​ប្រែ​សម្រួលៈ​បំណង​(​បាងកក​ប៉ុស្តិ៍​)៖ ការផ្ទុះ​គ្រាប់បែក​នៅ​ផ្សារ​ទំនើប​មួយ​ក្នុង​ទីក្រុង​យ៉ាងហ្គោន​របស់​មី​យ៉ាន់​ម៉ា​បាន​សម្លាប់​មនុស្ស​ពីរ​នាក់​និង​បង្ក​របួស​មនុស្ស​១១​នាក់​ទៀត នេះ​បើ​តាម​អ្នក​ជួយ​សង្គ្រោះ​​និង​សារព័ត៌មាន​ក្នុងស្រុកបាន​រាយការណ៍​កាលពី​ថ្ងៃ​ពុធ​។​

​មិន​មាន​ក្រុម​ណាមួយ​ចេញ​មក​ប្រកាស​អះអាង​ទទួលខុសត្រូវ​ចំពោះ​ការ​ផ្ទុះ​កាលពី​រសៀល​ថ្ងៃ​អង្គារ​នេះ​ទេ នៅ​ពេល​ប្រទេស​ប្រារព្វ​បុណ្យ​សាសនា​មួយ​។​

​សមាជិក​ម្នាក់​ក្នុង​ក្រុង​សង្គ្រោះបាន​ប្រាប់​ទីភ្នាក់ងារ​សារព័ត៌មាន​បារាំង​ថា​« នៅពេល​យើង​បាន​ទៅ​ដល់​ទីនោះ អ្នក​រងរបួស​នៅ​ដេក​អង្គុយ​ពេញ​ទីនោះ ដោយ​ឈាម​ប្រឡាក់​លើផ្លូវដើរ​។​យោង​តាមព័ត៌​​មាន​ដែល​យើង​ប្រមូលបាន មនុស្ស​១១​នាក់​រងរបួស និង​ពីរ​នាក់​បាន​ស្លាប់​»​។​

​សូមបញ្ជាក់​ថា ប្រទេស​អាស៊ី​អាគ្នេយ៍​មួយ​នេះ បាន​ធ្លាក់​ក្នុង​ភាពវឹកវរ​ចាប់តាំងពី​រដ្ឋប្រហា​រកា​លពី​ដើម​ឆ្នាំ​មុន ដោយ​កងកម្លាំងប្រដាប់អាវុធ​របស់​ប្រជាជន​(PDF)​ដែល​ប្រកាស​ឡើង​ដោយ​ខ្លួនឯង ផ្តោត​​ការវាយប្រហារ​លើ​ទាហាន​និង​មន្ត្រី​ឬ​អង្គការ​ដែលធ្វើការអោយរដ្ឋាភិបាល​យោធា ។​

​សារព័ត៌មាន​ក្នុងស្រុក​បាន​និយាយថា មនុស្ស​ពីរ​នាក់​បាន​ស្លា​ប់​នៅ​មន្ទីរពេទ្យ នៅពេល​ក្រុម​ជួយសង្គ្រោះ​មួយទៀត​បាន​និយាយថា ខ្លួន​បាន​នាំ​មនុស្ស​ប្រាំមួយ​នាក់​ទៅ​កាន់​មន្ទីរពេទ្យ ដើម្បី​ព្យាបាល​របួស​​ដែល​មិន​គំរាម​ដល់​ជីវិត​។​

​កាលពី​ខែ​ឧសភា ការផ្ទុះ​មួយ​នៅក្បែរ​ចំណតរថយន្ត​ក្រុង​មួយ​ក្នុង​ក្រុង​យ៉ាងហ្គោន បាន​សម្លាប់​មនុស្ស​ម្នាក់​និង​របួស​ប្រាំបួន​នាក់​។​រដ្ឋាភិបាល​ក្រោយមក​បាន​និយាយថា គ្រាប់បែក​បាន​ផ្ទុះ​ដោយ​ចៃដន្យ​​និង​ជនរងគ្រោះ​ជា​អ្នក​ផលិត​គ្រាប់បែក​ក្នុង​ក្រុម​PDF ដែល​ខ្លួន​ប្រកាស​ចាត់ទុក​ជា​ក្រុម​ភេរវកម្ម​។​

បើតាមអង្គការឃ្លាំមើលមួយ ​មនុស្ស​ជាង​២.០០០​នាក់​ត្រូវបាន​សម្លាប់ និង​យ៉ាងតិច​១៤.០០០​នាក់​ត្រូវ​កងកម្លាំង​នៃ​រដ្ឋាភិបាល​បច្ចុប្បន្ន​ចាប់ខ្លួន​ក្នុងការ​បង្ក្រាប​លើ​ក្រុម​ប្រឆាំង​ចាប់តាំងពី​រដ្ឋប្រហារ​ខែ​កុម្ភៈ​ឆ្នាំ​២០២១៕

​វត្តមាន​ប៉ូលិស​នៅក្រៅ​ផ្សារ​ដែល​ផ្ទុះ​គ្រាប់បែក​។​នៅ​មិនទាន់មាន​ក្រុម​ណា​ចេញមក​អះអាង​ទទួលខុសត្រូវ​ចំពោះ​ការផ្ទុះ​នៅ​ក្រុង​យ៉ាងហ្គោន​នេះ​នៅឡើយ​ទេ​