ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ៊ុយ​ក្រែន​បាន​និយាយ​កាលពី​ថ្ងៃ​អង្គារ​ទី​១២​កក្កដា​ថា​ខ្លួន​បាន​ធ្វើ​ការវាយប្រហារ​ដោយ​គ្រាប់​រ៉ុក្កែត​រយៈ​ចម្ងាយ​ឆ្ងាយ​ប្រឆាំង​នឹង​កងកម្លាំង​និង​ឧបករណ៍​​យោធា​របស់​រុស្ស៊ី​នៅ​ភាគខាងត្បូង​អ៊ុ​យក្រែន ជា​ទឹកដី​ដែល​ខ្លួន​និយាយថា​ខ្លួន​គ្រោង​នឹង​វាយ​យក​មក​វិញ​នៅក្នុង​ការ​វាយបក​ដោយ​ប្រើប្រាស់​កងទ័ព​រាប់សែន​នាក់​។​

​យោធា​អ៊ុយ​ក្រែន​បាន​និយាយថា ការវាយប្រហារ​នេះ​បាន​វាយ​ចំ​ឃ្លាំង​គ្រាប់​នៅ​ក្នុង​ទីប្រជុំជន​ណូ​វ៉ា​កាខូ​វកា (Nova Kakhovka) ក្នុង​តំបន់​ឃើ​សិន (Kherson) ហើយ​បាន​សម្លាប់​មនុស្ស ៥២ នាក់​។ រឿង​នេះ​កើតឡើង​បន្ទាប់​ពី​ទីក្រុង​វ៉ាស៊ីនតោន​បាន​ផ្គត់ផ្គង់​អ៊ុយ​ក្រែន​ជាមួយនឹង​ប្រព័ន្ធ​កាំភ្លើង​ធំ​ចល័ត HIMARS ដ៏​ទំនើប​ដែល​ទីក្រុង​គៀវ​និយាយ​ថា​កងកម្លាំងរ​បស់​ខ្លួន​កំពុង​ប្រើប្រាស់​វា​ជាមួយនឹង​
​ប្រសិទ្ធភាព​ខ្ពស់​។​

​អាជ្ញាធរ​ទីក្រុង​ឃើ​សិន​ដែល​បន្តុប​ដោយ​រុស្ស៊ី​បាន​ផ្តល់​ព័ត៌មាន​ផ្សេង​នៃ​ព្រឹត្តិការណ៍​នេះ​។ ទីភ្នាក់ងារ​សារព័ត៌មាន TASS របស់​រុស្ស៊ី​បាន​រាយការណ៍​ថា ពួកគេ​បាន​និយាយ​ថា​យ៉ាងហោច​ណាស់​មនុស្ស​ប្រាំពីរ​​នាក់​ត្រូវបាន​សម្លាប់​នៅក្នុង​ការវាយប្រហារ និង​ប្រហែល ៧០ នាក់​បាន​រងរបួស​។ មន្ត្រី​ដែល​គាំទ្រ​ដោយ​រុស្ស៊ី​នៅ​ទីក្រុង​ឃើ​សិន​បាន​និយាយថា មនុស្ស​យ៉ាង​ហោច​ណាស់​ប្រាំពីរ​នាក់​ត្រូវបាន​សម្លាប់​ហើយ​​ជន​ស៊ីវិល​និង​ហេដ្ឋារចនាសម្ព័ន្ធ​ស៊ីវិល​ត្រូវ​បាន​វាយប្រហារ​។​

​ទីភ្នាក់ងារ​សារព័ត៌មាន​រ៉​យ​ទ័រ​មិនអាច​ផ្ទៀងផ្ទាត់​ភស្តុតាង​សមរ​ភូមិ​ណាមួយ​ដោយ​ឯករាជ្យ​បាន​ទេ​។​

​តំបន់ ដែល​អ៊ុយ​ក្រែន​វាយ​ប្រហារនោះ គឺជា​តំបន់​មួយ​ដែល​រុស្ស៊ី​ដណ្តើម​បាន​បន្ទាប់ពី​បាន​បើក​នូវ​អ្វី​ដែល​ទីក្រុង​មូ​ស្គូ​ហៅថា “​ប្រតិបត្តិការ​យោធា​ពិសេស​”​នៅ​ថ្ងៃទី​២៤​កុម្ភៈ​នៅក្នុង​អតីត​ប្រទេសជិតខាង​​សូ​វៀត​របស់ខ្លួន​និង​ជា​តំបន់​មាន​សារៈសំខាន់​ជា​យុទ្ធសាស្ត្រ​ជាមួយនឹង​ការចូល​ទៅ​កាន់​សមុទ្រ​ខ្មៅ​ដែល​ធ្លាប់​ជា​តំបន់កសិឧស្សាហកម្ម​ដ៏​រីកចម្រើន​និង​ជា​ទីតាំង​មួយ​នៅ​កៀក​ភាគ​ខាងជើង​នៃ​ឧបទ្វីប​​គ្រីមេ​កាត់យក​ដោយ​រុស្ស៊ី​។​

