​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ឯកសារ​តុលាការ​បាន​បង្ហាញថា ក្រុមហ៊ុន Twitter​កាលពី​ថ្ងៃ​អង្គារ​ទី​១២​កក្កដា​បាន​ប្តឹង​លោក អេ​ឡុន ម៉ាស​ពី​បទ​រំលោភ​កិច្ចសន្យា​តម្លៃ ៤៤​ពាន់​លាន​ដុល្លារ​ដែល​​គាត់​បាន​ចុះហត្ថលេខា​ដើម្បី​ទិញ​ក្រុមហ៊ុន​បច្ចេកវិជ្ជា​នេះ ដោយ​ហៅ​យុទ្ធសាស្ត្រ​ចាក​ចេញ​របស់​គាត់​ថា “​គំរូ​នៃ​ការ​លាក់ពុត​”​។​

​បណ្តឹង​ដែល​បាន​ប្តឹង​នៅក្នុង​រដ្ឋ​ដេ​ឡាវែ (Delaware)​របស់​សហរដ្ឋ​អាម៉េរិក​បាន​ជំរុញ​ឱ្យ​តុលាការ​បង្គាប់​ឱ្យ​មហាសេដ្ឋី​រូបនេះ​បំពេញ​កិច្ចព្រមព្រៀង​របស់គាត់​ដើម្បី​ទិញ Twitter​ដោយ​លើក​ហេតុ​​ផល​ថា​គ្មាន​ការខូចខាត​ផ្នែក​ហិរញ្ញវត្ថុ​ណា​អាច​ជួសជុល​ការខូចខាត​ដែល​គាត់​បាន​បង្កឡើង​នោះទេ​។​

​ពាក្យបណ្តឹង​បាន​បន្តថា “​ការប្រព្រឹត្ត​របស់លោក​ម៉ាស​បាន​បញ្ជាក់​ឱ្យដឹងថា​គាត់​ចង់​គេចចេញ​ពី​កិច្ចសន្យា​ដែល​គាត់​បាន​ចុះហត្ថលេខា​ដោយ​សេរី និង​បំផ្លាញ Twitter នៅក្នុង​ដំណើរការ​នេះ​”​។​

“Twitter បាន​រង​ការខូចខាត ហើយ​នឹង​បន្ត​រង​ការខូចខាត​មិនអាច​ជួសជុល​បាន ដោយសារ​ការរំលោភបំពាន​របស់​ចុងចោទ​”​។​

​ភាគហ៊ុន Twitter បាន​កើនឡើង​បន្តិច​នៅក្នុង​ការជួញដូរ​បន្ទាប់​ពី​ដំណឹង​នៃ​ការប្តឹង​នេះ​បាន​លេចឡើង​។​

​ក្រុមអ្នកវិភាគ​និយាយថា ការប៉ុនប៉ង​ចាក​ចេញ​របស់​លោក​ម៉ាស​ពី​ការទិញ​នេះ​បាន​ធ្វើឱ្យ​ក្រុមហ៊ុន​ស្ថិតក្នុង​ស្ថានភាព​ងាយ​រងគ្រោះ​នៅ​គ្រា​ដ៏​លំបាក​។​

​បន្ទាប់​ពី​ការ​គំរាម​ជាច្រើន​សប្តាហ៍ លោក​ម៉ាស​កាលពី​ចុង​សប្តាហ៍​បាន​ដកខ្លួន​ចេញ​ពី​កិច្ចព្រមព្រៀង​នេះ ដោយ​ចោទប្រកាន់ Twitter ថា​ចេញ​សេចក្តីថ្លែងការណ៍ “​បំភ័ន្ត​” អំពី​ចំនួន​គណនី​ក្លែងក្លាយ នេះ​បើ​យោងតាម​លិខិត​របស់​មេធាវី​របស់​គាត់​ដែល​មាន​នៅក្នុង​ឯកសារ​មូល​ប​ត្រ​របស់​អាម៉េរិក​។​

​នៅក្នុង​ការកត់សម្គាល់​ជា​សាធារណៈ​លើកដំបូង​របស់​គាត់​ចាប់តាំងពី​ការប្រកាស​នោះ លោក​ម៉ា​សបាន​ប្រើ Twitter កាលពី​ចុង​សប្តាហ៍​ដើម្បី​ចម្អក​ដាក់​ក្រុមហ៊ុន បន្ទាប់ពី​ក្រុមហ៊ុន​និយាយថា​ខ្លួន​​នឹង​ប្តឹង​ដើម្បី​ឱ្យ​អនុវត្ត​កិច្ចព្រមព្រៀង​នេះ​។​

​លោក​ម៉ាស​បាន​សរសេ​រលើ Twitter ជាមួយនឹង​រូប​គាត់​សើច​ចុកពោះ​យ៉ាង​ដូច្នេះ​ថា “​ពួកគេ​និយាយថា​ខ្ញុំ​មិន​អាច​ទិញ Twitter បានទេ​។​បន្ទាប់មក​ពួកគេ​មិន​ព្រម​បង្ហាញ​ព័ត៌មាន​គណនី​ក្លែង​​ក្លាយ​។ ឥឡូវ​នេះ​ពួក​គេ​ចង់​បង្ខំ​ខ្ញុំ​ឱ្យ​ទិញ Twitter​នៅក្នុង​តុលាការ​។ ឥឡូវនេះ ពួកគេ​ត្រូវតែ​បង្ហាញ​ព័ត៌មាន​គណនី​ក្លែងក្លាយ​នៅក្នុង​តុលាការ​”៕

Twitter​ប្តឹង​ឱ្យ​លោក​ម៉ាស​ទិញយក​ក្រុមហ៊ុន​បណ្តាញ​សង្គម​នេះ​ក្នុងតម្លៃ ៤៤ ពាន់​លាន​ដុល្លារ