​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ស្រីលង្កា​បាន​ប្រកាស​ដាក់​ប្រទេស​ក្នុង​ស្ថានភាព​អាសន្នកាល​ពី​ថ្ងៃ​ពុធ​ទី​១៣​កក្កដា ខណៈ​មនុស្ស​រាប់ពាន់​នាក់​បាន​ប្រមូលផ្តុំ​គ្នា​នៅ​ការិយាល័យ​នាយករដ្ឋមន្ត្រី បន្ទាប់​ពី​ប្រធានាធិបតី​របស់​ប្រទេស​បាន​ជិះ​យន្តហោះ​ទៅ​កាន់​ប្រទេស​ម៉ាល់​ឌី​វ បន្ទាប់ពី​មាន​ការតវ៉ា​យ៉ាង​ទូលំទូលាយ​ជា​ច្រើន​ខែ​ប្រឆាំង​នឹង​វិបត្តិ​សេដ្ឋកិច្ច​។​

​ប្រធានាធិបតី ហ្គោ​តាបា​យ៉ា រ៉ា​ចា​ប៉ាក់​សា (Gotabaya Rajapaksa) បាន​សន្យា​កាលពី​ចុង​សប្តាហ៍​ថា​នឹង​លាលែង​ពី​តំណែង​នៅ​ថ្ងៃ​ពុធ​និង​ត្រួសត្រាយ​ផ្លូវ​សម្រាប់ “​ការផ្ទេរ​អំណាច​ដោយ​សន្តិវិធី​” បន្ទាប់ពី​បាន​ភៀសខ្លួន​ចេញពី​លំនៅដ្ឋាន​ផ្លូវការ​របស់​គាត់​នៅ​ទីក្រុង​កូឡុំបូ មុន​ពេល​បាតុករ​រាប់​ម៉ឺន​នាក់​សម្រុកចូល​លំនៅដ្ឋាន​។​

​ក្នុងនាម​ជា​ប្រធានាធិបតី លោក​រ៉ា​ចា​ប៉ាក់​សា​ទទួលបាន​អភ័យឯកសិទ្ធិ​ពី​ការចាប់ខ្លួន ហើយ​គេ​ជឿ​ថា​គាត់​ចង់​ទៅ​ក្រៅប្រទេស មុន​ពេល​ចុះ​ចេញពី​តំណែង​ដើម្បី​ចៀសវាង​លទ្ធភាព​នៃ​ការឃុំខ្លួន​។​

​ប្រភព​អន្តោប្រវេសន៍​បាន​ប្រាប់​ទីភ្នាក់ងារ​សារព័ត៌មាន AFP ថា គាត់ ប្រពន្ធ​គាត់ និង​អង្គរក្ស​ពីរ​នាក់ គឺជា​អ្នកដំណើរ​បួន​នាក់​នៅលើ​យន្តហោះ​យោធា Antonov-32​ដែល​បាន​ហោះ​ចេញពី​អាកាស​​យានដ្ឋាន​អន្តរជាតិ​សំខាន់​របស់​ស្រីលង្កា​។​

​ប៉ុន្មាន​ម៉ោង​ក្រោយមក ដោយ​មិន​មាន​ការប្រកាស​ជា​ផ្លូវការ​ថា​លោក​នឹង​ចុះចេញ​ពី​តំណែង បាតុករ​រាប់ពាន់​នាក់​បាន​ប្រមូលផ្តុំ​គ្នា​នៅ​ការិយាល័យ​របស់​នាយក​រដ្ឋមន្ត្រី លោក រ៉ានី​ល វីក្រេ​មេ​ស៊ីង (Ranil Wickremesinghe) ដែល​នឹង​ក្លាយ​ជា​ប្រធានាធិបតី​ស្តីទី​ដោយ​ស្វ័យប្រវត្តិ​ក្នុង​ព្រឹត្តិការណ៍​នៃ​ការលាលែង​ពី​តំណែង ដោយ​ទាមទារ​ឱ្យ​មន្ត្រី​ការិយាល័យ​ទាំង​ពីរ​ចាកចេញ​ទៅ​។​

