ដោយៈសុផល/ភ្នំពេញ​៖​យោងតាម​របាយការណ៍​កិច្ចប្រជុំ​ប្រចាំត្រីមាស​ទី​៣​ឆ្នាំ​២០២២ នៃ​គណ​:​កម្ម​ការតម្រង់ទិស​ស​ម្រា​ប់​ការសាង​សង់អាកាសយានដ្ឋាន​អន្តរជាតិ សៀមរាប​-​អង្គរ បានបង្ហាញថាគម្រោង​សាងសង់​អាកាសយានដ្ឋាន​ថ្មី​នេះ​បន្តបោះជំហាន​ទៅមុខ​ឥតឈប់ឈរ និង​សម្រេចបាន​ជិត​៣៤​ភាគរយ​នៃ​គម្រោង​ទាំងមូលគិត​ត្រឹម​ដំណាច់ត្រីមាស​ទី​២​ឆ្នាំ​២០២២​នេះ ។​ប៉ុន្តែ​ក្នុងនោះ ផ្នែក​មួយចំនួន​មាន​វឌ្ឍនភាព​ច្រើន ដូចជា អនុ​ស្ថានីយ​ផ្គត់ផ្គង់​អគ្គិសនី ស្ថានីយ​ស្តុក​ប្រេង​ឥន្ទ​ន​: អគារ​បញ្ជា​ផ្លូវ​ហោះហើរ​ផ្លូវ​រត់ និង​ផ្លូ​របរ​យន្តហោះ សម្រេចបាន​លើសពី​៧០​ភាគរយ​។

​នៅក្នុង​កិច្ចប្រជុំ​កាលពី​ថ្ងៃទី​១១​ខែកក្កដា​ឆ្នាំ​២០២២​ម្សិលមិញ​របាយការណ៍ខាងលើបាន​បង្ហាញថា ក្រុមហ៊ុនអនុវត្ត​គម្រោង (AIAI) បានដាក់​ផែនការ​សម្រេច​ឱ្យបាន​៥០​ភាគរយ​នៃ​គម្រោង​ទាំងមូល​នៅ​ដំណាច់ត្រីមាស​ទី​៣ និង​៧០ ភាគរយ​នៅ​ដំណាច់ឆ្នាំ​២០២២​នេះ​។ ក្រុមហ៊ុន​គ្រោង​នឹង​បញ្ចប់​ការសាងសង់​អាកាសយាន​ដ្ឋា​ន​នៅ​ខែមីនា​ឆ្នាំក្រោយ ដើម្បី​ធ្វើតេស្ត​ប្រតិបត្តិការ​និង​ស្នើសុំ​វិញ្ញាបណ្ណបត្រ​ចាំបាច់​នានា​។​បន្ទាប់មក​គ្រោង​នឹងដាក់​ឱ្យ​ដំណើការ​អាកាសយានដ្ឋាន​ថ្មី​នេះនៅ​ខែតុលា ឆ្នាំ​២០២៣​។

​ប្រភពព័ត៌មាន​ពី​មន្រ្តី​បានឱ្យដឹងថា ក្នុង​កិច្ចប្រជុំ​នេះ​លោក តឹក​រ៉េត សំរេច ប្រធាន​គណ​:​កម្ម​ការតម្រង់ទិស​ស​ម្រា​ប់​ការ សាងសង់​អាកាសយានដ្ឋាន​អន្តរជាតិ​សៀមរាប​-​អង្គរ បាន​ថ្លែងអំណរគុណ​យ៉ាង​ជ្រាលជ្រៅ​ចំពោះលោក លោកស្រី ជា​ថ្នាក់ដឹកនាំ និង​សមាជិក សមាជិកានៃ​គណ​:​កម្ម​ការតម្រង់ទិស​ដែល​តំណាង​​ឱ្យ​គ្រប់​ក្រសួង ស្ថាប័ន​ពាក់ព័ន្ធ ទាំងអស់​សម្រាប់​កិច្ចសហការ​ជិតស្និទ្ធ​និង​ការគាំទ្រ​យ៉ាងសកម្ម​ដល់​គម្រោង​នេះ​និង​ការចូលរួម​ចុះ​ត្រួតពិនិត្យ​ការអនុវត្ត​គម្រោង​ជាមួយគ្នា​តាំងពី​ដំបូង​មកព្រមទាំង​បាន​វាយតម្លៃ​ខ្ពស់​ចំពោះ​​ក្រុមហ៊ុន​អនុវត្ត​គម្រោង ដែល​តែងតែ​ខិតខំ​ប្រឹងប្រែង​អនុវត្ត​ការងារយ៉ាងសកម្ម​ទោះ​ជួប​ឧបសគ្គ​និង​បញ្ហា​ប្រឈម​មួយចំនួន​ក្តី​ដើម្បី​ឈានទៅ​សម្រេច​ឱ្យបាន​ជោគជ័យ​តាម​កាលកំណត់​នូវ​គម្រោង​ដ៏​ធំ​មួយ​នេះ​។​

