​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុម​ទាហាន​អ៊ុយ​ក្រែន​ដំបូង​គេ ដែល​ភាគច្រើន​មិន​មាន​បទពិសោធន៍​យោធា​ពីមុនមក បាន​មក​ដល់​ចក្រភព​អង់គ្លេស ដើម្បី​ហ្វឹកហាត់​ប្រយុទ្ធ​ខណៈ​ប្រទេស​​អឺរ៉ុប​ខាងកើត​នេះ​កំពុង​ប្រណាំងប្រជែង​ពេលវេលា​ដើម្បី​ជំនួស​ទាហាន​ដែល​ស្លាប់​និង​របួស​ក្នុង​សង្គ្រាម​ប្រឆាំង​នឹង​រុស្ស៊ី​។​

​ក្រសួង​ការពារជាតិរ​បស់​ចក្រភព​អង់គ្លេស​បាន​និយាយ​ថា​ទាហាន​ថ្មី​ពីរ​បី​រយ​នាក់​ដំបូង​កំពុង​ទទួលបាន​ការណែនាំ​នៅ​តាម​កន្លែង​នានា​ទូទាំង​ប្រទេស​អង់គ្លេស​ក្នុង​ដំណាក់កាល​ដំបូង​នៃ​កម្មវិធី​ដែល​​មាន​គោលបំណង​បណ្តុះបណ្តាល​ទាហាន​អ៊ុយ​ក្រែន​រហូតដល់ ១០.០០០ នាក់​ក្នុង​ការប្រើ​អាវុធ ការសង្គ្រោះ​បឋម​ក្នុង​សមរភូមិ​ប្រយុទ្ធ និង យុទ្ធសាស្ត្រ​ល្បាត​។

​វា​គឺជា​ផ្នែក​មួយ​នៃ​កញ្ចប់​ជំនួយ​ដ៏​ទូលំទូលាយ​សម្រាប់​អ៊ុ​យក្រែន ដែល​រួមមាន​អាវុធ​ប្រឆាំង​រថក្រោះ ប្រព័ន្ធ​រ៉ុក្កែត និង​គ្រឿង​សឹក​ផ្សេងទៀត ដែល​មាន​តម្លៃ ២,៨ ពាន់​លាន​ដុល្លារ​។​

​រដ្ឋមន្ត្រី​ការពារជាតិ​លោក បិ​ន វ៉ាល់​ឡេស (Ben Wallace)​បាន​និយាយថា “​ដោយ​ប្រើ​ជំនាញ​លំដាប់​ពិភពលោក​នៃ​កងទ័ព​អង់គ្លេស​យើង​នឹង​ជួយ​អ៊ុយ​ក្រែន​ក្នុង​ការកសាង​កងក​ម្លាំង​របស់ខ្លួន​​ឡើងវិញ​និង​បង្កើន​ការតស៊ូ​របស់​ពួកគេ ខណៈ​ពួកគេ​ការពារ​អធិបតេយ្យភាព​របស់​ប្រទេស និង​សិទ្ធិ​របស់​ពួកគេ​ក្នុង​ការជ្រើសរើស​អនាគត​របស់​ពួកគេ​”​។​

​ជា​ផ្នែក​មួយ​នៃ​កម្មវិធី ចក្រភព​អង់គ្លេស​បាន​ទិញ​កាំភ្លើង AK ដើម្បី​ឱ្យ​ទាហាន​អ៊ុយ​ក្រែន​អាច​ហ្វឹកហាត់​ជាមួយនឹង​អាវុធ​ដែល​ពួកគេ​នឹង​ប្រើប្រាស់​នៅ​សមរភូមិ​ជួរ​មុខ​។​ចក្រភព​អង់គ្លេស​ក៏​នឹង​​ផ្តល់​ឧបករណ៍​ការពារ​ខ្លួន​សម្រាប់​ទាហាន​ផងដែរ រួម​ទាំង​មួកសុវត្ថិភាព អាវ​ក្រោះ ឧបករណ៍​ការពារ​ភ្នែក ត្រចៀក និង​ត្រគាក ឧបករណ៍​សង្គ្រោះ​បឋម​ផ្ទាល់​ខ្លួន​ព្រមទាំង​ឯកសណ្ឋាន​និង​ស្បែកជើង​​កវែង​សម្រាប់​សមរភូមិ​លើ​ទីវាល​ផងដែរ​។​

​លោក​ពល​បាល ដាន់ ហេស (Dan Hayes) បាន​ប្រាប់​កាសែត Times of London ថា គោលដៅ​គឺ​ដើម្បី​ប្រែក្លាយ​ជន​ស៊ីវិល​ឱ្យទៅ​ជា​ទាហាន​ដ៏​មាន​ប្រសិទ្ធភាព​យ៉ាង​ឆាប់រហ័ស​។​

​លោក​ហេ​សបាន​និយាយថា “​អ្នក​ទាំងអស់​នេះ​គឺជា​អ្នកបើកបរ​ឡាន​ដឹកទំនិញ ឬ​ពួក​គេ​ធ្វើការ​នៅ​ក្នុង​កន្លែង​យក​ថ្ម ឬ ពួកគេ​ជា​អ្នក​លក់ទំនិញ​។ ខ្ញុំ​បាន​នៅក្នុង​ជួរ​កងទ័ព ១៤​ឆ្នាំ​ហើយ​ខ្ញុំ​បាន​ជ្រើស​​រើស​ចូលរួម​។ បុរស​ទាំង​នេះ​សុទ្ធតែ​ជា​ពលរដ្ឋ​សាមញ្ញ​…​ហើយ​យើង​កំពុង​វិនិយោគ​អ្វី​គ្រប់​យ៉ាង​ដែល​យើង​អាចធ្វើ​បាន​ព្រោះ​យើង​ដឹង​ថា​ពួកគេ​នឹង​ត្រូវការ​វា​”៕

​ទាហាន​អ៊ុយ​ក្រែន​កំពុង​ហ្វឹ​កនៅ​ទឹកដី​អង់គ្លេស​កាលពី​ថ្ងៃទី ៧ កក្កដា ឆ្នាំ​២០២២