​ពួកគេ​បាន​ស្រែកថា “​ទៅ​ផ្ទះ​ទៅ​រ៉ានី​ល ទៅ​ផ្ទះ​ទៅ​ហ្គោ​តា​”​។​

​អ្នកនាំពាក្យ​របស់​នាយ​ក​រដ្ឋមន្ត្រីបាន​ប្រាប់​ទីភ្នាក់ងារ​សារព័ត៌មាន AFP ថា​ប៉ូលិស​បាន​បាញ់​ឧស្ម័ន​បង្ហូរទឹកភ្នែក​ដើម្បី​រារាំង​ពួកគេ​កុំឱ្យ​លុកលុយ​ក្នុង​​បរិវេណ​ការិយាល័យ​នាយករដ្ឋមន្ត្រី ហើយ​ក្រុម​មន្ត្រី​បានប្រកាស​ស្ថានភាព​អាសន្ន​ទូទាំង​ប្រទេស “​ដើម្បី​ដោះស្រាយ​ស្ថានការណ៍​នៅក្នុង​ប្រទេស​”​។​

​មន្ត្រីប៉ូលិស​ជាន់ខ្ពស់​ម្នាក់​បាន​និយាយថា ប៉ូលិស​បាន​ដាក់​បម្រាម​គោចរ​គ្មាន​កាល​កំណត់​នៅ​ទូទាំង​ខេត្ត​ភាគ​ខាងលិច ដែល​រួមមាន​ទាំង​ទីក្រុង​កូឡុំបូ “​ដើម្បី​ទល់​ទល់នឹង​ស្ថានការណ៍​”​។​

​លោក​វីក្រេ​មេ​ស៊ីង​បាន​ប្រកាសពីឆ​ន្ទៈក្នុង​ការលាលែង​ពី​តំណែង ប្រសិនបើ​ការឯកភាព​គ្នា​ត្រូវ​បាន​សម្រេច​ដើម្បី​បង្កើត​រដ្ឋាភិបាល​ឯកភាព​មួយ​។​

​ការិយាល័យ​របស់​គាត់​បាន​បញ្ជាក់​កាលពី​ថ្ងៃ​ពុធ​ថា លោក​រ៉ា​ចា​ប៉ាក់​សាបាន​ចាកចេញ​ពី​ប្រទេស ប៉ុន្តែ​និយាយថា​មិន​មាន​កាលវិភាគ​សម្រាប់​ការប្រកាស​លាលែង​ពី​តំណែង​ណាមួយ​នោះទេ​។​

​ដំណើរការ​ស្នង​តំណែង​ពី​ប្រធានាធិបតី​អាច​ចំណាយ​ពេល​ចន្លោះ​ពី​បី​ថ្ងៃ ដែល​ជា​ពេលវេលា​អប្បបរមា​ត្រូវការ​ចាំបាច់​សម្រាប់​សភា​ដើម្បី​ជ្រើសរើស​សមាជិក​សភា​មួយ​រូប​ដើម្បី​បម្រើ​អាណត្តិ​សេសសល់​របស់លោក​រ៉ា​ចា​ប៉ាក់​សា ដែល​នឹង​បញ្ចប់​នៅ​ខែវិច្ឆិកា ឆ្នាំ ២០២៤ និង​រយៈពេល​អតិបរមា ៣០ ថ្ងៃ ដែល​ត្រូវបាន​អនុញ្ញាត​នៅក្រោម​លក្ខន្តិកៈ​នៃ​ច្បាប់​៕

​បាតុករ​តវ៉ា​ទូទាំងប្រទេស​ជុំវិញ​វិបត្តិ​សេដ្ឋកិច្ច​នៅ​ស្រីលង្កា

​ប្រធានាធិបតី ហ្គោ​តាបា​យ៉ា រ៉ា​ចា​ប៉ាក់​សា ភៀសខ្លួន​ទៅ​ម៉ាល់​ឌី​វ​កាលពីដើមថ្ងៃ​ពុធ​