​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សេត​វិមាន​បាន​និយាយ​កាលពី​ថ្ងៃ​ចន្ទ​ទី​១១​កក្កដា​ថា ខ្លួន​ជឿថា​រុស្ស៊ី​កំពុង​ងាក​ទៅរក​អ៊ីរ៉ង់​ដើម្បី​ផ្តល់​ឱ្យ​ខ្លួន​នូវ​យន្តហោះ​គ្មាន​មនុស្ស​បើក (UAV) “​រាប់រយ​គ្រឿង​” រួម​ទាំងដ្រូ​ន​ដែល​មាន​សមត្ថភាព​បំពាក់​អាវុធ​សម្រាប់​ប្រើប្រាស់​ក្នុង​សង្គ្រាម​ជា​បន្ត​នៅក្នុង​ប្រទេស​អ៊ុ​យក្រែន​។​

​ទីប្រឹក្សា​សន្តិសុខ​ជាតិ​អាម៉េរិក​លោក ជេ​ក ស៊ូ​ល​លី​វ៉ាន់ (Jake Sullivan) បាន​និយាយថា គេ​មិន​ច្បាស់​ទេ​ថា​តើ​អ៊ីរ៉ង់​បានផ្តល់​ប្រព័ន្ធដ្រូ​ន​ណាមួយ​ដល់​រុស្ស៊ី​រួច​ហើយ​ឬ​យ៉ាងណា ប៉ុន្តែ​បាន​និយាយថា សហរដ្ឋ​អាម៉េរិក​មាន “​ព័ត៌មាន​” ដែល​បង្ហាញ​ថា អ៊ីរ៉ង់​កំពុង​ត្រៀម​បណ្តុះបណ្តាល​ដល់​កងកម្លាំង​រុស្ស៊ី​ដើម្បី​ប្រើប្រាស់​ពួកវា​ឆាប់ៗ​ក្នុង​ខែ​នេះ​។​

​លោក​បាន​ប្រាប់​អ្នកយក​ព័ត៌មាន​កាលពី​ថ្ងៃ​ចន្ទ​ថា “​ព័ត៌មាន​របស់​យើង​បង្ហាញថា រដ្ឋាភិបាល​អ៊ីរ៉ង់​កំពុង​ត្រៀម​ផ្តល់​ឱ្យ​រុស្ស៊ី​នូវ UAV ជាច្រើន​រយ​គ្រឿង រួមទាំង UAV​ដែល​មាន​សមត្ថភាព​បំពាក់​អាវុធ​​នៅ​ពេលវេលា​កំណត់​ដ៏​ឆាប់រហ័ស​មួយ​”​។​

​លោក​ស៊ូ​ល​លី​វ៉ាន់​បាន​និយាយថា វា​គឺជា​ភស្តុតាង​បង្ហាញថា ការបាញ់​ផ្លោង​ដ៏​ច្រើន​លើសលប់​របស់​រុស្ស៊ី​នៅ​អ៊ុយ​ក្រែន​ដែល​នាំឱ្យខ្លួន​ពង្រឹង​ប្រៀប​ឈ្នះ​ខ្លាំង​ឡើង​នៅ​ភាគ​ខាងកើត​អ៊ុយ​ក្រែន​ក្នុង​ប៉ុន្មាន​​សប្តាហ៍​ថ្មីៗ​នេះ “​បាន​នាំមក​នូវ​ការខាតបង់​សម្រាប់​និរន្ត​ភាព​អាវុធ​របស់​ខ្លួន​”​។​

​ការ​លាតត្រដាង​របស់​លោក​ស៊ូ​ល​លី​វ៉ាន់​ធ្វើឡើង​នៅ​មុន​មួយ​ថ្ងៃ​នៃ​ការធ្វើដំណើរ​របស់​លោក​ប្រធានាធិបតី​ចូ បៃ​ដិន​ទៅកាន់​ប្រទេស​អ៊ីស្រាអែល និង​អា​រ៉ាប៊ីសាអូឌីត​កន្លែងដែ​ល​កម្មវិធី​នុយក្លេអ៊ែរ​​និង​សកម្មភាព​អាក្រក់ៗ​របស់​អ៊ីរ៉ង់​នៅក្នុង​តំបន់​នឹង​ក្លាយជា​ប្រធានបទ​សំខាន់​នៃ​ការពិភាក្សា​។​

​ការសម្រេចចិត្ត​របស់​សហរដ្ឋ​អាម៉េរិក​ដើម្បី​បង្ហាញ​ជា​សាធារណៈ​ថា គូប្រជែង​ថ្នាក់​តំបន់​របស់​ប្រទេស​ទាំង​ពីរ​កំពុង​ជួយ​ផ្តល់​អាវុធ​ដល់​រុស្ស៊ី​បាន​កើតឡើង​ខណៈ​ទាំង​អ៊ីស្រាអែល​និង​អា​រ៉ាប៊ីសាអូឌីត​​បាន​ជំទាស់​មិន​ចូលរួម​ក្នុង​កិច្ចខិតខំ​ប្រឹងប្រែង​ជា​សកល​ដើម្បី​ដាក់ទណ្ឌកម្ម​រុស្ស៊ី​ចំពោះ​ការ​លុកលុយ​លើ​អ៊ុ​យក្រែន ដោយសារ​តែ​ផលប្រយោជន៍​ក្នុងស្រុក​របស់​ពួកគេ​៕

​ទីប្រឹក្សា​សន្តិសុខ​ជាតិ​អាម៉េរិក​លោក ជេ​ក ស៊ូ​ល​លី​វ៉ាន់ ថ្លែង​ក្នុង​សន្និសីទកាសែត​នៅ​សេត​វិមាន​កាលពី​ថ្ងៃ​ចន្ទ ទី​១១ កក្កដា​ឆ្នាំ​២០២២​។​លោក​ថា​រុស្ស៊ី​កំពុង​ងាក​ទៅរក​អ៊ីរ៉ង់​ដើម្បី​ផ្តល់​ឱ្យ​ខ្លួន​នូវ​យន្តហោះ​​គ្មាន​មនុស្ស​បើក រាប់រយ​គ្រឿង​