​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ អង្គការសហប្រជាជាតិ​បាន​ព្យាករណ៍​កាលពី​ថ្ងៃ​ចន្ទ ទី ១១ ខែកក្កដា​ថា ចំនួន​ប្រជាជន​ពិភពលោក​ត្រូវ​បាន​រំពឹងថា​នឹង​កើនឡើង​ដល់ ៨ ពាន់​លាន​នាក់​នៅ​ថ្ងៃទី ១៥ ខែវិច្ឆិកា​នៅក្នុង​របាយការណ៍​មួយ​ដែល​និយាយ​ថា​ឥណ្ឌា​នឹង​វ៉ា​ដាច់​ចិន​ក្នុងនាម​ជា​ប្រទេស​ដែល​មាន​ប្រជាជន​ច្រើន​ជាង​គេ​នៅ​លើ​ផែនដី​នៅ​ឆ្នាំ ២០២៣​។​

​អគ្គលេខាធិការ​អ​.​ស​.​បលោក អង់​តូ​នីញ៉ូ គូថេ​រ៉េស បាន​និយាយ​ដោយ​មិន​បញ្ជាក់​លម្អិត​ថា ព្រឹត្តិការណ៍​ចំនួន​ប្រជាជន​សរុប​ច្រើន​បែប​នេះ​”​គឺជា​ការ​រំលឹក​ពី​ការទទួលខុសត្រូវ​រួមគ្នា​របស់​យើង​ក្នុងការ​​ថែរក្សា​ភពផែនដី​របស់​យើង និង​ជា​ពេល​មួយ​ដើម្បី​ឆ្លុះបញ្ចាំង​ពី​កន្លែង​ដែល​យើង​នៅ​ខ្វះ​ការប្តេជ្ញា​ចិត្ត​របស់​យើង​ចំពោះ​គ្នា​ទៅវិញទៅមក​”​។​

​លោក​បាន​បន្ថែមថា “​នេះ​គឺជា​ឱកាស​មួយ​ដើម្បី​អបអរសាទរ​ភាព​ចម្រុះ​របស់​យើង ទទួលស្គាល់​មនុស្សជាតិ​ទូទៅ​របស់​យើង និង សម្រេច​បាន​ភាពជឿនលឿន​ផ្នែក​សុខាភិបាល​ដែល​បាន​បន្លាយ​អាយុ​​ជីវិត​និង​កាត់បន្ថយ​អត្រា​មរណភាព​មាតា​និង​ទា​រកបាន​យ៉ាងខ្លាំង​”​។​

​ការព្យាករណ៍​ដោយ​នាយកដ្ឋាន​កិច្ចការ​សេដ្ឋកិច្ច​និង​សង្គម​របស់​អ​.​ស​.​ប បាន​លើកឡើង​ថា ចំនួន​ប្រជាជន​ពិភពលោក​កំពុង​កើន​ឡើង​ក្នុង​ល្បឿន​យឺត​បំផុត​ចាប់តាំងពី​ឆ្នាំ ១៩៥០ មក​។​

​វា​គួរតែ​ឈានដល់ ៨,៥ ពាន់​លាន​នាក់​នៅ​ឆ្នាំ ២០៣០ និង ៩,៧ ពាន់​លាន​នាក់​នៅ​ឆ្នាំ ២០៥០ ដោយ​ឈាន​ដល់​កម្រិត​កំពូល​ប្រហែល ១០,៤ ពាន់​លាន​នាក់​នៅក្នុង​ទសវត្សរ៍​ឆ្នាំ ២០៨០​មុន​ពេល​ថេរ​នៅ​​កម្រិត​ដដែល​រហូត​ដល់​ឆ្នាំ ២១០០​។​

​របាយការណ៍​បាន​បន្ថែមថា ខណៈ​ការធ្លាក់ចុះ​នៃ​អត្រាកំណើត​ត្រូវ​បាន​សង្កេតឃើញ​នៅក្នុង​ប្រទេស​កំពុងអភិវឌ្ឍន៍​មួយចំនួន ការ​ព្យាករណ៍​អំពី​ការកើនឡើង​ចំនួន​ប្រជាជន​ពិភពលោក​ច្រើន​ជាង​ពាក់​​កណ្តាល​ក្នុង​ប៉ុន្មាន​ទសវត្សរ៍​ខាងមុខ​នេះ​នឹង​ត្រូវ​ប្រមូលផ្តុំ​នៅក្នុង​ប្រទេស​ចំនួន​ប្រាំបី​។​

​ប្រទេស​ទាំងនោះ​រួមមាន​សាធារណរដ្ឋ​ប្រជាធិបតេយ្យ​កុង​ហ្គោ អេ​ហ្ស៊ី​ប អេត្យូ​ពី ឥណ្ឌា នី​ហ្សេ​រី​យ៉ា ប៉ា​គី​ស្ថាន ហ្វីលីពីន និង​តង់​ហ្សា​នី​៕

​ចំនួន​ប្រជាជន​ពិភពលោក​ត្រូវ​បាន​រំពឹងថា​នឹង​កើនឡើង​ដល់ ៨ ពាន់​លាន​នាក់​នៅ​ថ្ងៃទី ១៥ ខែវិច្ឆិកា​