​ប្រែ​សម្រួលៈ​បំណង​(​វ៉េ​អិន​អិច​ស្ព្រេ​ស​)៖ មនុស្ស​បួន​នាក់​រួមមានជនជាតិ​កម្ពុជា​ម្នាក់ ត្រូវបាន​ប៉ូលិស​វៀតណាម​ចាប់ខ្លួន​នៅ​ពេល​ពួក​គេ​បើក​រថយន្ត​ជាមួយនឹង​ថ្នាំញៀន​៣២​គីឡូក្រាម​ឆ្ពោះទៅ​កាន់​ទីក្រុង​​ហូជីមិញ នេះ​បើ​តាម​ប៉ូលិស​ខេត្ត​ប៊ិញ​ហ្វឿក​(Binh Phuoc)​។​

​ពួកគេ​ឥឡូវ​កំពុង​ត្រូវបាន​ស៊ើបអង្កេត​ចំពោះ​ការ​លួច​ដឹកជញ្ជូន​និង​ជួញដូរ​ថ្នាំញៀន​ខុសច្បាប់​។​

​ប៉ូលិស​ក្នុង​ខេត្ត​ភាគ​ខាងត្បូង​វៀតណាម​នេះ បាន​និយាយថា​ខ្លួន​បាន​តាមដាន​ក្រុម​នេះ​មួយរយៈ​មកហើយ​។​កាលពី​ថ្ងៃ​អង្គារ​សប្តាហ៍​នេះ រថយន្ត​មួយ​បាន​ធ្វើដំណើរ​ចេញពី​ទីប្រជុំ​ប៊ិញឡុង​(Binh Long)​ឆ្ពោះទៅ​កាន់​ទីក្រុង​ហូជីមិញ និង​ត្រូវ​ប៉ូលិស​ឃាត់​សាកសួរ​។

​ពួកគេ​បាន​ប្រាប់​ប៉ូលិស​ថា ពួក​គេ​ដឹក​ទឹកឃ្មុំ​បី​កាន​ទៅ​ហូជីមិញ​។​

​ទោះជា​យ៉ាងណា​នៅពេល​ប៉ូលីស​ឆែកឆេរ​រថយន្ត គេ​បាន​រកឃើញ​ថ្នាំ​មេតំ​ហ្វេ​តា​មីន​១៦​គីឡូក្រាម កេតា​មីន​១០​គីឡូក្រាម និង​ថ្នាំញៀន​ហេ​រ៉ូ​អ៊ីន​៥​គីឡូក្រាម​។​ការឆែកឆេរ​មួយទៀត​នៅផ្ទះ​របស់​ជន​ត្រូវ​ចាប់​​ខ្លួន បាន​រកឃើញ​កាំភ្លើងខ្លី​ពីរ​ដើម និង​ថ្នាំញៀន​មួយ​គីឡូក្រាម​។​

​សូមបញ្ជាក់​ថា វៀតណាម​មាន​ច្បាប់​ប្រឆាំងថ្នាំញៀន​តឹងតែង​បំផុត​នៅក្នុង​លោក​។​ជន​ណា​មាន​ថ្នាំ​ញៀន​ហេ​រ៉ូ​អ៊ីន​ត្រឹមតែ​០,៦​គីឡូក្រាម ឬ​មេតំ​ហ្វេ​តា​មីន ជាង​២,៥​គីឡូក្រាម​នឹង​ប្រឈម​ទោស​ប្រហារជីវិត​៕

​ជនសង្ស័យ​និង​ថ្នាំញៀន​៣២​គីឡូក្រាម​ដែល​ប៉ូលីស​វៀត​ណា​ចាប់បាន​នៅ​ខេត្ត​ប៊ិញ​ហ្វឿក​កាលពី​ថ្ងៃ​៥​កក្កដា​