ដោយ​: សុខុម / ស្ទឹងត្រែង​: មកដល់ពេលនេះ មុខម្ហូប​ត្រី​ប៉ា​ខឹម ចាត់ទុកថា ជា​មុខម្ហូប​ដ៏ ពិសេស​មួយ ប្រចាំខេត្ត​ស្ទឹងត្រែង ដែល​បងប្អូន​ខ្មែរ​ឡាវ នៅតែ​ពេញនិយម​ចូលចិត្ត ធ្វើ​ទទួលទាន​។ ជាពិសេស​បងប្អូន​ប្រជាពលរដ្ឋ រស់នៅ​តាម​ដង​ទន្លេ ស្រុកស្រែ​ចំការ ធ្វើ​ទទួលទាន​ជា​លក្ខណៈ​គ្រួសារ និង​នៅសល់​ខ្លះ យកទៅលក់​នៅ ផ្សារ​ខេត្តស្ទឹងត្រែង​។​

​មុខម្ហូប​ត្រី​ប៉ា​ខឹម មានឈ្មោះ​ជា​ភាសា​ឡាវ តែបើ​បកប្រែ​ជា​ភាសា​ខ្មែរ មានន័យថា ត្រី​ប្រៃ ។​ ​ប៉ា​ខឹម ឬ ត្រី​ប្រៃ គឺ​ចាប់​ផ្តើមធ្វើ នៅក្នុង​ខែឧសភា និង​មិថុនា នា​រដូវវស្សា ចំពេល​ត្រី​មាន​ពង​។ ត្រី​ប៉ា​ខឹម គេ​យកតែ​ប្រភេទ​ត្រី​រៀល​ល្អិត​ប៉ុណ្ណោះ មក​ធ្វើ ហើយ​សាច់​វា នៅ​ស្រស់ៗ​ល្អ ។ តែបើ​ត្រី​អន់សាច់​វិញ​នោះ គេ​ធ្វើ​មិនកើត​ទេ​។​

​របៀប​ធ្វើ​ប៉ា​ខឹម (​ត្រី​ប្រៃ​) ដំបូង​គេ​យក​ត្រី​ស្រស់ៗ មក​ប្រឡាក់​ជាមួយ​អំបិល ច្របល់​ចូលគ្នា ឲ្យ​សព្វ ដើម្បី​ឲ្យ​វា​ចូលជាតិ​សាច់​ត្រី កុំឱ្យ​ហើម​ស្អុយ​។ ដាក់​រំដេង​ដំ​ឲ្យ​ទក់​ខ្លះ ដើម្បី​កាត់​ក្លិនឆ្អាប​។ បន្ទាប់មក គេ​យកទៅដាក់​ក្នុង​ពាង ទុក​ឲ្យ​បាន​រយៈពេល ១៥​ថ្ងៃ ឬ​លើសពីនេះ​។ ក្រោយមកទៀត គេ​យក​ស្រូវ​លីង​ឲ្យ​ឆ្អិន​តិចៗ មក​ច្របល់​ចូលគ្នា​ម្តងទៀត ដាក់ចូល​ក្នុង​ពាង​, ធុង​ឬ​ក្រឡ លុះ​បាន​រយៈពេល ១៥​ថ្ងៃ ទៅ ៣០​ថ្ងៃក្រោយ ទើប​គេ​អាច​បរិភោគបាន​។​

​ពេល​បរិភោគ​ត្រី​ប្រៃ គេ​យក​ត្រី​ចេញពី​ក្នុង​ពាង មក​បូត​ឱ្យ​ជ្រុះ​គ្រាប់ស្រូវ ដែល​គេ​បាន​លីង ច្របល់​ចូលគ្នា​នោះ សម្អាត​ឱ្យ​ជ្រះ ឬ​យកទៅ​លាង​ទឹក ដើម្បី​កុំឱ្យ​វា​ប្រៃ​ពេក​។ អ្នកខ្លះ គេ​និយម​បកស្បែក​ស្រកាត្រី​ចេញ រួច​ដាក់​ទៅក្នុង​ចាន ថែម​គ្រឿង​ស្ករ ប៊ីចេង ម្ទេស ជី អាច​ទទួលទាន​បាន​ហើយ​។​

​ចំពោះ​តម្លៃ​វិញ​នោះ គេ​អាច​លក់​នៅ​ផ្សារ​ស្ទឹងត្រែង ក្នុង​១​គីឡូក្រាម ពី ២​ម៉ឺន ទៅ ៣​ម៉ឺន​រៀល​។ ត្រី​ប៉ា​ខឹម ឬ​ត្រី​ប្រៃ​នេះ គេ​អាច​ទុក​ក្នុង​ក្រឡ បាន​រយៈពេល មួយឆ្នាំ មិន​ខូច​ទេ​៕/V​