភាព ស្ថិរភាព និង​ការអភិវឌ្ឍ រីកចម្រើន ដូច្នេះ​សូម​ខិតខំ​ប្រឹងប្រែង និង​យកចិត្តទុកដាក់ សិក្សា​រៀនសូត្រ កសាង​លត់​ដំ​ខ្លួន ឱ្យ​ក្លាយជា​ធនធាន មានតម្លៃ​សម្រាប់​គ្រួសារ និង​សង្គមជាតិ ដើម្បី ឆ្លើយតប​នឹង​ការខិតខំ ប្រឹងប្រែង​របស់​ឪពុកម្តាយ​-​អាណាព្យាបាល ក៏ដូចជា​ការខិតខំ​ប្រឹង​ប្រែង របស់​សម្តេច​តេ​ជោ និង​ឥស្សរជន ថ្នាក់ដឹកនាំ​ជាតិ​ជាច្រើន ដែល​បាន​តស៊ូ​លះបង់ ប្រកបដោយ​ពលិកម្ម គ្រប់បែបយ៉ាង ក្នុង​បុព្វហេតុ​ស្វែងរក​សុខសន្តិភាព និង​សេចក្តីសុខសាន្ត​ជូន​ជាតិ និង​ប្រជាជន​៕/V​