​ប្រែ​សម្រួលៈ​បំណង​(​ដេល្លី​ម៉េល​)៖ ប្រេង​ឆៅ​នៅ​ថ្ងៃ​ពុធ​ទី​១៣​កក្កដា​នេះ បាន​ឡើង​បន្តិច​វិញ​នៅ​មួយថ្ងៃ​បន្ទាប់​ពី​វា​បាន​ធ្លាក់​ចុះ​ក្រោម​១០០​ដុល្លារ​ក្នុង​មួយ​បារ៉ែល​ជា​លើកដំបូង​ចាប់តាំងពី​ខែ​មេសា តែ​កំណើន​​មាន​កំរិត​ដោយសារតែ​ទីផ្សារ​មាន​ការប្រយ័ត្នប្រយែង​នៅមុន​ការបញ្ចេញ​ទិន្នន័យ​អតិផរណា​របស់​អាម៉េរិក ។​

​ប្រេង​ឆៅ​ផ្សារ​អាស៊ី​បាន​ឡើង​៤៥​សេន ដល់​ថ្លៃ​៩៩,៩៧​ដុល្លារ​ក្នុង​មួយ​បារ៉ែល​នៅពេល​ប្រេង​ផ្សារ​អាម៉េរិក​ឡើង​៤៤​សេន​ដល់​៩៥,២៧​ដុល្លារ​ក្នុង​មួយ​ធុង​បារ៉ែល​។​

​ពួក​អ្នកវិនិយោគ​បាន​លក់​ចេញ​ស្តុក​ប្រេង​របស់ខ្លួនដោយសារ​តែ​បារម្ភ​ថា ការដំឡើង​អត្រា​កា​ប្រាក់​យ៉ាង​គំហ៊ុក​នៅ​អាម៉េរិក​ដើម្បី​ទប់​អតិផរណា​នឹង​កាន់តែ​ពន្យឺត​សកម្មភាព​សេដ្ឋកិច្ច​និង​ប៉ះពាល់​តំរូវ​​ការ​ប្រេង​។​កាលពី​ថ្ងៃ​អង្គារ ប្រេង​ធ្លាក់​ថ្លៃ​ជាង​៧​ដុល្លារ​ក្នុង​មួយ​បារ៉ែល​។​

​ការព្រួយបារម្ភ​មួយទៀត​គែ​ថា ការដំឡើង​អត្រា​ការប្រាក់​នៅ​អាម៉េរិក​នឹង​រុញ​អោយ​ប្រាក់​ដុល្លារ​ឡើងថ្លៃ ដែល​ក៏​ប៉ះពាល់​តំលៃ​ប្រេង​ផងដែរ​។​

សូមបញ្ជាក់ថា ​ថ្លៃ​ប្រេងជាទូទៅ​កំណត់​ជា​ប្រាក់​ដុល្លារ ដូច្នេះ​នៅពេល​ដុល្លារ​ឡើងថ្លៃ វា​ធ្វើអោយ​ទំនិញ​នេះ​កាន់តែ​ថ្លៃ​សំរាប់​អ្នក​កាន់​រូបិយបណ្ណ​ដទៃទៀត ដែល​វា​ដាក់​សម្ពាធ​លើ​សេចក្តីត្រូវការ​។​

​ប្រេង​ឆៅ​ធ្លាក់ចុះ​ជាង៧​ដុល្លារ​កាលពី​ថ្ងៃ​អង្គារ​មក​នៅ​ក្រោម​១០០​ដុល្លារ​ក្នុង​មួយ​បារ៉ែល​ជា​លើកដំបូង​ក្នុង​រយៈពេល​បី​ខែ​មកនេះ ចំ​ពេល​ដុល្លារ​ឡើងថ្លៃ ការទប់ស្កាត់​កូវី​ដ​១៩​នៅក្នុង​ប្រទេស​ប្រើ​ប្រេង​ធំ​បំផុត​(​ចិន​) និង​ការបារម្ភ​អំពី​ការដើរថយក្រោយ​នៃ​សេដ្ឋកិច្ច​សកល​

​សូមបញ្ជាក់​ថា ចាប់តាំងពី​បាន​ឡើង​ដល់​កំពូល​កាលពី​ខែ​មីនា ប្រេង​ឆៅ​បាន​ធ្លាក់ចុះ​អស់​២៧​ទៅ​២៩​ភាគរយ​មកទល់ពេលនេះ។

​ដេននី​ស គី​សលឺ​(Dennis Kissler)​មន្ត្រី​នៅ​ក្រុមហ៊ុន​ហិរញ្ញវត្ថុ​BOK Financial​បាន​និយាយថា ថ្លៃ​ប្រេង​កំពុង​ប្រឈម​សម្ពាធ​ពី​ការផ្ទុះកូ​វីដ​១៩​នៅ​ចិន ដុល្លារ​ឡើងថ្លៃនិង​ការព្រួយបារម្ភ​អំពី​ការ​​ដើរ​ថយ​ក្រោយ​នៃ​សេដ្ឋកិច្ច​សកល​៕