​គួររំលឹកដែរថា ទាក់ទងនឹងការដ្ឋានដ៏ធំនេះ កាល​ព្រឹក​ថ្ងៃទី​៣ ខែមេសា​​កន្លងទៅនេះ​សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​បាន​អញ្ជើញ​ចុះ​ពិនិត្យ​ការដ្ឋាន​សាងសង់​អាកាសយានដ្ឋាន​អន្តរជាតិ​សៀមរាប​-​អង្គរ ដែល​គ្រោង​ប្រើប្រាស់​ថវិកា​ប្រមាណ​៨៨០ លាន​ដុល្លារ​និង​ត្រូវបាន​សាងសង់​លើ​ផ្ទៃដី ៧៥០ ហិកតា​ដែល​ស្ថិតនៅក្នុង​ឃុំ​តា​យ៉ែ​ក ស្រុក​សូទ្រ​និគមខេត្តសៀមរាប ។​

​កាលណោះ​លោក តឹក​រ៉េត សំរេច រដ្ឋមន្ត្រី​ប្រតិភូ​អម​នាយករដ្ឋមន្ត្រី​រដ្ឋ​លេខាធិការ​ទីស្តីការគណៈរដ្ឋមន្ត្រី​និង​ជា​ប្រធាន​គណៈកម្មការ​តម្រង់ ទិស​សម្រាប់​ការសាងសង់​អាកាសយាន​ដ្ឋា​ន​អន្តរជាតិ​សៀមរាប​-​អង្គរ បានគោរពរាយការណ៍ជូនសម្តេចតេជោ ហ៊ុន សែន ​ថា នៅ​ថ្ងៃទី​១៣ ខែតុលា ឆ្នាំ​២០១៦​កិច្ចព្រមព្រៀង​សម្បទាន​អភិវឌ្ឍន៍អាកាស យានដ្ឋាន​អន្តរជាតិ​សៀមរាប​-​អង្គរ ត្រូវបាន​ចុះហត្ថលេខា​នៅ​រាជធានី​ភ្នំពេញ រវាង​រាជរដ្ឋាភិបាល​កម្ពុជា​តំណាង​ដោយ​សម្តេច​វិបុល​បញ្ញា​សុខ​អាន​និង​តំណាង​ក្រុមហ៊ុន Angkor Internatio nal Airport Investment (Cambo dia) Co., Ltd. ហៅ​កាត់​ថា​ក្រុមហ៊ុន AIAI ក្រោម​អធិបតីភាព​ដ៏​ខ្ពង់ខ្ពស់​របស់​សម្តេច​តេ​ជោ​នាយក​រដ្ឋ​មន្តី​និង​ឯកឧត្តម ស៊ី ជីន​ភីង ប្រធានាធិបតី​នៃ​សាធារណរដ្ឋ​ប្រជាមានិត​ចិន​ដោយ​ផ្តល់​សម្បទាន​រយៈពេល ៥៥​ឆ្នាំ ក្នុងនោះ​រយៈពេល​៥​ឆ្នាំ​សម្រាប់​ការ​សាង សង់ និង​រយៈពេល​៥០​ឆ្នាំ​សម្រាប់​ការធ្វើ​អាជីវកម្ម​ក្រោម​ទម្រង់ BOT (​សាង សង់​-​អាជីវកម្ម​-​និង​ផ្ទេរ​)​។​

​លោក តឹក រ៉េត​សំរេច បាន​ឲ្យ​ដឹង​ទៀតថា គម្រោង​អភិវឌ្ឍ​អាកាសយានដ្ឋាន​អនុវត្ត​ដោយ​ក្រុមហ៊ុន AIAI គឺជា​កា​រវិ​និ យោគ​រួមគ្នា​នៃ​ក្រុមហ៊ុន​ចំនួន​៣ ៖ ក្រុម ហ៊ុន​វិនិយោគ​យូ​ណាន (Yunnan Investment Group)​ទទួល​គ្រប់ គ្រង និង​អនុវត្ត​គម្រោង​ទូទៅ ក្រុម ហ៊ុន​សំណង់​យូ​ណាន (Yunnan Cons truction Group)​ទទួលខុសត្រូវ​សាងសង់​និ​ក្រុមហ៊ុន​ប្រតិបត្តិការ អាកាសយានដ្ឋាន​យូ​ណាន ( Yunnan Airport Group) ទទួលខុសត្រូវ​ប្រតិបត្តិ​ការដែល​ក្រុមហ៊ុន​ទាំងបី​នេះ​ជា​ក្រុមហ៊ុន​រដ្ឋ​ចិន​នៃ​ខេត្ត​យូ​ណាន​។​

