ដោយៈ ទេ​ពក​ង្រី / កំពង់ឆ្នាំងៈ ក្រោយពី​មាន​សំណូមពរ ជា​ញឹកញាប់​របស់ ប្រជាពលរដ្ឋ រស់នៅ​ភូមិ​ដំណាក់​កំពូល សង្កាត់​កំពង់ឆ្នាំង ក្រុង​កំពង់ឆ្នាំង ស្ដីអំពី​សា្ថ​ន​ភាព​ជំនន់​ទឹកភ្លៀង បណ្ដាល​ឲ្យ​លិច​លំនៅឋាន និង​ផ្លូវ​ផង​នោះ នៅ​ព្រឹក​ថ្ងៃទី ១២ ខែកក្កដា ឆ្នាំ​២០២២ នេះ លោក យិន សា​វ៉េ​ន អភិបាល ក្រុង​កំពង់ឆ្នាំង រួម​នឹង​លោកស្រី កែវ សុផាត ចៅសង្កាត់​កំពង់ ឆ្នាំង ដឹកនាំ​ក្រុម ការងារ ដើម្បី​ប្រជុំ​សម្របសម្រួល ដើម្បី​ស្វែងរក​ដំណោះស្រាយ ជាមួយ​ប្រជា ពលរដ្ឋ ធ្វើយ៉ាងណា​រំដោះ​ទឹក​ចេញពី​ភូមិ ។​

​លោក​អភិបាលក្រុង​កំពង់ឆ្នាំង បានបញ្ជាក់​ថាៈ ដោយសារតែ​បងប្អូន​ប្រជាពលរដ្ឋ កន្លងទៅ ចាក់ដី​សាងសង់​លំនៅដ្ឋាន ដោយ​មិនបាន​រៀបចំ​ដាក់​ប្រព័ន្ធ​លូ​រំដោះ​ទឹក ឲ្យ​បាន​ត្រឹមត្រូវ តាម​បទដ្ឋាន​បច្ចេកទេស ទើប​ធ្វើឱ្យ​មានការ​ជន់​លិច​បែបនេះ​។

​លោក​អភិបាលក្រុង​កំពង់ឆ្នាំង ក៏បាន​បញ្ជាក់​ផងដែរ​ថាៈ ដើម្បី​រំដោះ​ទឹក​ចេញ ជូន​ប្រជាពលរដ្ឋ បាន លុះត្រា​តែមាន​ការកាយ ជា​ប្រឡាយ តាម​បណ្ដោយ​ផ្លូវ ហើយ ប្រជាពលរដ្ឋ​ដែល​រស់នៅ តាម​បណ្តោយ​ផ្លូវ ត្រូវ​ចូលរួមចំណែក ដាក់លូ នៅតាម​មុខផ្ទះ​រៀងៗ​ខ្លួន ប៉ុន្តែ​បងប្អូន ប្រជាពលរដ្ឋ ត្រូវ​ចូលរួម បដិភាគ ក្នុង​ការកាយ​ប្រឡាយ​បង្ហូរទឹក​ចេញ​ផងដែរ ។

​នៅក្នុង​ឱកាស​នោះ បងប្អូន​ប្រជាពលរដ្ឋ បាន​ស្ម័គ្រចិត្ត​បរិច្ចាគ​ថវិកា ដើម្បី​រួម ចំណែក​ក្នុង ការកាយ​រំដោះ​ទឹក​ចេញ​ផងដែរ​។

​គួរ​បញ្ជាក់ដែរថា ផ្លូវ​បឹង​ធំ ស្ថិតនៅ​ក្នុងភូមិ​ដំណាក់​ពពូល ដែល​កំពុង​រង​ការ​ខូច ខាត​នេះ បើ​យោងតាម​មន្ត្រី​ជំនាញ បាន​បញ្ជាក់ថា បាន​ជាប់កិច្ចសន្យា (​កុងត្រា​) ជាមួយ​អង្គការ​ចៃ​កា ទើប​អាជ្ញាធរ មិន​ហ៊ាន​ជួសជុល និង​កសាង​ផ្លូវ​នេះ​ឡើងវិញ ៕/V​-PC