​មន្ត្រី​រដ្ឋាភិបាល​អ៊ុយ​ក្រែន​បាន​និយាយ​អំពី​កិច្ច​ខិតខំ​ប្រឹងប្រែង​ដើម្បី​កេណ្ឌ​ទាហាន​រហូត​ដល់​មួយ​លាន​នាក់ និង​គោលបំណង​វាយ​ដណ្តើម​យក​មក​វិញ​នូវ​ផ្នែក​ភាគខាងត្បូង​នៃ​ប្រទេស​ដែល​ឥឡូវ​ស្ថិត​​ក្រោម​ការគ្រប់គ្រង​របស់​រុស្ស៊ី​។​

​ទីបញ្ជាការ​យោធា​ភាគខាងត្បូង​របស់​អ៊ុយ​ក្រែន​បាន​និយាយ​នៅក្នុង​សេចក្តីថ្លែងការណ៍​ថា “​ផ្អែក​លើ​លទ្ធផល​នៃ​អង្គភាព​រ៉ុក្កែត​និង​កាំភ្លើង​ធំ​របស់​យើង ស​ត្រូវបាន​បាត់បង់​មនុស្ស​ចំនួន​៥២​នាក់ កាំភ្លើង​ធំ Msta-B​មួយ កាំភ្លើងត្បាល់​មួយ និង​រថពាសដែក​ចំនួន ៧ គ្រឿង និង​រថយន្ត​ផ្សេងទៀត ព្រមទាំង​ឃ្លាំង​គ្រាប់​នៅ​ណូ​វ៉ា​កាខូ​វកា​”​។

​វីដេអូ​មិនទាន់​ផ្ទៀងផ្ទាត់​មួយ​ដែល​បង្ហោះ​នៅលើ​បណ្តាញ​សង្គម​បានបង្ហាញ​ផ្សែង​និង​ផ្កាភ្លើង បន្ទាប់​មក​ដុំ​ភ្លើង​ដ៏​ធំ​បាន​ផ្ទុះ​ឡើង​លើ​មេឃ​នៅពេល​យប់​។​រូបភាព​ដែល​ចេញ​ផ្សាយ​ដោយ​ប្រព័ន្ធ​ផ្សព្វផ្សាយ​​រដ្ឋ​របស់​រុស្ស៊ី​បាន​បង្ហាញ​ឱ្យឃើញ​នូវ​វាល​រហោស្ថាន​ដែល​គ្របដណ្តប់​ដោយ​កម្ទេច​ថ្ម​និង​សំណល់​អគារ​។​

​មន្ត្រី​ម្នាក់​មក​ពី​រដ្ឋបាល​មូលដ្ឋាន​ដែល​គាំទ្រ​ដោយ​រុស្ស៊ី​បាន​និយាយថា អ៊ុយ​ក្រែន​បាន​ប្រើប្រាស់​មី​ស៊ី​ល HIMARS ហើយ​ថា​ពួកគេ​បាន​បំផ្លាញ​ឃ្លាំង​ផ្ទុក​សារធាតុ Saltpetre​ដែល​ជា​សមាសធាតុ​គីមី​​អាច​ប្រើ​សម្រាប់​ធ្វើ​ជីរ​ឬ​រំសេវ​កាំភ្លើង​។ បន្ទាប់មក ការផ្ទុះ​ដ៏​ធំ​មួយ​បាន​កើតឡើង​។ ទីភ្នាក់ងារ​ព័ត៌មាន TASS របស់​រុស្ស៊ី​បាន​រាយការណ៍​ក្រោយ​មក​ថា ភ្លើង​ត្រូវ​បាន​ពន្លត់​។​

​ក្រសួងការពារជាតិ​អ៊ុយ​ក្រែន​មិន​បាន​ឆ្លើយតប​ភ្លាមៗ​ចំពោះ​សំណើសុំ​ការបំភ្លឺ​អំពី​ប្រភេទ​អាវុធ​ដែល​បាន​ប្រើប្រាស់​នោះ​ទេ​។​

​លោក វ្ល៉ា​ឌី​មៀ លី​អូន​យ៉េវ (Vladimir Leontyev)​ប្រធាន​រដ្ឋបាល​យោធា​-​ស៊ីវិល​ស្រុក​កា​ខូវ​កា (Kakhovka) ដែល​បន្តុប​ដោយ​រុស្ស៊ី ត្រូវបាន​ដកស្រង់​សម្តី​ដោយ TASS យ៉ាង​ដូច្នេះ​ថា​”​នៅ​​មាន​មនុស្ស​ជាច្រើន​នៅ​ក្រោម​គំនរ​បាក់បែក​។ អ្នករងរបួស​កំពុង​ត្រូវបាន​បញ្ជូន​ទៅ​មន្ទីរពេទ្យ ប៉ុន្តែ​មនុស្ស​ជាច្រើន​ត្រូវ​ជាប់គាំង​នៅក្នុង​ផ្ទះល្វែង​និង​ផ្ទះ​របស់​ពួកគេ​”​។ លោក​បន្តថា ឃ្លាំង ហាង​ទំនិញ ឱសថ​ស្ថាន ស្ថានីយប្រេងឥន្ធនៈ និង​ព្រះវិហារ​បាន​រង​គ្រាប់ផ្លោង​៕

អ៊ុយ​ក្រែន​អះអាង​ថា​ខ្លួនប្រើរ៉ុក្កែតដែលអាម៉េរិកផ្តល់អោយដើម្បីវាយប្រហា​រ​លើ​ទីក្រុង​ឃើ​សិន​សម្លាប់​សត្រូវ ៥២ នាក់​