​ប្រែ​សម្រួល : កញ្ញា​ដា​លី​ស (VNExpress) ៖ បុរស​ម្នាក់​នៅ​ខេត្ត​ដុង​ណៃ (Dong Nai) ភាគ​ខាងត្បូង​បាន​ស្លាប់​កាលពី​ថ្ងៃ​អង្គារ​ទី​១២​កក្កដា ពោលគឺ​ពីរ​ថ្ងៃ​បន្ទាប់ពី​ត្រូវ​ស្តេច​ពស់វែក​ចឹក ដែល​គាត់​ចាប់​បាន​ដោយ​ដៃ​ទទេ​។​

​គ្រួសារ​របស់​គាត់​បាន​និយាយថា បុរស​អាយុ ៥៧ ឆ្នាំ​ដែល​គេ​មិន​បញ្ចេញ​ឈ្មោះ​នេះ កំពុង​ជួយ​អ្នកជិតខាង​របស់​គាត់​ចាប់​ពស់ ដែល​គាត់​គិត​ថា​មិន​មាន​ពិស​។ បុរស​ទាំង​នោះ​បាន​ព្យាយាម​ចាប់​ពស់ ព្រោះ​ខ្លាច​វា​ស៊ី​សត្វ​ចិញ្ចឹម​របស់​ពួកគេ​។​

​បន្ទាប់​ពី​ពស់​បាន​លូន​ចូល​ក្នុង​រន្ធ​ក្នុង​ទីធ្លា​របស់គាត់ បុរស​នោះ​ក៏​ជីក​កន្លែង​នោះ ហើយ​ចាប់​ពស់​ដោយ​ដៃ​របស់​គាត់​។ វា​ចឹក​គាត់​ពេល​គាត់​ព្យាយាម​ដាក់​វា​ក្នុង​បាវ​។​

​បុរស​នោះ​មិន​បាន​ទៅ​មន្ទីរពេទ្យ​ភ្លាមៗ​នោះទេ ទោះជា​បានដឹង​ពី​ភាព​ធ្ងន់ធ្ងរ​នៃ​ការ​ចឹក​នេះ បន្ទាប់​ពី​ដៃ​របស់​គាត់​បង្ហាញ​សភាព​ខ្មៅ​ជាំ​ដែល​អំឡុងពេល​នោះ​គឺ​ពិសពុល​បានធ្វើឱ្យ​ខូច​សរីរាង្គ​ជាច្រើន​រួច​​ទៅហើយ​។​

​ស្ថានភាព​របស់គាត់​មិន​បាន​ធូរស្រាល​ដោយ​ការលាង​ឈាម​នៅ​មន្ទីរពេទ្យ​នោះ​ទេ ដូច្នេះ​គាត់​ត្រូវបាន​បញ្ជូន​ទៅ​ដេក​ស្លាប់​នៅផ្ទះ​។ ក្រោយមក ពស់​នេះ​ត្រូវបាន​អ្នកស្រុក​ចាប់​ហើយ​សម្លាប់​ចោល​តែម្តង​៕

​បុរស​អាយុ​៥៧​ស្លាប់​ដោយសារ​ចាប់​ពស់​ដោយ​ដៃទទេ​នៅ​វៀតណាម​កាលពី​ថ្ងៃ​អង្គារ ហើយ​ពស់​នេះ​ត្រូវបាន​អ្នកស្រុក​ចាប់​ហើយ​សម្លាប់​ចោល​តែ​ម្តង​