​ប្រែ​សម្រួលៈ​បំណង​(​ដេល្លី​ម៉េល​)៖ ក្នុងអំឡុងពេល​ថ្លែង​សុន្ទរកថា​នយោបាយ​នៅ​រដ្ឋធានី​ឥណ្ឌូនេស៊ី រដ្ឋមន្ត្រីការបរទេស​ចិន​លោក​វ៉ាង យី កាលពី​ថ្ងៃ​ចន្ទ​បាន​ព្រមាន​ថា បណ្តា​ប្រទេស​នៅ​អាស៊ី​អាគ្នេយ៍​​ត្រូវតែ​ជៀសវាង​ការ​ដែល​មហាអំណាច​ធំៗ​ប្រើប្រាស់​ជា​”​កូន​អុក​”​។​

រដ្ឋមន្ត្រីការបរទេស​ចិន​លោក​វ៉ាង យី បាន​និយាយថា​ប្រទេស​ជាច្រើន​នៅ​អាស៊ាន ស្ថិត​ក្រោម​សម្ពាធ​អោយ​ឈរ​នៅ​ខាង​ណាមួយ​ក្នុង​ការប្រកួតប្រជែងរ​វាង​ចិន​និង​អាម៉េរិក​

​ថ្លែង​នៅ​លេខាដ្ឋាន​អាស៊ាន​នៅ​ទីក្រុង​ហ្សា​ការ​តា លោក​វ៉ាង បាន​និយាយថា ប្រទេស​ជាច្រើន​នៅក្នុង​តំបន់​នេះ​ស្ថិតក្រោម​សម្ពាធ​អោយ​ឈរ​នៅ​ខាង​ណា​មួយ​។​«​យើង​គួរ​ដាក់​តំបន់​នេះ​នៅ​ដាច់​ពី​ការ​​គណនា​នយោបាយ​…​ចេញពី​ការ​ត្រូវ​គូប្រជែង​មហាអំណាច​ធំៗ​ប្រើ​ជា​កូនអុក​និង​ជៀសផុត​ពី​ការបង្ខិតបង្ខំ​។​អនាគត​នៃ​តំបន់​របស់​យើង គួរ​នៅក្នុង​ដៃ​របស់​ខ្លួនឯង​ផ្ទាល់​»​។​

​អាស៊ីអាគ្នេយ៍​ជា​តំបន់​បែងចែក​ភូមិសាស្ត្រ​នយោបាយ​ជា​យូរ​មក​ហើយ​រវាង​មហាអំណាច​ធំៗ ដោយសារ​តែ​សារសំខាន់​យុទ្ធសាស្ត្រ​របស់​វា ដោយ​ប្រទេស​ខ្លះ​ថ្លឹងថ្លែង​ថា​គួរ​ជ្រើសរើស​ការ​នៅ​ខាង​អាម៉េរិក​​ឬ​ចិន​។​

​ការលើកឡើង​របស់​លោក​វ៉ាង កើត​ឡើង​តែ​ប៉ុន្មាន​ថ្ងៃក្រោយ​លោក​ចូលរួម​កិច្ចប្រជុំ​រដ្ឋមន្ត្រីការបរទេស​នៃ​ក្រុម​ប្រទេស​G20​នៅ​កោះ​បាលី និង​ចំពេល​ចិន​ធ្វើ​កិច្ចការ​ទូត​យ៉ាងខ្លាំង​ដែល​បាន​នាំ​លោក​វ៉ាង​​ទៅកាន់​ប្រទេស​ជាច្រើន​ក្នុង​តំបន់​នៅ​ប៉ុន្មាន​សប្តាហ៍​មក​នេះ​។​

​នៅក្រៅ​ជំ​នួន​G20 លោក​វ៉ាង​បាន​ជួបប្រជុំ​អស់​ប្រាំ​ម៉ោង​ជាមួយ​សម​ភាគី​អាម៉េរិក អ៊ែន​ថូ​នី ប្លីង​កិន ដោយ​អ្នក​ទាំង​ពីរ​បាន​ពណ៌នា​កិច្ចពិភាក្សា​លើកដំបូង​របស់​ពួក​លោក​ចាប់​តាំងពី​ខែ​តុលា​ថា​«​ដោយ​ភាពស្មោះត្រង់​»​។​

​លោក​វ៉ាង បាន​និយាយ​កាលពី​ថ្ងៃ​ចន្ទ​ថា លោក​បាន​ប្រាប់​លោក​ប្លីង​កិន​ថា ភាគី​ទាំងពីរ​គួរ​ពិភាក្សា​អំពី​ការបង្កើត​ច្បាប់​សំរាប់​ការទាក់ទង​វិជ្ជមាន​និង​រួម​គ្នា​រក្សា​តំបន់​និយម​នៅ​អាស៊ី​ប៉ាស៊ីហ្វិក​។​

​បើ​តាម​រដ្ឋមន្ត្រីការបរទេស​រូបនេះ «​សមាសភាព​ស្នូល​គឺ​ត្រូវ​គាំទ្រ​អព្យាក្រិត​អាស៊ាន រក្សា​ក្របខណ្ឌ​សារ​ជីវ​កម្ម​តំបន់ គោរព​សិទ្ធិ​ស្រប​ច្បាប់និង​ផលប្រយោជន៍​រវាង​គ្នា​​នៅ​អាស៊ី​ប៉ាស៊ីហ្វិក​ជាជាង​ប្រឆាំង​​ឬ​ម្ខាងខ្ទប់​ម្ខាង​ទៀត​មិន​អោយ​ងើប​រួច​»​។​

​ឆ្លើយតប​ទៅនឹង​សំណួរ​មួយ​ពាក់ព័ន្ធ​តៃវ៉ាន់​ក្រោយ​ការ​ថ្លែង​សុន្ទរកថា លោក​វ៉ាង​បាន​និយាយថា រដ្ឋាភិបាល​ទីក្រុង​វ៉ាស៊ីនតោន​ព្យាយាម​លេង​ស្លឹក​បៀរ​តៃវ៉ាន់​ដើម្បី​រារាំង​និង​ទប់​ការអភិវឌ្ឍ​របស់​ចិន​៕