​ដោយៈ ប​.​ជ័យ / បន្ទាយ​មាន​ជ័​យៈ ស្ត្រី​មាន​ផ្ទៃពោះ ចំនួន ៤៥ នាក់ មកពី​ភូមិ​នានា ក្នុង​សង្កាត់​ម្កាក់ ក្រុង​សិរីសោភ័ណ ខេត្តបន្ទាយមានជ័យ កាលពី​ថ្ងៃទី​១៣ ខែកក្កដា បានទទួល​អប់រំ​ការផ្សព្វផ្សាយ ពី​លោកស្រី សុខ លា​ភា មន្ត្រី​សាខា​កាកបាទក្រហម ខេត្តបន្ទាយមានជ័យ ស្ដីពី​អត្ថប្រយោជន៍ នៃ​ការយល់ដឹង អំពី​សុខភាព​បន្ត​ពូជ និង​បង្ការ ការពារ​មាតា ទារក ពេល​មាន​ផ្ទៃពោះ និង​ពេល​សំរាលកូន និង​ការផ្ដល់​វ៉ាក់សាំង​បង្ការ​ជំងឺ កូ​វីដ​១៩ ជូន​ស្ត្រី​មាន​ផ្ទៃពោះ និង​មាតា កំពុង​បំបៅកូន ដោយ​ទឹកដោះ​ម្ដាយ​។​

​លោកស្រី សុខ លា​ភា បាន​លើក​មក​បញ្ជាក់បន្ថែម ពី​សារលិខិត​របស់ សម្ដេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហមកម្ពុជា និង​ជា​ឥស្សរជន​ឆ្នើម​ថ្នាក់ជាតិ នៃ​ផែនការ សកម្មភាព​រួម អគ្គលេខាធិការ អង្គការសហប្រជាជាតិ ដើម្បី​សុខភាព​ស្ត្រី និង​កុមារ ដោយ​ក្នុង​សារលិខិត បានបញ្ជាក់​ច្បាស់​ថា យើង​ត្រូវការ​ចាំបាច់ ជាទីបំផុត ការរួម​កម្លាំង​គ្នា និង​ការ​ធ្វើតាម​គ្រប់​លទ្ធភាព ដើម្បី​ពង្រឹង​ការផ្ដល់សេវា​សុខភាព​បន្ត​ពូជ សុខភាព​មាតា ទារក និង​កុមារ និង​ការផ្ដល់​វ៉ាក់សាំង​បង្ការ​ជំងឺ​កូ​វីដ​១៩ ជូន​ស្ត្រី​មាន​ផ្ទៃពោះ និង​មាតា​កំពុង​បំបៅកូន ដោយ​ទឹកដោះ​ម្ដាយ ឲ្យ​បានល្អ​ប្រសើរ​ឡើងវិញ ឱ្យបាន​សមស្រប ជាមួយនឹង​ប្រធានបទ​នៃ ទិវា​ជាតិ​សុខភាព​មាតា ទារក និង​កុមារ ឆ្នាំ​២០២២ នេះ​។

​ជាមួយគ្នានេះ យើង​ត្រូវតែ​លើកទឹកចិត្ត​ស្ត្រី​ទាំងនោះ ឲ្យ​ទៅ​ទទួលបាន​ការពិនិត្យ ថែទាំ ចាប់ពី​ពេល​ពពោះ រហូត​ដល់ពេល​សម្រាល​និង​បន្ទាប់ពី​សម្រាលកូន​ហើយ ត្រូវ​បន្ត​ថែទាំ សុខភាព ទាំង​ម្ដាយ ទាំង​កូន រហូតដល់​កូន មាន​អាយុ​ពីរ​ឆ្នាំ​។​

​ដោយពេល​វេលា និង​បច្ចុប្បន្ននេះ ជា​ពេល​នៃ​រដូវវស្សា មាន​ភ្លៀង​ធ្លាក់​ជា​បន្តបន្ទាប់ អាច​បណ្ដាលឱ្យមាន​មូស​ខ្លា ដែលជា​ភ្នាក់ងារ​ចម្លងជំងឺ​គ្រុនឈាម ដល់​មនុស្ស​យើង ។​

​កញ្ញា សិទ្ធិ​ស៊ី​ណាត មន្ត្រី​សាខា​កាកបាទក្រហម​ខេត្ត ក៏បាន​ឡើង​ធ្វើ​បទ​បង្ហាញ ស្ដីពី​បញ្ហា ប្រឈម​នឹង​ជំងឺគ្រុនឈាម ដូចនេះ រួមគ្នា​កំចាត់​ប្រភព​មូស​ខ្លា ពិសេស​សម្អាត​បរិស្ថាន ជុំវិញ​ផ្ទះ​យើង​ជាប្រចាំ ៕/V​