ដោយៈ ចាន់តូ / ភ្នំពេញ​: បុរស​ជនជាតិ​ចិន​ម្នាក់ បាន​បាត់​បង់ជីវិត បន្ទាប់ពី​ជិះ​ម៉ូតូ យ៉ាង​លឿន ទៅ​ទាក់​ដៃចង្កូត ជាមួយនឹង​ម៉ូតូ​មួយគ្រឿង​ទៀត បណ្ដាល​ឲ្យ​ដួល ហើយ​ក៏មាន​រថយន្ត មក​កិន​ពីលើ កាលពី​វេលា​ម៉ោង ១២​និង​៥​នាទី យប់​រំលង អធ្រាត្រ ឈានចូល​ថ្ងៃអាទិត្យ ទី​១០ ខែកក្កដា ឆ្នាំ​២០២២ តាម​បណ្តោយ​ផ្លូវ សហព័ន្ធរុស្ស៊ី ស្ថិតក្នុង​សង្កាត់​អូរ​បែកក្អម ខណ្ឌ សែន​សុខ រាជធានី​ភ្នំពេញ​។

​សព​ជន​ជាតិចិន​នោះ មិន​ត្រូវបាន​ស្គាល់​អត្តសញ្ញាណ​នៅឡើយ ដោយ​ជិះ​ម៉ូតូ​ម៉ាក ហុងដា PCX ពណ៌​ខៀវ ស៊េរី​ឆ្នាំ​២០១១ ពាក់​ផ្លាកលេខ ភ្នំពេញ​1IM.4311 ចំណែកឯ​ម៉ូតូ​មួយគ្រឿង​ទៀត គឺ​ម៉ូតូ​ម៉ាក​ស៊ុយ​ហ្ស៊ុ​យ​គី ស្មាស់​វី ពណ៌​ខ្មៅ ស៊េរី​ឆ្នាំ​២០១៩ ពាក់​ផ្លាកលេខ​ភ្នំពេញ​1HK.0335 បើកបរ​ដោយ​បុរស​ម្នាក់ មិន​ស្គាល់​អត្តសញ្ញាណ បាន​រត់គេចខ្លួន បាត់ស្រមោល​។

​តាម​ប្រភពពី​កន្លែងកើតហេតុ បាន​ឲ្យ​ដឹងថា ដំបូង​ឡើយ​គេ​ឃើញ​បុរស​ម្នាក់ ជិះ​ម៉ូតូ​ស៊ុយ​ហ្ស៊ុ​យ​គី ស្មាស់​វី តាម​បណ្ដោយ​ផ្លូវ​សហព័ន្ធរុស្ស៊ី ក្នុងទិសដៅ​ពី​ខាងលិច ទៅខាង​កើត ក្នុង​ល្បឿន​លឿន​ល្មម ខណៈ​មកដល់​ចំណុចកើតហេតុ​ខាងលើ ស្រាប់​តែមាន​ម៉ូតូ​មួយគ្រឿង​ទៀត​ម៉ាក​ហុងដា PCX បើក​តាម​បណ្ដា​យ​ផ្លូវ​សហព័ន្ធ រុស្ស៊ី​ក្នុងទិសដៅ​ពី​ខាងលិច ទៅខាង​កើត​ស្រប​ទិស​គ្នា យ៉ាង​លឿន បានមក​ទាក់ ដៃចង្កូត​ម៉ូតូ​ស៊ុយ​ហ្ស៊ុ​យ​គី ស្មាស់​វី បណ្ដាល​ឲ្យ​ដួល ហើយ​ក៏មាន​រថយន្ត ពីរ​គ្រឿង មក​កិន​ចំ​ជនរងគ្រោះ ជា​ជន​ជាតិចិន បណ្ដាល​ឲ្យ​ស្លាប់​ភ្លាមៗ​នៅនឹងកន្លែង​កើតហេតុ ដោយ​រថយន្ដ​នោះ កិន​ហើយ​បាន​បើក​ទៅ​បាត់​តែម្តង​។ ចំណែកឯ​អ្នកជិះ ម៉ូតូ​ស៊ុយ​ហ្ស៊ុ​យ​គី ស្មាស់​វី បាន​រត់​ចេញពី​កន្លែងកើតហេតុ​បាត់ស្រមោល​។

​ក្រោយពី​កើតហេតុ សមត្ថកិច្ច​ជំនាញ បាន​ចុះ​វាស់វែង យក​ម៉ូតូ​ទាំង ២​គ្រឿង ទៅ​រក្សាទុក នៅ​ការិយាល័យ​ចរាចរណ៍​ផ្លូវគោក នៃ​ស្នងការដ្ឋាន​នគរបាល​រាជធានី ភ្នំពេញ រង់ចាំ​ដោះស្រាយ​គ្នា នៅពេល​ក្រោយ ។ ចំណែក​សព សមត្ថកិច្ច ធ្វើ​កំណត់ហេតុ​រួច បាន​ដឹក​យកទៅ​ដំកល់ទុក​នៅ​វត្ត​ស្ទឹងមានជ័យ រង់ចាំ​សាច់ ញាតិ​មក​ទទួលយក​ទៅធ្វើ​បុណ្យ តាម​ប្រពៃណី​៕/V​-PC