​ដោយៈ​តាកែវ​/ តាកែវៈ អ្នកម៉ៅការ​ប្រមូល​សម្រាម រិ​ទ្ធ ចាន់​ណាវី នៅក្នុង​ស្រុក​សំរោង លូកដៃ​ចូល​កើប​លុយ​សម្រាម តាម​ផ្ទះ នៅ​ភូមិសាស្ត្រ​ស្រុក​បាទី ដោយ​មិន​ព្រម​សហការ ជាមួយ​អាជ្ញាធរ ក្រោយ​រដ្ឋបាល​ស្រុក​បាទី ប្រកាស​ទទួលយក​សេវាករ ប្រមូល​សម្រាម ប្រចាំ​ស្រុក ដើម្បី​ប្រមូល​សំរាម ដឹកជញ្ជូន​សំរាម និង​កែច្នៃ​សំរាម ទៅតាម​បច្ចេកទេស​ស្តង់ដារ កាលពីដើម​ខែកក្កដា ឆ្នាំ​២០២២​នេះ​។​

​រដ្ឋបាល​ស្រុក​បាទី បានចាត់ទុក​ក្រុមហ៊ុន​ប្រមូល​សម្រាម ដែល​មិន​គោរព​ច្បាប់​ខាងលើ ជា​អ្នកទទួល​ម៉ៅការ ដែល​មិនមាន​សីលធម៌ ក្រោយពី​រដ្ឋបាល​ស្រុក បាន​កោះហៅ​ម្ចាស់ ក្រុមហ៊ុន មក​ធ្វើការ​ពន្យល់ ពី​នីតិវិធី ដែល​អនុលោម​តាម​គោលការណ៍​របស់​រដ្ឋបាល​ស្រុក ដែល​បានសម្រេច​ទទួលយក​លោក​ស្រី ប្រាក់ ចាន់​រដ្ឋា ជា​អ្នកម៉ៅការ ក្នុងការ​ប្រមូល​សម្រាម ដឹកជញ្ជូន​សម្រាម និង​កែច្នៃ​សំណល់​រឹង នៅក្នុង​ភូមិសាស្ត្រ​ស្រុក​បាទី ដោយ​ចាប់ផ្តើម​អនុវត្តន៍ ចាប់ពី​ខែកក្កដា ឆ្នាំ​២០២២ នេះ​តទៅ នៅក្នុង​ដែន​សមត្ថកិច្ច​ស្រុក​បាទី ក៏ប៉ុន្តែ​ម្ចាស់​សេវាករ ដែល​មិនទាន់មាន​សិទ្ធិ តាមផ្លូវ​ច្បាប់ នៅ​ស្រុក​សំរោង​នេះ មិន​ព្រម​សហការ​នោះទេ ថែមទាំង​និយាយថា ខ្លួន​នៅតែ​បន្ត​ប្រមូល​សម្រាម និង​យកលុយ​ជាធម្មតា ហើយ​បានចាត់ទុក សេចក្តីជូនដំណឹង​រប​ស់​រដ្ឋបាល​ស្រុក​បាទី ស្តីពី​ការទទួលយក​ម្ចាស់​សេវាករ ក្នុងការ​ប្រមូល សម្រាម ក្នុងស្រុក មិនមាន​តម្លៃ និង​បាន​ដើរ​ចេញពី​អង្គប្រជុំ ដោយ​គ្មាន​ការគោរព​អាជ្ញាធរ ដែលជា​ទង្វើ​អសីលធម៌ ពិបាក​នឹង​ទទួលយក​ជាទីបំផុត នេះ​បើតាម​ការបញ្ជាក់​ឱ្យដឹងពី​លោក រៀម វណ្ណ​វី នាយក​រដ្ឋបាល​ស្រុក​បាទី ដែល​បាន​ដឹកនាំ​អង្គប្រជុំ​តាមរយៈ​ទូរស័ព្ទ​នៅ​ព្រឹក​ថ្ងៃទី ៩ ខែកក្កដា ឆ្នាំ​២០២២​។​

