​ប្រែ​សម្រួលៈ​បំណង​(​ដេល្លី​ម៉េល​)៖​គណបក្ស​កាន់​អំណាច​និង​ដៃគូ​ដណ្តើម​បាន​សម្លេងឆ្នោត​គាំទ្រ​គ្រប់គ្រាន់​ដើម្បី​បង្កើត​សម្លេង​ភាគច្រើន​ដាច់​មួយ​នៅក្នុង​សភា​ជាន់ខ្ពស់​នៅ​ពេល​តែ​ប៉ុន្មាន​ថ្ងៃក្រោយ​ការធ្វើឃាត​អតីត​នាយករដ្ឋមន្ត្រី​ស៊ីន​ហ្សូ អាបេ នេះ​បើ​តាម​ការផ្សាយ​របស់​សារព័ត៌មាន​ក្នុងស្រុក​កាលពី​ថ្ងៃ​ចន្ទ​។​

​គណបក្ស​ប្រជាធិបតេយ្យ​សេរី​(LDP)​ដែល​កំពុងកាន់​អំណាច​របស់​អតីត​នាយករដ្ឋមន្ត្រី​ដែល​ត្រូវបាន​ធ្វើ​ឃាត​និង​ដៃគូ​របស់​ខ្លួន​គឺ​គណបក្ស កូ​មេ​អ៊ិ​តុ ( Komeito)​បាន​ពង្រឹង​អំណាច​របស់​ខ្លួន​ដោយ​​ដណ្តើម​បាន​ជាង​៧៥​អស​នៈ​ក្នុងចំណោម​អស​នៈ​សភា​១២៥ នេះ​បើ​យោង​តាម​បណ្តា​អង្គភាព​សារព័ត៌មាន​ជាតិ​។​

​គណបក្ស​ទាំង​ពីរ​ជា​ផ្នែក​នៃ​អ្វីដែល​គេ​ហៅថា សម្លេង​ភាគច្រើន​ដាច់ខាត​ចំនួន​ពីរ​ភាគ​បី​ដែល​គេ​ចង់​បាន​ដើម្បី​ធ្វើ​វិសោធនកម្ម​រដ្ឋធម្មនុញ្ញ​សន្តិភាព​និយម​របស់​ប្រទេស​ដើម្បី​អោយ​ប្រទេស​អាច​ពង្រឹង​​តួនាទី​យោធា​របស់​ខ្លួន​នៅលើ​ឆាក​អន្តរជាតិ ដែល​ជា​គោលដៅ​យូរអង្វែង​មក​ហើយ​របស់​លោក​អាបេ​។​

​សូម្បី​តែ​មុន​ការ​ធ្វើឃាត​លោក​អាបេ គណបក្ស​LDP​និង Komeito​រំពឹងថា​នឹង​ពង្រីក​សម្លេង​ភាគច្រើន​របស់​ខ្លួន តែ​កំណើន​ខ្លាំង​ពេលនេះ​មួយចំណែក​អាចមកពី​សមានចិត្ត​អ្នកបោះឆ្នោត​ជប៉ុន​ចំពោះ​​បក្ស​កាន់​អំណាច​ក្រោយ​ឃាតកម្ម​ដ៏​រន្ធត់​នេះ​ផងដែរ​។​

​គណបក្ស​ប្រជាធិបតេយ្យ​សេរី​និង​ដៃគូ​របស់​ខ្លួន​គឺ​គណបក្ស កូ​មេ​អ៊ិ​តុ​បាន​ពង្រឹង​អំណាច​របស់​ខ្លួន​ដោយ​ដណ្តើម​បាន​ជាង​៧៥​អស​នៈ​ក្នុងចំណោម​អស​នៈ​សភា​១២៥

​នាយករដ្ឋមន្ត្រីហ្វ៊ុយ​មី​អុ គី​ស៊ី​ដា​ដែល​បញ្ជាក់ថា​លោក​ចង់​ដោះស្រាយ​បញ្ហា​ជំងឺឆ្លង និង​អតិផរណា​បណ្តា​មក​ពី​សង្គ្រាម​អ៊ុ​យក្រែន បាន​ប្រាប់​សារព័ត៌មាន​NHK​ថា​«​ខ្ញុំ​គិតថា​វា​អស្ចារ្យ​ណាស់​ដែល​យើង​អាច​រៀប​​ចំ​ការបោះឆ្នោត​ចប់សព្វគ្រប់​»​។​

​លោកនាយក​រដ្ឋមន្ត្រី​នៅតែ​ជំរុញ​ដំណើរការ​បោះឆ្នោត​ទោះជា​មាន​ឃាតកម្ម​មន្ត្រី​ជាន់ខ្ពស់​នៅ​ពីរ​ថ្ងៃមុន​ការបោះឆ្នោត ដោយ​លោក​ថា​«​យើង​មិន​ត្រូវ​អនុញ្ញាត​អោយ​អំពើ​ហិង្សា​គាបសង្កត់​ការនិយាយស្តី​​ឡើយ​»​។​

​ទទួលស្គាល់​បរាជ័យ មេដឹកនាំ​គណបក្ស​ប្រជាធិបតេយ្យ​អាស្រ័យ​ធម្មនុញ្ញ​ដែល​ជា​បក្សប្រឆាំង​លោក គេ​នតា អ៊ូ​ហ្ស៊ុ​យ​មី​(Kenta Izumi) បាន​និយាយថា​« វា​ច្បាស់​ណាស់​អ្នក​បោះឆ្នោត​មិន​ចង់​ដូរ​ចេញ​​ពី​គណបក្ស​LDP​និង​ផ្តល់​ការទុកចិត្ត​លើ​យើង​នៅក្នុង​ការដឹកនាំ​រដ្ឋាភិបាល​»​ទេ​។​

​ទោះ​ជា​ឃាតកម្ម ចំនួន​អ្នក​ចេញ​ទៅ​បោះឆ្នោត​កាលពី​ថ្ងៃអាទិត្យ​ទាប គឺ​ប្រមាណ​តែ​៥២​ភាគរយ​ប៉ុណ្ណោះ​។​

​សូមបញ្ជាក់​ថា​លោក​អាបេ​ត្រូវ​បាន​បាញ់​អោយ​ដួល​កាលពី​ថ្ងៃ​សុក្រ​នៅ​តំបន់​ណា​រ៉ា​ភាគ​ខាងលិច​ក្នុងពេល​ឃោសនា​សំរាប់​បេក្ខជន​មូលដ្ឋាន​ម្នាក់​និង​ស្លាប់​ដោយ​អស់​ឈាម​នៅ​មន្ទីរពេទ្យ​មូលដ្ឋាន​មួយ​។​​សាកសព​របស់លោក​ត្រូវបាន​ក្រុមគ្រួសារ​បញ្ជូន​មកកាន់​ទីក្រុង​តូ​ក្យូ​កាលពី​ថ្ងៃ​សៅរ៍​៕