ដោយៈ មុនី​រ័ត្ន / ភ្នំពេញៈ លោកនាយ​ឧ​ត្ត​ម​សេនីយ៍ កិត្តិ​បណ្ឌិត ហ៊ីង ប៊ុន​ហៀ​ង អគ្គ​មេបញ្ជាការរង កងយោធពល​ខេមរភូមិន្ទ (​ខ​.​ភ​.​ម​.) និង​ជា​មេបញ្ជាការ បញ្ជាការដ្ឋាន អង្គរក្ស នៅ​ថ្ងៃទី​៩ ខែកក្កដា ឆ្នាំ​២០២២ នេះ បានរៀបចំ​ប្រជុំ​ដក​ពិសោធន៍​បន្ទាន់ ជាមួយ​មេបញ្ជាការ មេបញ្ជាការរង នាយទាហាន​បង្គោល​ទាំងអស់ របស់​បញ្ជាការដ្ឋាន​អង្គរក្ស ក្រោយ​ហេតុការណ៍​ធ្វើឃាត​លើ ស៊ីន​ហ្សូ អា​បេ (Shinzo Abe) អតីត​នាយករដ្ឋមន្ត្រី ជប៉ុន ដែល​ត្រូវបាន​ឃាតក បាញ់ប្រហារ ក្នុងកំឡុងពេល​ដែល​កំ​ពុង​ថ្លែង​សុន្ទរកថា ក្នុង​ទីក្រុង ណា​រា (Nara) ភាគ​ខាងលិច​ប្រទេស​ជប៉ុន សម្រាប់​យុទ្ធនាការ​ឃោសនាបោះឆ្នោត កាលពី​ថ្ងៃទី​៨ ខែកក្កដា ឆ្នាំ​២០២២ នោះមក ។​

​លោកនាយ​ឧ​ត្ត​ម​សេនីយ៍ កិត្តិ​បណ្ឌិត ហ៊ីង ប៊ុន​ហៀ​ង បានដាក់​បទបញ្ជា​យ៉ាង​ដាច់​ណាត់ ឱ្យ​មេបញ្ជាការ មេបញ្ជាការរង នាយទាហាន​បង្គោល​ទាំងអស់ ត្រូវ​យកចិត្តទុកដាក់​ខ្ពស់ និង​ពង្រឹង​បន្ថែមទៀត លើ​កិច្ចការងារ ការពារ​សន្តិសុខ សុវត្ថិភាព ជូន​ថ្នាក់ដឹកនាំ​កំពូល របស់​ជាតិ – អន្តរជាតិ ពិសេស​នោះ​គឺ ការពារ​សន្តិសុខ សុវត្ថិភាព​ជូន សម្តេច​តេ​ជោ នាយករដ្ឋមន្ត្រី នៃ​ព្រះរាជាណាចក្រ​កម្ពុជា និង​សម្តេច កិត្តិ​ព្រឹទ្ធ​បណ្ឌិត ឱ្យបាន ១០០% ទោះ​ក្នុងតម្លៃ​ណា​ក៍ដោយ​។​

​ទាក់ទង​ករណី​ឃាតកម្ម​នេះ រាជរដ្ឋាភិបាល​កម្ពុជា បានធ្វើការ​ថ្កោលទោស​យ៉ាងខ្លាំងបំផុត ចំពោះ​ឃាតកម្ម​ដ៏​ព្រៃផ្សៃ លើ​លោក ស៊ីន​ហ្សូ អា​បេ (Shinzo Abe) អតីត​នាយករដ្ឋមន្ត្រី ជប៉ុន ក្នុងអំឡុង​ពេលធ្វើ​យុទ្ធនាការ​ឃោសនាបោះឆ្នោត​ថ្នាក់ជាតិ នៅ​ភាគ​ខាងលិច ទីក្រុង​ណា​រ៉ា ប្រទេស​ជប៉ុន នៅ​ថ្ងៃ​សុក្រ ទី​៨ ខែកក្កដា ឆ្នាំ​២០២២​។ នេះ​បើ​យោងតាម​សេចក្តីថ្លែងការណ៍ នៅ​ព្រលប់​ថ្ងៃទី​៨ ខែកក្កដា ឆ្នាំ​២០២២ ។​

