​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ មី​ស៊ី​ល​មួយ​របស់​រុស្ស៊ី​បាន​វាយប្រហារ​ចំ​អគារ​ផ្ទះល្វែង​មួយ​កន្លែង​នៅ​ភាគ​ខាងកើត​អ៊ុយ​ក្រែន​កាលពី​ថ្ងៃអាទិត្យ​ទី​១០​កក្កដា ដោយ​សម្លាប់​មនុស្ស​យ៉ាងហោចណាស់ ១៥​នាក់ ខណៈ​កងកម្លាំង​របស់​ទីក្រុង​មូ​ស្គូ​ព្យាយាម​ពង្រឹង​ការគ្រប់គ្រង​របស់​ពួក​គេ​លើ​តំបន់​ដុន​បាស​។​

​សេវា​សង្គ្រោះបន្ទាន់​ក្នុង​តំបន់​បាន​និយាយ​នៅ​លើ Facebook ថា “​ក្នុងអំឡុងពេល​ប្រតិបត្តិការ​ជួយសង្គ្រោះ សាកសព​ចំនួន ១៥ នាក់​ត្រូវបាន​រកឃើញ​នៅ​កន្លែងកើតហេតុ​ហើយ​មនុស្ស​ប្រាំ​នាក់​ត្រូវ​​បាន​ទាញ​ចេញពី​គំនរ​បាក់បែក​” ទាំង​រស់​នៅ​ទីក្រុង​ឆា​ស៊ីវ​យ៉ា (Chasiv Yar)​។​

​មុន​នេះ​អភិបាល​តំបន់​ដូណិត​ស​ខ៍ លោក ប៉ាវ​ឡូ គី​រី​លេន​កូ (Pavlo Kyrylenko) បាន​និយាយ​នៅលើ Telegram ថា “​យ៉ាងហោច​ណាស់​មនុស្ស ៣០ នាក់​ផ្សេង​ទៀត​បាន​ស្ថិតនៅក្រោម​គំនរ​បាក់បែក​” នៃ​អគារ​កម្ពស់​បួន​ជា​ន់ បន្ទាប់​ពី​វា​ត្រូវ​បាន​បាញ់​ត្រូវ​ដោយ​មី​ស៊ី​ល Uragan របស់​រុស្ស៊ី​។​

​ផ្នែក​នៃ​អគារ​ត្រូវបាន​បំផ្លាញ​ដោយ​ការវាយប្រហារ នេះ​បើ​តាម​អ្នកឆ្លើយឆ្លង​ព័ត៌មាន​របស់​ទីភ្នាក់ងារ​សារព័ត៌មាន AFP មើលឃើញ​នៅ​កន្លែងកើតហេតុ​ទី​ដែល​អ្នក​ជួយ​សង្គ្រោះ​រាប់សិប​នាក់​កំពុង​​កាយ​កម្ទេច​ថ្ម​ដោយ​ប្រើ​គ្រឿងចក្រ​។​

​សេវា​សង្គ្រោះបន្ទាន់​បាន​និយាយថា រហូតមកទល់​ពេលនេះ ក្រុម​អ្នក​ជួយសង្គ្រោះ​អាចបង្កើត​ទំនាក់ទំនង​ជាមួយ​មនុស្ស​បី​នាក់​នៅ​ក្រោម​គំនរ​បាក់បែក​។​

​ដោយ​បាន​ប្រយុទ្ធ​យ៉ាង​យូរ​ដើម្បី​ដណ្តើម​យក​ទីតាំង​ចុងក្រោយ​នៃ​តំបន់​ជិតខាង​លូ​ហា​នស​ខ៍ ពេល​នេះ​ទាហាន​រុស្ស៊ី​កំពុងបង្វែរ​ការ​ផ្តោតអារម្មណ៍​របស់​ពួកគេ​ទៅ​កាន់​តំបន់​ដូណិត​ស​ខ៍ខ​ណៈ​ពួកគេ​សម្លឹង​​កាន់កាប់​តំបន់​ដុន​បាស​ទាំងមូល​។​

​អ្នកស្រុក​ម្នាក់​នៅ​ទីក្រុង​ឆា​ស៊ីវ​យ៉ា ដែល​មិន​បញ្ចេញ​ឈ្មោះ បានបង្ហាញ​អ្នកកាសែត AFP ឱ្យឃើញ​ជុំវិញ​ផ្ទះល្វែង​ខូចខាត​របស់គាត់​។​

​ស្ត្រី​នោះ​បាន​និយាយថា “​កាល​ពី​ម្សិលមិញ​ម៉ោង ១១ ឬ ១០ យប់​ខ្ញុំ​នៅក្នុង​បន្ទប់ដេក ហើយ​នៅពេល​ខ្ញុំ​ដើរ​ចេញ​អ្វីៗ​គ្រប់​យ៉ាង​បាន​ចាប់ផ្តើម​លាន់ឮ​ដូច​ផ្គរលាន់​និង​ប្រេះ​…​។​រឿង​តែ​មួយគត់​ដែល​ជួយ​​សង្គ្រោះ​ខ្ញុំ​គឺ​នៅ​ពេល​ដែល​ខ្ញុំ​រត់​មក​ទី​នេះ ពីព្រោះ​ភ្លាមៗ​នោះ​អ្វីៗ​ទាំងអស់​បាន​ដួលរលំ​”៕

​មនុស្ស​១៥​នាក់​ស្លាប់​ដោយសារ​មី​ស៊ី​ល Uragan របស់​រុស្ស៊ី​បាញ់​លើ​អគារ​ផ្ទះល្វែង​នៅ​ទីក្រុង​ឆា​ស៊ីវ​យ៉ា​កាលពី​ថ្ងៃអាទិត្យ