​ដោយៈ​ ប​.​ខុន​/​ភ្នំពេញៈ ​គម្រោង​ការកាយ​ស្តារ​ប្រឡាយ​និង​អូរ​របស់​រដ្ឋបាលខេត្ត​ព្រះសីហនុ​អនុវត្ត​ដោយ​មន្ទីរ​ធនធាន​និង​ឧតុនិយម​ខេត្ត​នេះ​ដើម្បី​កាត់​ប​ន្ថ​ក​ការលិចលង់​ដោយ​ជំនន់​ទឹកភ្លៀង​ក្នុង​រដូវវស្សា​នៅក្នុង​ក្រុងព្រះសីហនុ​អាច​នឹង​រួចរាល់​ក្នុងពេល​មួយ​សប្តាហ៍​ទៀត​។​

​លោក ហេង សោភ័ណ​រិ​ទ្ធ ប្រធាន​មន្ទីរ​ធនធានទឹក​និង​ឧតុ​និ​យ​បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​៩​ខែកក្កដា​ឆ្នាំ​២០២២​ថា គម្រោង​ការជីក​កាយ​ស្តារ​ប្រឡាយ​ដោះ ទឹកភ្លៀង​នៅក្នុង​សង្កាត់​លេខ​៤ ដែលមាន​ប្រវែង​ប្រមាណ​ជា​១.៨០០​ម៉ែត្រ ចាប់ពី​ម្តុំ​ម្លប់​តាប៉ាង​រហូតដល់​អាង​ចម្រោះ​ទឹក​កខ្វក់​១៦​ហិកតា ដែល​បានចាប់ផ្តើម​អនុវត្ត​កាលពី​ពាក់ កណ្តាលខែ​មិថុនា​នោះ​យ៉ាងយូរ​មួយ​សប្តាហ៍​ទៀត​បាន​រួចរាល់​ហើយ​។​

ប្រធាន​មន្ទីរ​ខាងលើ​និយាយ​ឱ្យដឹងទៀតថា​ប្រឡាយ​ដែល​បាន​ស្តារឡើងវិញ​នេះ​ជា​គម្រោង​របស់​រដ្ឋបាល​ខេត្ត​ដោយ​ត្រូវ​ជីក​កាយ​ឱ្យ​ជ្រៅ​និង​ធំ​ទៅតាម​ស្ថានភាព​ដី​ដែល បានកំណត់​នៅក្នុង​ប្លង់​ប្រព័ន្ធ​។​កន្លែង​ខ្លះ​ត្រូវ​កាយ​ជ្រៅ​រហូត​ផុតដៃ​គ្រឿងចក្រ កន្លែង​ខ្លះ​ត្រូវ​ចុះ​គ្រឿងចក្រ​ចូលទៅក្នុង​ប្រឡាយ​(​ប្រឡាយ​ធំ​)​ទើប​អាច​កាយ​បាន​។ គ្រឿងចក្រ អនុវត្ត​គម្រោង​ខាងលើ​មាន​ចំនួន​៣​គ្រឿង ដី​ដែល​កាយ​ចេញពី​ប្រឡាយ​ដាក់​នៅតាម​ផ្លូវ​ប្រឡាយរ​ហូត​ដល់​ស្ងួត​ទើប​ដឹក​ចេញ​។​ដី​និង​ល្បាប់​ដែល​ត្រូវ​កាយ​ចេញពី​ប្រឡាយ​មាន ប្រមាណ​ជា​១​ម៉ឺន​ម៉ែត្រ​គីប​។​

​លោក ហេង សោភ័ណ​រិ​ទ្ធ​បាន​និយាយ​ឱ្យដឹង​ផងដែរ​ថា​ប្រឡាយ​ខាងលើនេះ​ទើបត្រូវ​បាន​កាយ​ស្តារ​កាលពី​ក្នុង​រដូវប្រាំង តែដោយសារ​នៅ​ដើមរដូវ​វស្សា​មាន​ភ្លៀង ធ្លាក់​ច្រើន​ជា​បន្តបន្ទាប់​ធ្វើឱ្យ​ដីខ្សាច់​ហូរ​ចុះ​ពី​តំបន់​ខ្ពស់​ដែល​កំពុងមាន​ការអភិវឌ្ឍ​នាំឱ្យ​ប្រឡាយ​ឆាប់​រាក់​អស់​វិញ​និង​ត្រូវបាន​លោក​អភិបាលខេត្ត​ឱ្យ​ស្តារឡើងវិញ​ឱ្យបាន​ជ្រៅ​តាម​លទ្ធ ភាព​ដែល​អាច​ធ្វើបាន ដើម្បី​កាត់បន្ថយ​ការលិចលង់​នៅពេល​មាន​ភ្លៀង​ធ្លាក់​ខ្លាំង​ជាប់​គ្នាច្រើន​ថ្ងៃ​៕​