ប្រែ​សម្រួលៈ​បំណង​(​ដេល្លី​ម៉េល​)៖ អ្នកការទូត​កំពូល​ចិន​និង​អាម៉េរិក​កាលពី​ថ្ងៃ​សៅរ៍​ទី​៩​កក្កដា​បាន​សម្តែង​ក្តីសង្ឃឹម​បែប​ប្រយ័ត្នប្រយែង ក្នុង​ការរារាំង​ភាព​តានតឹង​កុំអោយ​រាលដាល​ឡើង​ហួស​ពី​ភាព​​អាច​គ្រប់គ្រង​បាន នៅ​ពេល​ពួក​លោក​ជួប​ពិភាក្សា​គ្នា​ដ៏​កម្រ​នៅ​កោះ​រមណីយដ្ឋានបាលី ក្នុងប្រទេស​ឥណ្ឌូនេស៊ី​។​

​គ្មាន​ភាគី​ណាមួយ​រំពឹងថា​នឹង​ទម្លុះទម្លាយ​ភាពទាល់ច្រក​ធំដុំទេ​ក្នុងជំនួប​រវាង​រដ្ឋមន្ត្រី​ការបរទេស​អាម៉េរិក អ៊ែន​ថូ​នី ប្លីង​កិន និង​សម​ភាគី​ចិន វ៉ាង យី តែ​មហាអំណាច​ទាំងពីរ​បាន​សម្រួល​សម្លេង​របស់​​គេ​និង​បង្កើន​ការទាក់ទង​ចំ​ពេល​ដែល​លោក​ខាងលិច​ជាប់ដៃ​ផ្តោត​លើ​សង្គ្រាម​របស់​រុស្ស៊ី​នៅ​អ៊ុ​យក្រែន​។​

​លោក​ប្លីង​កិន បាន​និយាយថា «​ក្នុង​ទំនាក់ទំនង​ស្មុគស្មាញ​ធំ​មួយ ដូចជារវាង​អាម៉េរិក​និង​ចិន វា​ត្រូវ​មាន​ការពិភាក្សា​គ្នា​ច្រើន​។​យើង​ទន្ទឹង​រង់ចាំ​ការសន្ទនា​បែប​ស្ថាបនា​និង​ផ្តល់​ផល​ល្អ​»​។​

​ចំណែក​លោក​វ៉ាង​បាន​និយាយថា ប្រធានាធិបតី​ស៊ី ជីន​ភីង ជឿ​លើ​កិច្ចសហប្រតិបត្តិការ ព្រមទាំង​«​ការគោរព​គ្នា​ទៅវិញទៅមក​»​រវាង​មហាអំណាច​សេដ្ឋកិច្ច​ផុត​លេខ​ទាំងពីរ និង​ថា​ចាំបាច់​ត្រូវមាន​«​ការផ្លាស់ប្តូរ​ទស្សនៈធម្មតា​»​រវាង​គ្នា​។​

​លោក​បាន​បន្តថា «​យើង​ត្រូវ​ធ្វើការ​ជាមួយគ្នាដើម្បី​ធានា​ថា ទំនាក់ទំនង​នេះ​នឹង​បន្ត​ទៅមុខ​តាមផ្លូវ​ត្រឹមត្រូវ​»​។​

​ដា​ញែល គ្រី​ថិ​ន​ប្រ៊ី​ង​(Daniel Kritenbrink)​មន្ត្រីការទូត​ជាន់ខ្ពស់​អាម៉េរិក​ប្រចាំ​អាស៊ី​ខាងកើត មុននេះ​បាន​និយាយថា លោក​ប្លីង​កិន នឹង​ស្វះស្វែង​រក​«​ភាព​ជា​អ្នកត្រួតត្រា​មើល​»​ក្នុង​ការប្រ​​កួត​ប្រជែង​របស់​អាម៉េរិក​ជាមួយ​ចិន និង​«​ធ្វើ​អ្វី​គ្រប់យ៉ាង​ដែល​អាច​ដើម្បី​ធានា​ថា យើង​រា​រាំ​ងការគិតគូរ​ខុស​ណាមួយ​ដែល​នឹង​នាំ​ដល់​ជម្លោះ​ដែល​អាច​បញ្ចៀស​បាន​»​។​

​រដ្ឋមន្ត្រីការបរទេស​អាម៉េរិក អ៊ែន​ថូ​នី ប្លីង​កិន និង​សម​ភាគី​ចិន វ៉ាង យី ជួប​គ្នា​នៅ​កោះ​បាលី ប្រទេស​ឥណ្ឌូនេស៊ី​នៅ​ថ្ងៃ​សោរ៍​។​វា​ជា​ជំ​នួន​ទល់មុខ​ផ្ទាល់​លើកដំបូង រវាង​ប្រមុខការទូតមហាអំណាចទាំងពីរ ចាប់តាំងពី​ខែ​តុលា​ឆ្នាំមុន​

​វា​ជា​ជំ​នួន​ទល់មុខ​ផ្ទាល់​លើកដំបូង រវាង​ប្លីង​កិន​និង​លោកវ៉ាង យី ចាប់តាំងពី​ខែ​តុលា​ឆ្នាំមុន​។​ពួក​លោក​ត្រូវ​គេ​រំពឹងថា​នឹង​ត្រៀម​ការងារសំរាប់​កិច្ចពិភាក្សា​ផ្ទាល់​នៅ​ប៉ុន្មាន​សប្តាហ៍​ខាង​មុខ​រវាង លោក​ប្រធានា​​ធិបតី ស៊ី ជីន​ភីង និង​លោក ចូ បៃ​ដិន​៕