​ដោយៈ ភ្នំ​ស្វាយ / បន្ទាយ​មាន​ជ័​យៈ ថ្នាក់ដឹកនាំ និង​សមាជិក​គណៈ​រដ្ឋបាល ខេត្តបន្ទាយមានជ័យ បាន​អញ្ជើញ​ទៅ​គោរព​វិញ្ញាណក្ខន្ធ លោក អា​បេ ស៊ីន​ហ្សូ អតីត​នាយករដ្ឋមន្ត្រី​ជប៉ុន នៅ​ការិយាល័យ​កុងស៊ុល​ជប៉ុន ប្រចាំខេត្ត​សៀមរាប នា​ព្រឹក​ថ្ងៃ​អង្គារ ទី​១២ ខែកក្កដា ឆ្នាំ​២០២២ នេះ​។​

​លោក ខេង ស៊ុម ប្រធាន​ក្រុមប្រឹក្សា​ខេត្ត និង​លោក អ៊ុំ រាត្រី អភិបាលខេត្ត​បន្ទាយមានជ័យ បាន​អញ្ជើញ​ដឹកនាំ​ប្រតិភូ​ខេត្ត ទៅ​គោរព​វិញ្ញាណក្ខន្ធ និង​ប្រគល់​សារ​រំលែក​ទុក្ខ​ដ៏​ក្រៀមក្រំ របស់​រដ្ឋបាលខេត្ត ជូន​លោក​ប្រធានការិយាល័យ​កុងស៊ុល​ជប៉ុន ប្រចាំខេត្ត​សៀមរាប​។​

​លោក អា​បេ ស៊ីន​ហ្សូ អតីត​នាយករដ្ឋមន្ត្រី​ជប៉ុន បានទទួល​មរណភាព ក្នុង​ជន្មាយុ ៦៧ ឆ្នាំ បន្ទាប់ពី​រង​ការបាញ់ប្រហារ ពី​ខ្មាន់កាំភ្លើង កាលពី​ថ្ងៃទី​៨ ខែកក្កដា ឆ្នាំ​២០២២ ក្នុងអំឡុងពេល​ថ្លែង​សង្កថា​ឃោសនាបោះឆ្នោត នៅលើ​ដងផ្លូវ​សាធារណៈ ក្នុង​ទីក្រុង​ណា​រ៉ា ភាគ​លិច​ប្រទេស​ជប៉ុន ។​

​រាជរដ្ឋាភិបាល និង​ប្រជាជន​កម្ពុជា ទើបតែ​បញ្ចប់​ការ​កាន់​មរណទុក្ខ​លោក អា​បេ សុ​ី​ន​ហ្សូ កាលពី​អាទិត្យ ថ្ងៃទី​១០ ខែកក្កដា ឆ្នាំ​២០២២ ព្រមទាំង​មានការ​បង្ហូតទង់ជាតិ ពាក់កណ្ដាល​ដង ផងដែរ​។​

​លោក អា​បេ សុ​ី​ន​ហ្សូ គឺជា​រដ្ឋបុរស​មួយរូប របស់​ប្រជាជន​ជប៉ុន ជា​ឥស្សរជន​មាន​ឥទ្ធិពល លើ​ពិភពលោក និង​ជា​មិត្តភក្ដិ​បរទេស​ដ៏​ស្និទ្ធស្នាល និង​ដ៏​ល្អ​របស់​រដ្ឋាភិបាល និង​ប្រជាជន​កម្ពុជា​។​

​លោក អ៊ុំ រាត្រី អភិបាលខេត្ត​បន្ទាយមានជ័យ ផ្ញើ​សារ​គោរព​ជូន​លោក​ប្រធានការិយាល័យ កុងស៊ុល​ជប៉ុន ប្រចាំ​ក្រុង​សៀមរាប ដើម្បី​ចូលរួម​រំលែក​ទុក្ខ និង​សោកស្តាយ​យ៉ាង​ក្រៀមក្រំ ចំពោះ​មរណភាព អតីត​នាយករដ្ឋមន្ត្រី​ជប៉ុន លោក អា​បេ សិន​ហ្សូ ៕/V​