​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ស្រីលង្កា​ត្រូវការ ៦ ពាន់​លាន​ដុល្លារ​អាម៉េរិក​រហូតដល់​ដំណាច់​ឆ្នាំ​នេះ ដើម្បី​ទិញ​ប្រេងឥន្ធនៈ​និង​ទំនិញ​សំខាន់ៗ​ផ្សេងទៀត​ដើម្បី​រក្សា​ស្ថិរភាព​សេដ្ឋកិច្ច​​រង្គោះរង្គើ​របស់ខ្លួន​។​

​សំណួរ​គឺថា​តើ​លុយ​នេះ​នឹង​មកពីណា​។​

​ឥណ្ឌា ដែលជា​អ្នក​ឧបត្ថម្ភ​ខ្ជាប់ខ្ជួន​បំផុត​មួយ​របស់​ខ្លួន បាន​ផ្តល់​ឥណទាន​និង​ប្រាក់កម្ចី​ចំនួន​៤​ពាន់​លាន​ដុល្លារ ដែល​ស្រីលង្កា​បាន​ប្រើ​អស់រលីង​ក្នុង​រយៈពេល​ប៉ុន្មាន​ខែ​ថ្មីៗ​នេះ​។ នៅក្នុង​កិច្ចប្រជុំ​មួយ ដែល​ធ្វើឡើង​នៅ​ទីក្រុង​កូឡុំបូ ក្រុមមន្ត្រី​ឥណ្ឌា​បាន​បង្ហាញ​ពី​ឆន្ទៈ​ក្នុង​ការបន្ត​គាំទ្រ​ដល់​ស្រីលង្កា​។ ប៉ុន្តែ​គេ​មិនដឹង​ច្បាស់​ថា​តើ​ឥណ្ឌា​នឹង​ជួយ​បាន​ច្រើន​ប៉ុនណា​ទៀត​នោះ​ទេ​។​

​ស្ថានភាព​គឺ​កាន់តែ​តានតឹង​ខ្លាំង​រហូត​ដល់​ថ្នាក់​ស្រីលង្កា​ស្នើសុំ​ទិញ​ប្រេងឥន្ធនៈ​ជំពាក់​សិន​ពី​ប្រធានាធិបតី​រុស្ស៊ី វ្ល៉ា​ឌី​មៀ ពូ​ទីន​។ ​គណៈប្រតិភូ​រដ្ឋាភិបាល​ថែមទាំង​ត្រូវ​បាន​បញ្ជូន​ទៅ​ក្រៅប្រទេស​ដើម្បី​ជួប​ជាមួយ​នរណា​ក៏​បាន​ដែរ​ឱ្យ​តែ​អាច​ជួយ​បាន រួមទាំង​អង្គការ​សប្បុរសធម៌​នៅ​ប្រទេស​កាតា​ផងដែរ​។​

​ប្រទេស​ចិន ជា​សម្ពន្ធមិត្ត​យូរលង់​របស់​គ្រួសារ​កាន់អំណាច រ៉ា​ចា​ប៉ាក់​សា (Rajapaksa) បាន​ដោះដៃ​ចេញ​ពី​ពួកគេ​។ ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ​ចិន​បាន​ផ្តល់​ប្រាក់​កម្ចី​យ៉ាងច្រើន​ដល់​​គម្រោង​ហេដ្ឋារចនាសម្ព័ន្ធ​សំខាន់ៗ​ជាច្រើន​របស់​ពួកគេ តែ​ស្រីលង្កា​កាលពី​ពេល​ថ្មីៗ​បានប្រកាស​ក្ស័យធន​លែង​អាច​សងបំណុល​បរទេស​ណា​បាន​ហើយ​។​

​ថ្លៃ​ប្រេងឥន្ធនៈ​ប្រចាំ​ខែ​តែ​ឯង​របស់​ស្រីលង្កា​គឺមាន​ចំនួន​ប្រហែល ៥០០ លាន​ដុល្លារ​។ ក្រុមមន្ត្រី​បាន​និយាយ​ថា​ក្រុមហ៊ុន​ផ្គត់ផ្គង់​ប្រេងឥន្ធនៈ​ជា​ប្រពៃណី​របស់ខ្លួន​មាន​ការស្ទាក់ស្ទើរ​ក្នុង​ការលក់​ប្រេង​ឱ្យ​​ទៅ​ប្រទេស​នេះ ដោយសារ​តែ​ក្រុមហ៊ុន​ប្រេង​របស់​រដ្ឋ​កំពុង​ជាប់​ជំពាក់​បំណុល​វ័ណ្ឌក​ដែល​ខ្លួន​គ្មាន​លទ្ធភាព​សង​។ ក្នុង​រយៈពេល​ប៉ុន្មាន​ខែ​ថ្មីៗ​នេះ​ក្រុមហ៊ុន​ផ្គត់ផ្គង់​មួយចំនួន​បាន​បដិសេធ​មិន​ព្រម​ដាក់​ប្រេង​​ចុះ​ពី​កប៉ាល់​ដែល​ចូល​ចត​នៅ​កំពង់ផែ​ស្រីលង្កា​ទេ​ទាល់តែ​ការទូទាត់​ប្រាក់​ត្រូវ​បាន​ធ្វើឡើង​៕

​ស្រីលង្កា​ត្រូវការ​៥០០​លាន​ដុល្លារ​រៀងរាល់ខែ​ដើម្បី​នាំចូល​ប្រេងឥន្ធនៈ