​ទន្ទឹមគ្នានេះ ក្រសួងការបរទេស និង​សហប្រតិបត្តិការ​អន្តរជាតិ នៃ​ព្រះរាជាណាចក្រ​កម្ពុជា បាន​សម្តែង​នូវ​ការ​សោកសៅ និង​តក់ស្លុត ចំពោះ​ការទទួល​មរណភាពរ​ប​ស់លោក ស៊ីន​ហ្សូ អា​បេ (Shinzo Abe) អតីត​នាយករដ្ឋមន្ត្រី​ជប៉ុន ក្រោយ​ត្រូវបាន​បាញ់ប្រហារ ក្នុងអំឡុង​ពេលធ្វើ​យុទ្ធនាការ ឃោសនាបោះឆ្នោត​ថ្នាក់ជាតិ នៅ​ភាគ​ខាងលិច​ទីក្រុង​ណា​រ៉ា ប្រទេស​ជប៉ុន នៅ​ថ្ងៃ​សុក្រ ទី​៨ ខែកក្កដា ឆ្នាំ​២០២២​។ នេះ​បើ​យោងតាម​សេចក្តីថ្លែងការណ៍ នៅ​ព្រលប់​ថ្ងៃទី​៨ ខែកក្កដា ឆ្នាំ​២០២២​។​

​ក្រសួងការបរទេស​ក​ម្ពុ​ជា បាន​បញ្ជាក់ថា រាជរដ្ឋាភិបាល​កម្ពុជា សូម​ធ្វើការ​ថ្កោលទោស​យ៉ាង ខ្លាំង​បំផុត​ចំពោះ ឃាតកម្ម​ដ៏​ព្រៃផ្សៃ​នេះ​។ លោក ស៊ីន​ហ្សូ អា​បេ គឺជា​ថ្នាក់ដឹកនាំ​ដ៏​ឆ្នើម​មួយរូប របស់​ជប៉ុន និង​ជា​មិត្តភក្ដិ ជាទីគោរព​ស្រឡាញ់​របស់​កម្ពុជា ហើយ​មរណភាព​របស់​លោក ស៊ីន​ហ្សូ អា​បេ គឺជា​ការបាត់បង់ ដ៏​គួរឱ្យ​សោកសង្រេង​មិន​ត្រឹមតែ​សំរាប់​ប្រជាជន​ជប៉ុន ប៉ុណ្ណោះ​ទេ ប៉ុន្ដែ​ក៏​សំរាប់​ប្រជាជន​កម្ពុជា ផងដែរ​។​

​រាជរដ្ឋាភិបាល និង​ប្រជាជន​កម្ពុជា សូម​ចូលរួម​រំលែក​ទុក្ខ ដ៏​ជ្រាលជ្រៅ​បំផុត និង​សំដែង​នូវ សមានចិត្ត ដ៏​ស្មោះស្ម័គ្រ​ជាទីបំផុត ជូន​ចំពោះ​គ្រួសារ​សព​របស់លោក ស៊ីន​ហ្សូ អា​បេ រដ្ឋាភិបាល និង​ប្រជាជន​ជប៉ុន​។​

​សូមជម្រាបថា អតីត​នាយករដ្ឋមន្ត្រី​ជប៉ុន លោក ស៊ីន​ហ្សូ អា​បេ បានទទួល​មរណភាព នៅ​ទី​៨ ខែកក្កដា ឆ្នាំ​២០២២ ក្រោយ​រង​ការបាញ់ប្រហារ ក្នុងអំឡុងពេល​លោក​ថ្លែង​សុន្ទរកថា ឃោសនាបោះឆ្នោត នៅ​តំបន់​ណា​រ៉ា នៅ​ជប៉ុន​ខាងលិច​។
​ការស្លាប់​របស់លោក ត្រូវបាន​បញ្ជាក់​ដោ​យម​ន្ត្រី ក្នុង​គណបក្ស​ប្រជាធិបតេយ្យ​សេរី (LDP) របស់លោក ទៅកាន់​សារព័ត៌មាន​ក្នុងស្រុក នៅ​ប្រហែល​ប្រាំមួយ​ម៉ោង ក្រោយ​ការវាយប្រហារ នៅ​ម៉ោង ១១ កន្លះ​ព្រឹក ថ្ងៃទី​៨ ខែកក្កដា នេះ និង​កើតឡើង ក្រោយ​ក្រុម​វេជ្ជបណ្ឌិត ខ្នះខ្នែង​សង្គ្រោះ​ជីវិត​របស់លោក​៕/V​