ដោយ​៖ សុវណ្ណ​កុម្ភៈ / ភ្នំពេញ​៖ រដ្ឋមន្ត្រីក្រសួង​កីឡា និង​កិច្ចការ​យុវជន និង​ជា ប្រធាន​គណៈកម្មាធិការ​ជាតិ​អូឡាំពិក​មី​យ៉ាន់​ម៉ា លោក Minn Thein Zan បាន​សម្ដែង ការភ្ញាក់ផ្អើល និង​មោទនភាព ចំពោះ​ប្រទេស​កម្ពុជា ដែលមាន​ការអភិវឌ្ឍ និង​រីក ចម្រើន យ៉ាង​ឆាប់រហ័ស ជាក់ស្ដែង​ហេដ្ឋារចនាសម្ព័ន្ធ​កីឡា ដែលមាន​លក្ខណៈ ស្ដង់ដារ សម្រាប់​ត្រៀម​ធ្វើ​ម្ចាស់ផ្ទះ ព្រឹត្តិការណ៍​ស៊ី​ហ្គេម​-​អាស៊ាន​ប៉ា​រ៉ា​ហ្គេម ឆ្នាំ​២០២៣ ។​

​ការលើកឡើង​បែបនេះ បន្ទាប់​មន្ដ្រីជាន់ខ្ពស់​មី​យ៉ាន់​ម៉ា ខាងលើ និង​ប្រតិភូ ជា​សមាជិក ក្រុមប្រឹក្សា​សហព័ន្ធ​កីឡា​អាស៊ីអាគ្នេយ៍ និង​ក្រុមប្រឹក្សា​សហព័ន្ធ​កីឡា អាស៊ាន​ប៉ា​រ៉ា​ហ្គេម ១០ ប្រទេស​ផ្សេងទៀត បានធ្វើ​ដំណើរ​ទស្សនកិច្ច ហេ​ដ្ឋា​រចនា សម្ព័ន្ធ​កីឡា​កម្ពុជា រួមមាន ពហុ​កីឡដ្ឋាន​ជាតិ​(​ស្ដា​ត​អូឡាំពិក​) និង​ពហុ​កីឡដ្ឋាន ជាតិ​មរតក​តេ​ជោ​។​

​ក្រោយ​បញ្ចប់​ដំណើរ​ទស្សនកិច្ច នៅ​ពហុ​កីឡដ្ឋាន​ជាតិ​មរតក​តេ​ជោ នៅ​ល្ងាច ថ្ងៃទី​១១ កក្កដា ម្សិលមិញ លោក Minn Thein Zan បានបង្ហាញ​អារម្មណ៍ រំភើប​រីករាយ ជាមួយ​ភាព​រីកចម្រើន នៃ​ហេដ្ឋារចនាសម្ព័ន្ធ​កីឡា​របស់​កម្ពុជា មុន​ការប្រកួត​កីឡា​ស៊ី​ហ្គេម -​អាស៊ាន​ប៉ា​រ៉ា​ហ្គេម ឆ្នាំ​២០២៣ មកដល់​។​

​លោក​បាន​សរសើរ​កម្ពុ​ជា​ថាៈ ” ពិតជា​គួរ​ឲ្យ​រំភើបចិត្ត ចំពោះ​អគារ​ដ៏​ល្អ​កីឡដ្ឋាន ដ៏​ស្រស់ស្អាត ទីលាន​បាល់ទាត់​ដ៏​ស្រស់ស្អាត​។ កម្ពុជា​មានការ​រីកចម្រើន​ច្រើន ជា​ប្រទេស​ឆ្លាត​វៃ​។ ខ្ញុំ​ពិតជា​មាន​មោទកភាព ចំពោះ​ប្រទេស​របស់​នេះ​ណាស់ ” ។​

​លោក​បាន​បញ្ជាក់ថាៈ ” ខ្ញុំ​ទើបតែ​មកដល់​កម្ពុជា លើកដំបូង​។ កម្ពុ​ជាមាន​ការរីក ចម្រើន និង​រីកចម្រើន​យ៉ាងច្រើន ជាមួយនឹង​អគារ និង​ទីលាន​ប្រកួត​កីឡា​។ កម្ពុជា នឹង​អាចធ្វើ​ពិធី អបអរសាទរ​សម្រាប់​ស៊ី​ហ្គេម លើក​ទី​៣២ ដ៏​អស្ចារ្យ​។ យើង​បាន ត្រៀមខ្លួន​រួចរាល់ ក្នុងការ​រៀបចំ​អត្ត​ព​លិ​ក ដើម្បី​បញ្ជូនមក​ចូលរួម ការប្រកួត​កីឡា ស៊ី​ហ្គេម លើក​ទី​៣២ ហើយ​យើង​កំពុង​រៀបចំ​ព្រឹត្តិការណ៍​ជាច្រើន ដើម្បី​ចូលរួម ស៊ី​ហ្គេម​នៅ​កម្ពុជា​។​

​យើង​កម្ពុជា និង​មី​យ៉ាន់​ម៉ា ជា​ប្រទេស​ជិតស្និទ្ធ​នឹង​គ្នា​។ ដូច្នេះ​យើង​សប្បាយចិត្ត​ខ្លាំង​ ​ណាស់ នៅពេល​កម្ពុជា ទទួល​ធ្វើ​ម្ចាស់ផ្ទះ​ព្រឹត្តិការណ៍​នេះ​។ កម្ពុជា​បាន​រង់ចាំ​អស់ ៦៤​ឆ្នាំ ដើម្បី​រៀបចំ​ការប្រកួត​ស៊ី​ហ្គេម លើក​ទី​៣២ នេះដែរ​។ នេះហើយ​គឺជា​អ្វី ដែល​យើង​រីករាយ សម្រាប់​ប្រទេស និង​សម្រាប់​ប្រជាជន​កម្ពុជា ” ។​

​កិច្ចប្រជុំ​ក្រុមប្រឹក្សា​សហព័ន្ធ​កីឡា​អាស៊ាន​ប៉ា​រ៉ា​ហ្គេម​លើក​ទី​១ និង​ក្រុមប្រឹក្សា សហព័ន្ធ​កីឡា អាស៊ីអាគ្នេយ៍ លើក​ទី​២ នៅ​កម្ពុជា នឹងត្រូវ​រៀបចំ​រយៈពេល ៣​ថ្ងៃ ចាប់ពី​ថ្ងៃទី​១១​ដល់​១៣ ខែកក្កដា ឆ្នាំ​២០២២ នេះ​។ កិច្ចប្រជុំ​នេះ ត្រូវបាន​ចាត់ទុក ជា​កិច្ចប្រជុំ​ចុងក្រោយ​ក្នុងការ​អនុម័ត លើ​ការងារ​សំខាន់ៗ​មួយចំនួន ដូចជា​ការ កំណត់​ប្រភេទ​កីឡា ការលក់​សិទ្ធិ​ផ្សព្វផ្សាយ (​ទូរទស្សន៍​) និង​ការកែសម្រួល​ធម្មនុញ្ញ សហព័ន្ធ​កីឡា​អាស៊ីអាគ្នេយ៍​ជាដើម ដែលមាន​ប្រតិភូ និង​ភ្ញៀវ​អន្ដរជាតិ មកពី​បណ្ដា​សមាជិក ចូលរួម​សរុប​ប្រមាណ ២០០ នាក់​៕/V​-PC