​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ អ្នកការទូត​កំពូល​របស់​រុស្ស៊ី​បាន​ដើរចេញ​ពី​កិច្ចប្រជុំ​ជាមួយ​ក្រុម​រដ្ឋមន្ត្រីការបរទេស G20 នៅ​ប្រទេស​ឥណ្ឌូនេស៊ី​កាលពី​ថ្ងៃ​សុក្រ​ទី​៨​កក្កដា​ខណៈ​មហាអំណាច​​លោក​ខាងលិច​បាន​នាំគ្នា​រិះគន់​ចាស់ដៃ​លើ​ទីក្រុង​មូ​ស្គូ​ជុំវិញ​ការ​លុកលុយ​អ៊ុ​យក្រែន​។​

​ទីក្រុង​វ៉ាស៊ីនតោន​និង​សម្ពន្ធមិត្ត​បាន​ថ្កោលទោស​ការវាយលុក​របស់​រុស្ស៊ី​នៅ​មុន​កិច្ចប្រជុំ មុន​ពេល​រដ្ឋមន្ត្រី​ការបរទេស​រុស្ស៊ី​លោក សឺ​ហ្គេ ឡាវ​រ៉ូវ ប្រឈម​មុខ​នឹង​អ្វី​ដែល​រដ្ឋមន្ត្រីការបរទេស​អាម៉េរិក​លោក អ៊ែន​ថូ​នី ប្លីង​កិន ហៅ​ថា​ជំនន់​នៃ​ការរិះគន់​របស់​លោក​ខាងលិច​នៅឯ​កិច្ចពិភាក្សា​បិទទ្វារ​។​

​លោក​ប្លីង​កិន​បាន​និយាយ​ពី​កិច្ចប្រជុំ​នៅ​កោះ​បាលី​ថា “​អ្វី​ដែល​យើង​បានឮ​នៅថ្ងៃនេះ​គឺជា​ការ​បន្ទរ​ដ៏​ខ្លាំង​ពី​ជុំវិញ​ពិភពលោក​…​អំពី​តម្រូវការ​ឱ្យ​បញ្ឈប់​ការឈ្លានពាន​នេះ​”​។​

​លោក​ប្លីង​កិន​និង​លោក​ឡាវ​រ៉ូវ​បាន​ចូលរួម​ជាមួយស​ហ​សេវិក​ដទៃ​សម្រាប់​កិច្ច​ពិភាក្សា​រយៈពេល​មួយ​ថ្ងៃ​នៅក្នុង​កិច្ចប្រជុំ​លើកដំបូង​របស់​ពួកគេ​ចាប់តាំងពី​ការផ្ទុះ​សង្គ្រាម​ដោយ​ម្ចាស់ផ្ទះ​ឥណ្ឌូនេស៊ី​បាន​​ប្រាប់​ពួកគេ​ភ្លាមៗ​ថា​ជម្លោះ​នេះ​ត្រូវតែ​បញ្ចប់​ដោយ​ការចរចា​។​

​ប៉ុន្តែ​ក្រុម​អ្នកការទូត​បាន​និយាយថា លោក​ឡាវ​រ៉ូវ​បាន​ដើរចេញ​ពី​វគ្គ​ប្រជុំ​ទីមួយ​នៅ​ពេល​ព្រឹក ខណៈ​សម​ភាគី​អាល្លឺម៉ង់​លោកស្រី អាន​ណា​ឡេ​ណា ប៊ែរ​បុក (Annalena Baerbock)​បាន​រិះគន់​ទីក្រុង​​មូ​ស្គូ​ជុំវិញ​ការឈ្លានពាន​របស់ខ្លួន​។​

​លោកស្រី​ប៊ែរ​បុក​បាន​រិះគន់​ទីក្រុង​មូ​ស្គូ​ចំពោះ​ការរារាំង​ការសន្ទនា​ជា​មួយ​ដៃគូ​អន្តរជាតិ បន្ទាប់ពី​លោក​ឡាវ​រ៉ូវ​ដើរចេញ​ពី​សុន្ទរកថា​របស់​លោកស្រី​។​

​ថ្លែង​ទៅ​កាន់​ទូរទស្សន៍​អាល្លឺម៉ង់​ពី​កិច្ចប្រជុំ G20 នៅ​កោះ​បាលី លោកស្រី​ប៊ែរ​បុក​បាន​និយាយថា លោក​ឡាវ​រ៉ូវ “​បាន​ចាកចេញ​ពី​វគ្គ​ប្រជុំ​ទីមួយ​ពាក់កណ្តាល​ទី​ទៅហើយ​” ហើយ​បាន​រំលង​វគ្គ​ប្រជុំ​ទី​ពីរ​”​ដែល​​នេះ​បង្ហាញ​កាន់តែ​ច្បាស់​ថា​គាត់​មិន​ចាប់អារម្មណ៍​លើ​កិច្ចសហប្រតិបត្តិការ​អន្តរជាតិ​ឬ​កិច្ច​សន្ទនា​ជាមួយ​ដៃគូ G19 ផ្សេង​ទៀត​នោះ​ទេ​”​។​