​ក្រោយ​មាន​សកម្មភាព ដែលជា​ទង្វើ​អសីលធម៌ របស់​អ្នកម៉ៅការ​ប្រមូល​សម្រាម នៅ​ស្រុក​សំរោង ក្រុមហ៊ុន រិ​ទ្ធ ចាន់​ណាវី ធ្វើ​ដាក់​រដ្ឋបាល​ស្រុក​បាទី យ៉ាង​ដូច្នេះ លោក ភួ​ន ឈី​ម អភិបាលស្រុក​បាទី បានចេញ​សេចក្តីជូនដំណឹង​មួយច្បាប់ ទៅ​បណ្តា​រដ្ឋបាល​ឃុំ ទាំងអស់ នៅក្នុង​ស្រុក បើសិន​ជាមាន​រថយន្ត​ប្រមូល​សម្រាម​របស់​អ្នកម៉ៅការ ដែល​គ្មាន​ការទទួលស្គាល់​ស្របច្បាប់ ពី​អាជ្ញាធរ​ស្រុក រដ្ឋបាល​ឃុំ ត្រូវ​ឃាត់​រថយន្ត​នោះ​ទុក និង​បញ្ជូន​រថយន្ត​នោះ មក​រដ្ឋបាល​ស្រុក​បាទី​ជាបន្ទាន់ និង​ប្រកាស​ដល់​បងប្អូន​ប្រជាពលរដ្ឋ នៅ​មូលដ្ឋាន​ស្រុក​បាទី​ទាំងអស់ សហគ្រាស រោងចក្រ គ្រឹះស្ថាន​ឯកជន អាហា​រដ្ឋា​ន រមណីយដ្ឋាន នានា​ទាំងអស់ ត្រូវ​បញ្ឈប់​បង់​ថវិកា​ដល់​ក្រុមហ៊ុន​ប្រមូល​សម្រាម រិ​ទ្ធ ចាន់​ណាវី ដែល​ល្មើស​ច្បាប់ទម្លាប់ ហើយ​បំពាន​លើ​ដែន​សមត្ថកិច្ច​របស់ខ្លួន​ផង ។​

​ពាក់ព័ន្ធ​លើ​ករណី​ខាងលើ​នេះដែរ លោក កេ​ត ម៉ៅ អភិបាលស្រុក​សំរោង បានបញ្ជាក់​ឱ្យដឹង តាម​ទូរស័ព្ទ​ថាៈ ចំពោះ​បុគ្គល​ឈ្មោះ ជឹម សុវណ្ណ​រិ​ទ្ធ ដែលជា​អ្នកប្រមូល​សំរាម នៅក្នុង​ស្រុក​សំរោង​នេះ គឺ​លោ​កនៅ​មិនទាន់​បានផ្តល់​សិទ្ធិ ស្របច្បាប់​នៅឡើយ​នោះទេ គឺ​លោក​គ្រាន់តែ​អនុញ្ញាត ឱ្យ​គាត់​ប្រមូល​សម្រាម ជា​បណ្តោះអាសន្ន​សិន​តែប៉ុណ្ណោះ ព្រោះ​គាត់​នៅ​មិនទាន់មាន​លក្ខណៈសម្បត្តិ​គ្រប់គ្រាន់ ក្នុង​ការធានា​គ្រប់គ្រង​សម្រាម​បានទេ​។​

​លោក​បាន​បន្តថាៈ សម្រាប់​ស្រុក​សំរោង រដ្ឋបាល​ស្រុក ស្វាគមន៍​ជានិច្ច បើសិន​ជាមាន​ដៃគូ វិនិយោគ​ណា ដែល​ធានាបាន​បរិស្ថាន​ល្អ​ស្អាត នៅក្នុង​ការប្រមូល​សម្រាម មាន​លក្ខណៈ សម្បត្តិ​គ្រប់គ្រាន់ ក្នុងការ​ប្រមូល​សម្រាម មាន​ឡ មាន​ដី​សម្រាប់​ស្តុក មាន​ឆន្ទៈ​ខ្ពស់ និង​មាន​ម​ធ្យា​បាយ​ដឹកជញ្ជូន​គ្រប់គ្រាន់ លោក​នឹង​ផ្តល់​សិទ្ធិ​ឱ្យទៅ​ម្ចាស់​សេវាករ​ថ្មី​តែម្តង ដើម្បី​បរិស្ថាន​ល្អ​ស្អាត ក្នុង​មូលដ្ឋាន​ស្រុក​សំរោង​។​

​ជុំវិញ​បញ្ហា​ខាងលើ​នេះដែរ លោក ឆ​យ ម៉ុ​ន​លី ប្រធាន​មន្ទីរ​បរិស្ថាន​ខេត្តតាកែវ បានបញ្ជាក់ ថាៈ ការបន្ត​ចូល​ប្រមូល​សំរាម ដោយ​មិន​គោរព តាម​អនុក្រឹត្យ​លេខ ១១៣ ដែល​ចេញ​ដោយ រាជរដ្ឋាភិបាល អ្នកម៉ៅការ ប្រមូល​សំរាម រិ​ទ្ធ ចាន់​ណាវី អាច​នឹង​ប្រឈមមុខ​នឹង​ការព្រមាន ធ្ងន់ៗ ពី​ក្រសួង បើសិនជា​នៅតែ​បំពាន និង​មិន​គោរព​ទៅតាម​គោលការណ៍​ណែនាំ តាមផ្លូវ​ច្បាប់​របស់​ក្រសួងបរិស្ថាន នៅលើ​ដែន​សមត្ថកិច្ច​របស់ខ្លួន ដែល​រដ្ឋបាល​ស្រុក ជា​អ្នក​កំណត់ឱ្យ​៕/V​