ដោយ: សុក្ខារិន / ពោធិសាត់: អាជ្ញាធរមានសមត្ថកិច្ចនៃស្រុកវាលវែង បានផ្ដល់ព័ត៌មានបឋមថា: ការធ្វើដំណើរឆ្លងកាត់ភ្នំ ១៥០០ លើកំណាត់ផ្លូវជាតិលេខ៥៥ ត្រង់ចន្លោះគីឡូម៉ែត្រលេខ ១៤១និង១៤២ បានត្រូវផ្អាកបណ្ដោះអាសន្ន នៅវេលាម៉ោង ៨ យប់ថ្ងៃទី១២ ខែកក្កដា ឆ្នាំ២០២២ ដោយសារតែមានដីភ្នំ បាក់ធ្លាក់គ្របជិតលើផ្លូវ ត្រង់ចំណុចនោះក្នុងអំឡុងពេល ភ្លៀងបានកំពុងធ្លាក់ខ្លាំង ។

ប្រភពដដែល បានឱ្យដឹងថា: ផ្លូវនេះ ជាច្រកចេញចូលព្រំដែន រវាងប្រទេសកម្ពុជា និងថៃ ហើយខណ:ពេលនេះ ភ្លៀងបានកំពុងធ្លាក់ខ្លាំង ហើយរថយន្តគ្រប់ប្រភេទ ត្រូវបានជាប់គាំង មិនអាចធ្វើដំណើរឆ្លងកាត់បានឡើយ។ ដូច្នេះ បងប្អូនប្រជាពលរដ្ឋ សូមមេត្តាជ្រាបជាដំណឹង និងមានការប្រុងប្រយ័ត្ន។

សមត្ថកិច្ចស្រុកវាលវែង បានឱ្យដឹងទៀតថា: ពេលនេះរដ្ឋបាលស្រុក និងកម្លាំងមានសមត្ថកិច្ច កំពុងធ្វើសកម្មភាព យកគ្រឿងចក្រឈូសឆាយទាំងយប់ បើទោះបី ភ្លៀងបន្តធ្លាក់ខ្លាំង យ៉ាងណាក៏ដោយ គឺត្រូវធ្វើឱ្យបាន ដើម្បីសម្រួលការធ្វើចរាចរណ៍ ទៅមករបស់បងប្អូនប្រជាពលរដ្ឋ ឱ្យដំណើរការឡើងវិញ៕/V