ដោយៈ វ៉ៃ​កូ / ស្វាយរៀងៈ លោក លឹម សៀង​ហេង អភិបាលក្រុង​បាវិត និង​លោក វណ្ណ សុ​មុន្នី អភិបាលរង រួម​នឹង​មន្ត្រី​អមដំណើរ នៅ​ព្រឹក​ថ្ងៃទី​១៣ ខែកក្កដា ឆ្នាំ​២០២២ នេះ បាន​នាំយក​នូវ​ទៀន​ព្រះវស្សា និង​ទេយ្យទាន ទៅ​ប្រគេន​ដល់​ព្រះសង្ឃ ដែល​គង់នៅ​ក្នុង​វត្ត ចំនួន ២ គឺ​វត្ត​ប្រាសាទ និង​វត្ត​ពោធិ៍​រង្សី ស្ថិតក្នុង​សង្កាត់​ប្រាសាទ ក្រុង​បាវិត ខេត្តស្វាយរៀង ។​

​ក្នុងឱកាស​នោះ លោក លឹម សៀង​ហេង បាន​មានប្រសាសន៍ថាៈ ការ​ប្រារព្ធ​ពិធី​នេះ​បាន ដោយសារ​ប្រទេសជាតិ មាន​សុខសន្តិភាព ជាពិសេស​បង្ហាញ​ពី​ទឹកចិត្ត របស់​រាជរដ្ឋាភិបាល កម្ពុជា ដែលមាន​សម្តេច​តេ​ជោ ហ៊ុន សែន និង​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន គោរព​ស្រឡាញ់​ប្រតិបត្តិ ព្រះពុទ្ធសាសនា ដែលជា​សាសនា​របស់​រដ្ឋ ដើម្បី​ថែរក្សា​ការពារ វិស័យ​ព្រះពុទ្ធសាសនា​នេះ ឱ្យ​កាន់​តែមាន​ភាពរុងរឿង​ថ្កុំ​ថ្កើ​ន ឈានទៅ​គម្រប់ ៥ ពាន់ ព្រះវស្សា តាម​ពុទ្ធ​ប្បញ្ញត្តិ ។

​ក្រៅពី​ការ​ប្រគេន​ទៀន​ព្រះវស្សា និង​ទេយ្យវត្ថុ លោក លឹម សៀង​ហេង អភិបាលក្រុង​បាវិត​
​ក៏បាន​ប្រគេន​បច្ច័យ​ចូល​បុណ្យ​ទាំង ២​វត្ត ក្នុង​មួយ​វត្ត ចំនួន ១.២០០.០០០ រៀល និង​ប្រគេន​ព្រះសង្ឃ ចំនួន​១៨​អង្គ ក្នុង​មួយអង្គ បច្ច័យ ៣ មុ​ឺ​ន​រៀល ៕/V​.mara