ដោយ​: ភ្នំ​ស្វាយ / បន្ទាយមានជ័យ​: ស្ថានទូត​អូស្ត្រាលី​ប្រចាំ​កម្ពុជា និង​រដ្ឋបាលខេត្ត​បន្ទាយមានជ័យ បាន​ជួបពិភាក្សា​ពី​កិច្ចសហប្រតិបត្តិការ​កា​លពី​ព្រឹក​ថ្ងៃ​ពុធ​ទី​១៣ ខែកក្កដា ឆ្នាំ​២០២២ នៅ​សាលាខេត្ត​នេះ ។​

​លោក អ៊ុ រាត្រី អភិបាលខេត្ត​បន្ទាយមានជ័យ ព្រមទាំង​ថ្នាក់ដឹកនាំ​ខេត្ត មន្ទីរ អង្គភាព បាន​អញ្ជើញ​ទទួល​ជួបប្រជុំ​ពិភាក្សា​ការងារ​ស្តីពី​កិច្ចសហប្រតិបត្តិការ​ទ្វេរ​ភាគី​រវាង​អូស្ត្រាលី និង​ខេត្តបន្ទាយមានជ័យ​ជាមួយ​លោក ធី​ម ភែ​ធ័​រ​សុន (Mr Tim Paterson) ​លេខា​ទី​១​នៃ​ស្ថានទូត​អូស្ត្រាលី​ប្រចាំ​កម្ពុជា​។​

​លោក​អ៊ុ រាត្រី លើកឡើង​ពី​ស្ថានភាព​ភូមិសាស្ត្រ សក្តានុពល​លើ​វិស័យសេដ្ឋកិច្ច សង្គមកិច្ច និង​កិច្ចសហប្រតិបត្តិការ​ជាមួយ​ពហុភាគី ឯក​ត្តោ​ភាគី​មិត្ត​បរទេស និង​ដៃគូ​អភិវឌ្ឍន៍ (​អង្គការ សមាគម ផ្នែក​ឯកជន បុគ្គល​សប្បុរសជន​នានា​កន្លងមក​។​

​ក្នុងនោះ ក៏មាន​ប្រទេស​អូស្ត្រាលី ដែល​ជួយ​ដល់​ពេទ្យ​ភ្នែក​នៅ​មន្ទីរពេទ្យ​ខេត្ត​មិត្តភាព​កម្ពុជា ជប៉ុន​មង្គល​បូរី​តាមរយៈ​អង្គការ​ទេស​ន្ត​ប្រវេសន៍​អន្តរជាតិ (IOM) លើ​វិស័យ​បោសសម្អាត​មីន និង​ជួយ​ពលរដ្ឋ លើ​វិស័យ​អប់រំ​ជាដើម ។​

​លោក ធី​ម ភែ​ធ័​រ​សុន (Mr Tim Paterson) លេខា​ទី​១​នៃ​ស្ថានទូត​អូស្ត្រាលី​ប្រចាំ​កម្ពុជា ថ្លែងថា ប្រទេស​និង​ស្ថានទូត​អូស្ត្រាលី​បាន​នឹង​កំពុងមាន​ទំនាក់ទំនង​កិច្ចសហប្រតិបត្តិការ​ល្អ​ជាមួយ​កម្ពុជា​លើ​ច្រើន​វិស័យ​។​ ដោយឡែក សម្រាប់​ខេត្តបន្ទាយមានជ័យ ស្ថានទូត​បាន​នឹង​កំពុង​ពិនិត្យ​លើ​ផ្នែក​មួយចំនួន​ដើម្បី​បន្ត និង​បង្កើត​កិច្ចសហប្រតិបត្តិការ​ថ្មី​ដោយផ្ទាល់​៕​