​គួរបញ្ជាក់ថា  អាកាសយានដ្ឋាន​អន្តរជាតិ​សៀម រាប​-​អង្គរ គឺជា​អាកាសយានដ្ឋាន​អន្តរជាតិ​លំដាប់ 4E ជាមួយ​ផ្លូវ​រត់​ប្រវែង ៣.៦០០​ម៉ែត្រ មាន​សមត្ថភាព​ឱ្យ​យន្តហោះ​គ្រប់​ប្រភេទ​អាច​ចុះចត​បាន​ដោយ​បំពាក់​បច្ចេក វិទ្យា​ថ្មី​បំផុត សម្រាប់​សុវត្ថិភាព និង​សន្តិសុខ​ដល់​អ្នកដំណើរ​។ គម្រោង​សាងសង់​អាកាស យានដ្ឋាន​អន្តរជាតិ​សៀមរាប​-​អង្គរ តតាំង​នៅលើ​ផ្ទៃដី​ទំហំ​៧០០​ហិកតា ស្ថិតក្នុង​ភូមិ​កៀល​ពង ឃុំ​ពពេល និង​ភូមិ​ប្រវាល ឃុំ​តា​យ៉​ក ស្រុក​សូទ្រនិគម ខេត្តសៀមរាប ចម្ងាយ​ប្រហែល​៤០ គីឡូម៉ែត្រពី​រមណីយដ្ឋាន​អង្គរ​និង​ប្រហែល​៥០ គីឡូម៉ែត្រ​ពី​ទីប្រជុំជន​ក្រុង​សៀមរាប ដែលមាន​ចម្ងាយ​ឆ្ងាយ​មិន​ប៉ះពាល់​ដល់​តំបន់​ការពារ​បេតិកភណ្ឌ​ទៀត​ទេ​។​នៅពេល​ដាក់ឱ្យ​ដំណើរ​ការដែល​គ្រោង​ធ្វើ​នៅ​ខែតុលា ឆ្នាំ​២០២៣ នេះ​អាកាសយានដ្ឋាន​នេះ​មាន​សមត្ថភាព​ទទួល​អ្ន​ក​ដំណើរ​ប្រមាណ​៧​លាន​នាក់​ក្នុង​មួយឆ្នាំ​។ ក្នុងដំណាក់កាល​ទី​២​ពង្រីក​ដល់​១០​លាន​នាក់ និង ដំណាក់កាល​ទី​៣​ពង្រីក​ដល់​២០​លាន​នាក់ ទៅតាម​ដំណាក់កាល​នៃ​តម្រូវការ​ជាក់ស្តែង​។​

​អាកាសយានដ្ឋាន​អន្តរជាតិ​សៀមរាប​-​អង្គរ នេះ​គឺជា​សមិទ្ធផល​ថ្មី​មួយទៀត ដែល​នឹងចូលរួម​យ៉ាងសំខាន់​ក្នុងការ​អភិវឌ្ឍ​សេដ្ឋ កិច្ច​កម្ពុជា​នៅពេល​អនាគត​ជាពិសេស​នឹង​ផ្តល់​អត្ថប្រយោជន៍ ដល់​បងប្អូន​ប្រជា​ពល រដ្ឋ​ក្នុង​តំបន់​ជុំវិញ ដែល​សមិទ្ធផល​នេះ​កើតចេញពី​ការ ដឹកនាំ​ប្រកបដោយ​គតិបណ្ឌិត​ទឹកចិត្ត​ស្នេហា​ជាតិ មាតុភូមិ និង​ប្រជាជន ប្រក ប​ដោយ​បញ្ញាញាណ​ដ៏​ឈ្លាសវៃ​របស់ សម្ដេច​តេ​ជោ​នាយករដ្ឋមន្ត្រី​ដែលជា​បិតា​ស្ថាបនិក និង​ជា​និមិត្តរូប​នៃ​សុខសន្តិភាព​៕សរន

លោកតឹក​រ៉េត សំរេច ប្រធាន​គណ​:​កម្ម​ការតម្រង់ទិស​ស​ម្រា​ប់​ការ សាងសង់​អាកាសយានដ្ឋាន​អន្តរជាតិ​សៀមរាប​-​អង្គរអញ្ជើញពិនិត្យវឌ្ឍនភាពការសាងសង់អាកាសយានដ្ឋានអន្តរជាតិសៀមរាប អង្គរកាលពីពេលកន្លងទៅនេះ(រូបថតត្រុមការងារ)

លោកតឹក​រ៉េត សំរេច ប្រធាន​គណ​:​កម្ម​ការតម្រង់ទិស​ស​ម្រា​ប់​ការ សាងសង់​អាកាសយានដ្ឋាន​អន្តរជាតិ​សៀមរាប​-​អង្គរអញ្ជើញពិនិត្យវឌ្ឍនភាពការសាងសង់អាកាសយានដ្ឋានអន្តរជាតិសៀមរាប អង្គរកាលពីពេលកន្លងទៅនេះ(រូបថតក្រុមការងារ)

គំរូប្លង់គម្រោង​សាងសង់​អាកាសយានដ្ឋាន​អន្តរជាតិ​សៀមរាប​-​អង្គរ ​(រូបថតឯកសារ)