ដោយៈ សុខុម / ស្ទឹងត្រែងៈ ព្រៃ​សហគមន៍​ភ្នំ​ជម្រក​សត្វ ដែលមាន​ភ្នំ​ឈ្ងោក មួយ ដ៏​ខ្ពស់ ស្ថិតនៅ​ភូមិ​ឆ្វាំង ឃុំ​សំអាង ស្រុក​ថា​ឡា​បរិ​វ៉ា​ត់ ខេត្តស្ទឹងត្រែង រង​ការកាប់ បំផ្លាញ ស្ទើរ​បាត់បង់ ទាំងស្រុង តាម​រូបភាព​រាន​ព្រៃ យក​ដី​ធ្វើ​កសិកម្ម​។ មកដល់ បច្ចុប្បន្ននេះ អាជ្ញាធរ​សហគមន៍ និង​អង្គការក្រៅរដ្ឋាភិបាល កំពុង​យកចិត្តទុកដាក់ ថែរក្សា​ព្រៃ ដែល​នៅ​សេសសល់ និង​ដាំ​ដើមឈើ​ឡើងវិញ ឲ្យ​ក្លាយជា​តំបន់​បៃតង​។​

​ភ្នំ​ឈ្ងោក គឺជា​រមណីយដ្ឋាន​ទេសចរណ៍ បែប​ធម្មជាតិ លាយឡំ​ព្រៃ​សហគមន៍ អេកូ​ទេសចរណ៍ ភ្នំ​ជម្រក​សត្វ​ដ៏​ទាក់ទាញ​មួយ នៅក្នុង​ស្រុក​ថា​ឡា​បរិ​វ៉ា​ត់ មាន​ចម្ងាយ​ប្រហែល ៤០ គីឡូម៉ែត្រ ពី​ក្រុង​ស្ទឹងត្រែង​។ សហគមន៍​ព្រៃឈើ​ភ្នំ ជម្រក​សត្វ និង​ភ្នំ​ឈ្ងោក ត្រូវបាន​រៀបចំ​បង្កើត​ឡើង នៅ​ឆ្នាំ ២០១៨ ដោយមាន​ការ សម្របសម្រួល ពី​អង្គការ​សេ​ប៉ា (CEPA) ក្រោម​ជំនួយ​មូលនិធិ​ខ្នាតតូច​ពី អង្គការ​កម្មវិធី​អភិវឌ្ឍន៍ សហប្រជាជាតិ (UNDP) សហការ​ជាមួយ​ជំនាញ​ពាក់ព័ន្ធ រួមមាន​មន្ទីរ​កសិកម្ម រុក្ខាប្រមាញ់ និង​នេសាទ​, ខណ្ឌ​រដ្ឋបាល​ព្រៃឈើ​, មន្ទីរ​បរិស្ថាន​, មន្ទីរ​ទេសចរណ៍ និង​មានការ​ចូលរួម​យ៉ាងសកម្ម ពី​សហគមន៍​ព្រៃឈើ និង​អាជ្ញាធរ ។​

​ដោយសារ​សហគមន៍​ព្រៃឈើ ភ្នំ​ជម្រក​សត្វ និង​ភ្នំ​ឈ្ងោក មាន​សារៈសំខាន់ ផ្ដល់​ប្រយោជន៍ ដល់​វិស័យ​ទេសចរណ៍​នោះ អាជ្ញាធរខេត្ត​ស្ទឹងត្រែង បាន​ដាំ​ដើម ឈើ​ជាច្រើន​ប្រភេទ ជាង ១.០០០ ដើម នៅ​ព្រៃ​សហគមន៍​មួយ​នេះ កាលពីពេល កន្លងទៅ​។ ដើមឈើ ដែល​បាន​ដាំ ទាំងនោះ រួមមាន ឈើ​កម្រ និង​កូនឈើ​ប្រណិត ដូច​ជាដើម​ក្រញូង ៨០០ ដើម បេង ១៨០ ដើម ក្ងោក ៣០០ ដើម និង​ស្វាយកែវ រមៀត ១០០ ដើម​។​

​ក្រៅពីនេះ ខណ្ឌ​រដ្ឋបាល​ព្រៃឈើ ក៏បាន​ប្រគេន​កូនឈើ ដល់​ព្រះសង្ឃ និង​ចែកជូន កូនឈើ ដល់​សហគមន៍​, សាលារៀន និង​ប្រជាពលរដ្ឋ ចំនួន ៥.០០០ ដើម ដើម្បី​ដាំ​ក្នុងឱកាស​នៃ ពិធីបុណ្យ​រុក្ខទិវា ៩​កក្កដា ឆ្នាំ​២០២២៕/V​-PC