​ក្រុម​អ្នកការទូត​បាន​និយាយថា ក្រោយមក​លោក​ឡាវ​រ៉ូវ​ក៏​បាន​លុបចោល​ការប្រ​ជុំ​ពេល​រសៀល​ផងដែរ មុន​ពេល​ការបង្ហាញ​ខ្លួន​តាម​អន​ឡាញ​ដោយ​រដ្ឋមន្ត្រី​ការបរទេស​អ៊ុយ​ក្រែនលោក ឌី​មីត្រូ គូ​ឡេ​បា (Dmytro Kuleba) ហើយ​មិន​មាន​វត្តមាន​ទេ​នៅ​ពេល​រដ្ឋមន្ត្រី​ការបរទេស​អាម៉េរិក​លោក​ប្លីង​កិន ថ្កោលទោស​រុស្ស៊ី​នៅក្នុង​កិច្ចប្រជុំ​បិទទ្វារ​នៅ​កោះ​បាលី​។​

​លោកស្រី​ប៊ែរ​បុក​បាន​និយាយថា “​វា​គូសបញ្ជាក់ថា រដ្ឋាភិបាល​រុស្ស៊ី​មិន​បង្ហាញ​ឆន្ទៈ​ក្នុង​ការនិយាយ​សូម្បី​មួយ​ម៉ាត់​ជាពិសេស​លើ​សំណួរ​សំខាន់​អំពី​របៀប​ដែល​យើង​នឹង​ដោះស្រាយ​វិបត្តិ​ស្បៀងអាហារ​ពិភព​​លោក​”​។​

​លោកស្រី​ប៊ែរ​បុក​បាន​និយាយថា ទោះបីជា​ប្រទេស​ចំនួន ១៩ សេសសល់​ផ្សេងទៀត​មាន​ទស្សនៈ​ខុស​គ្នា​អំពី “​សង្គ្រាម​ឈ្លានពាន​របស់​រុស្ស៊ី​” ក៏ដោយ ក៏​ប៉ុន្តែ​ពួកគេ​”​ច្បាស់​ណាស់​គឺ​អំពាវនាវ​ដល់​រុស្ស៊ី​ឱ្យ​បញ្ចប់​​សង្គ្រាម​នេះ​”​។​

​លោកស្រី​បាន​និយាយថា “​ប្រទេស​ភាគច្រើន​បាន​បញ្ជាក់​យ៉ាងច្បាស់​ថា រុស្ស៊ី​មាន​ទំនួល​ខុស​ត្រូវ​ក្នុង​ការបញ្ឈប់​ការបាញ់​ផ្លោង​ជាបន្ទាន់​”​។​

​លោក​ឡាវ​រ៉ូវ​បាន​ប្រាប់​អ្នកយកព័ត៌មាន​នៅ​ខាងក្រៅ​សណ្ឋាគារ Mulia ថា “​ដៃគូ​លោកខាងលិច​របស់​យើង​កំពុង​ព្យាយាម​ចៀសវាង​ការនិយាយ​អំពី​បញ្ហា​សេដ្ឋកិច្ច​ពិភពលោក​។​ចាប់ពី​ពេល​ដំបូង​ដែល​​ពួកគេ​និយាយ​ភ្លាម ពួកគេ​ចាប់ផ្តើម​រិះគន់​យ៉ាង​ចាស់ដៃ​មកលើ​រុស្ស៊ី​ភ្លែត​”​។​

​លោក​ប្លីង​កិន​បាន​គេចវេស​ពី​កិច្ចប្រជុំ​ជាមួយ​លោក​ឡាវ​រ៉ូវ ហើយ​ជំនួស​មកវិញ​បាន​ចោទប្រកាន់​រុស្ស៊ី​ថា​បាន​បង្ក​ឱ្យ​មាន​វិបត្តិ​ស្បៀងអាហារ​ពិភពលោក​ដោយ​ទាមទារ​ឱ្យ​ទីក្រុង​មូ​ស្គូ​អនុញ្ញាតឱ្យ​ការដឹក​​ជញ្ជូន​គ្រាប់​ធញ្ញជាតិ​ចេញពី​អ៊ុយ​ក្រែន​ដែល​រងគ្រោះ​ដោយ​សង្គ្រាម​៕

​លោក​ឡាវ​រ៉ូវ​ដើរចេញ​ពី​កិច្ចប្រជុំ G20 នៅ​កោះ​បាលី ក្រោយ​មាន​ការរិះគន់​ខ្លាំង​ពេក​ពី​លោកខាងលិច​