​ដោយៈ មុនីរ័ត្ន / ភ្នំពេញៈ បញ្ហា​មួយចំនួន​ដែល​ទាក់ទង​នឹង​ផលប្រយោជន៍ និង​កង្វល់​រួម និង​ទំនាក់ទំនង​ពាណិជ្ជកម្ម រវាង​ប្រទេស​ម្ពុ​ជា និង​សហរដ្ឋអាមេរិក រួមទាំង​ការពង្រឹង​និង​ពង្រីក កិច្ចសហប្រតិបត្តិការ និង​បញ្ហាសំខាន់ៗ មួយចំនួនទៀត ត្រូវបាន​លើកយក​មក​ពិភាក្សា នៅក្នុង​ជំនួប​រវាង​លោក ឧបនាយករដ្ឋមន្ត្រី ប្រាក់ សុខុន ជាមួយ​លោក ដា​នី​ញ៉ែ​ល ជេ​. ក្រី​ត​ថេ​ន​ប្រ៊ី​ង្គ ឧបការី​រដ្ឋមន្ត្រីការបរទេស សហរដ្ឋអាមេរិក ទទួលបន្ទុក​កិច្ចការ​អាស៊ី​បូព៌ា និង​ប៉ាស៊ីហ្វិក កាលពី​រសៀល​ថ្ងៃទី​១២ ខែកក្កដា ឆ្នាំ​២០២២ នេះ នៅ​ទីស្តីការ​ក្រសួងការបរទេស​កម្ពុជា​។​

​លោក ឧបនាយករដ្ឋមន្ត្រី ប្រាក់ សុខុន បាន​សម្តែង​នូវ​ការរីករាយ ដែល​បាន​ជួប​លោក ដា​នី​ញ៉ែ​ល ជេ​. ក្រី​ត​ថេ​ន​ប្រ៊ី​ង្គ ឧបការី​រដ្ឋមន្ត្រីការបរទេស​សហរដ្ឋអាមេរិក ទទួលបន្ទុក​កិច្ចការ អាស៊ី​បូព៌ា និង​ប៉ាស៊ីហ្វិក នៅថ្ងៃនេះ​។​

​លោក​ឧបនាយករដ្ឋមន្ត្រី ប្រាក់ សុខុន បានបញ្ជាក់​ថាៈ “ យើង​បាន​ពិភាក្សា​អំពី​បញ្ហា​មួយចំនួន ដែល​ទាក់ទង​នឹង​ផលប្រយោជន៍ និង​កង្វល់​រួម ព្រមទាំង​ពេញចិត្ត​លើ​ការរីកលូតលាស់ ឡើងវិញ នៃ​ទំនាក់ទំនង​ពាណិជ្ជកម្ម គិត​ចាប់​តាំងពីដើម​ឆ្នាំនេះ ក្រោយ​ជំងឺ​រាតត្បាត កូ​វីដ​-១៩​។ ខ្ញុំ​ទន្ទឹងរង់ចាំ​ទទួល​ស្វាគមន៍ គណៈប្រតិភូ​សហរដ្ឋអាមេរិក ដើម្បី​ចូលរួម​កិច្ចប្រជុំ រដ្ឋមន្ត្រីការបរទេស​អាស៊ាន លើក​ទី​៥៥ នៅ​ប៉ុន្មាន​សប្តាហ៍ ខាងមុខនេះ ”​។​

​លោក ដា​នី​ញ៉ែ​ល ជេ​. ក្រី​ត​ថេ​ន​ប្រ៊ី​ង្គ បានធ្វើ​ដំណើរ​មកកាន់​ប្រទេស​កម្ពុជា និង​ទីក្រុង​តូ​ក្យូ ប្រទេស​ជប៉ុន ចាប់ពី​ថ្ងៃទី ១១ ដល់ ១៥ ខែកក្កដា ឆ្នាំ​២០២២​។ តាម​កម្មវិធី​ដែល​បាន គ្រោងទុក លោក ដា​នី​ញ៉ែ​ល ជេ​. ក្រី​ត​ថេ​ន​ប្រ៊ី​ង្គ នឹង​អញ្ជើញ​ទៅ​ទស្សនកិច្ច នៅ​សារមន្ទីរ​ជាតិ នា​រសៀល​ថ្ងៃទី​១៣ ខែកក្កដា ឆ្នាំ​២០២២​។​

​សូមជម្រាបថា ដា​នី​ញ៉ែ​ល ជេ​.​ក្រី​ត​ថេ​ន​ប្រ៊ី​ង្គ ឧបការី​រដ្ឋមន្ត្រីក្រសួង​ការបរទេស សហរដ្ឋអាមេរិក សម្រាប់​កិច្ចការ​តំបន់​អាស៊ី​បូព៌ា និង​ប៉ាស៊ីហ្វិក ធ្លាប់បាន​ធ្វើដំណើរ​មក ប្រទេស​កម្ពុជា និង​ឡាវ កាលពី​ថ្ងៃទី ១ ដល់​ថ្ងៃទី ៧ ខែឧសភា ឆ្នាំ​២០២២ កន្លងទៅនេះ​។ ទស្សនកិច្ច​កាលនោះ ផ្តោតលើ​ការប្តេជ្ញាចិត្ត​របស់​សហ​រដ្ឋ​អាមេរិក ចំពោះ​ប្រទេស​ក្មេង​ជាងគេ និង​មាន​ភាពរស់រវើក​បំផុត នៅក្នុង​តំបន់​នេះ ដោយ​ពង្រឹង​បន្ថែម នូវ​ម​ជ្ឈ​ភាព​អាស៊ាន ភាពជា​ដៃគូ រវាង​សហរដ្ឋអាមេរិក និង​តំបន់​ទន្លេមេគង្គ ដើម្បី​ដោះស្រាយ​បញ្ហា​ប្រឈម​ឆ្លងដែន និង​ជំរុញ​ឲ្យ​អនុតំបន់​ទន្លេមេគង្គ មាន​វិបុលភាព ភាព​បើកចំហ និង​សន្តិសុខ​ច្រើន​ថែមទៀត​។​

​សម្រាប់​ទស្សនកិច្ច នៅ​ប្រទេស​កម្ពុជា នាពេលនោះ ឧបការី​រដ្ឋមន្ត្រីក្រសួង​ការបរទេស សហរដ្ឋអាមេរិក បាន​ជួប​ជាមួយ​លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រី​ក្រសួងការបរទេស និង​មន្ត្រីជាន់ខ្ពស់​ដទៃទៀត ព្រមទាំង​យុវជន និង​ថ្នាក់ដឹកនាំ សង្គម​ស៊ីវិល ដើម្បី​ពិភាក្សា​ពី​ទំនាក់ទំនង​ទ្វេភាគី និង​ការគាំទ្រ​របស់​អាមេរិក សម្រាប់​កម្ពុជា ក្នុងនាម​ជា​ម្ចាស់ផ្ទះ​កិច្ចប្រជុំ​អាស៊ាន​៕/V​