​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កងទ័ពអាកាស​អាម៉េរិក​បាន​ទទួល​អាវុធ​ឡាស៊ែរ​ថាមពល​ខ្ពស់ ដែល​អាច​ដឹក​តាម​យន្តហោះ​ក្នុង​ទម្រង់​ជា​បំពង់​។ ដំណឹង​នេះ​បាន​កើត​ឡើង​កាលពី​ថ្ងៃទី​១១​កក្កដា នៅពេល​ដែល​ក្រុមហ៊ុន Lockheed Martin បាន​លាតត្រដាង​ថា យ៉ាងហោច​ណាស់​សព្វាវុធ​មួយ ដែល​ខ្លួន​បាន​អភិវឌ្ឍ ត្រូវបាន​បញ្ជូន​ឱ្យទៅ​កងទ័ពអាកាស​ដើម្បី​ធ្វើ​ការសាកល្បង​។ ​កិច្ចខិតខំ​ប្រឹងប្រែង​នេះ​គឺ​ស្ថិតនៅក្នុង​ក្រប​ខណ្ឌ​ដ៏​ធំ​ទូលាយ​នៃ​ផែនការ​ដែល​កំពុង​វិវ​ឌ្ឍ​ដើម្បី​ឱ្យ​មាន​យន្តហោះ​ចម្បាំង​ប្រដាប់​ដោយ​ឡាស៊ែរ​ដែល​អាច​បាញ់​លើ​មី​ស៊ី​ល​របស់​សត្រូវ​និង​គោលដៅ​ផ្សេង​​ទៀត​ផង​ដែរ​។​

​របាយការណ៍​ពី​វេបសាយ Breaking Defense បានបញ្ជាក់​ថា ក្រុមហ៊ុន Lockheed Martin បាន​ប្រគល់​អាវុធ​ឡាស៊ែរ​ថាមពល​ខ្ពស់ LANCE​របស់​ខ្លួន​ឱ្យ​ទៅ​កងទ័ពអាកាស​ក្នុង​ខែ​កុម្ភៈ​ឆ្នាំ​​នេះ​។ នៅក្នុង​បរិបទ​នេះ ឡា​ស៊ែរ LANCE តំណាងឱ្យ “​ភាព​រីកចម្រើន​នៃ​ឡាស៊ែរ​សម្រាប់​បរិស្ថាន​បង្រួម​ជំនាន់​ក្រោយ​”​។ អ្នកទទួល​អាវុធ​ថ្មី​នេះ​គឺ​មន្ទីរពិសោធន៍​ស្រាវជ្រាវ​របស់​កងទ័ព​អាកាស ឬ AFRL ដែល​ទទួលបន្ទុក​ក្នុង​ការអភិវឌ្ឍ​និង​រួមបញ្ចូល​បច្ចេកវិជ្ជា​ថ្មីៗ​នៅលើ​អាកាស លំហ និង​អាណាចក្រ​អ៊ីនធឺណិត​។​

​លោក ថៃល័​រ ហ្គ្រី​ហ្វ​ហ្វ៊ីន (Tyler Griffin) នាយក​ប្រតិបត្តិ​ក្រុមហ៊ុន Lockheed ធ្លាប់បាន​ប្រាប់​អ្នកសារព័ត៌មាន​ថា ឡា​ស៊ែរ LANCE “​គឺជា​ឡាស៊ែរ​តូច​បំផុត ស្រាល​បំផុត​និង​មាន​ថាមពល​​ខ្ពស់​បំផុត​នៃ​ប្រភេទ​ថាមពល​បែបនេះ ដែល​ក្រុមហ៊ុន Lockheed Martin បាន​ផលិត​ឡើង​រហូត​មក​ទល់​បច្ចុប្បន្ន​”​។​

​ជា​ការពិត លោក​ហ្គ្រី​ហ្វ​ហ្វ៊ីន​បាន​បន្ថែមថា ឡា​ស៊ែរ LANCE គឺមាន “​ទំហំ​មួយ​ភាគ​ប្រាំមួយ​” នៃ​អាវុធ​ថាមពល​ដែល​បាន​ផលិត​ពី​មុន​ដោយ​ក្រុមហ៊ុន Lockheed សម្រាប់​កងទ័ព​។​ឡាស៊ែរ​កាលពីមុន​​គឺជា​ផ្នែក​មួយ​នៃ​កម្មវិធី “​គំនិត​ផ្តួចផ្តើម​ឡាស៊ែរ​អគ្គិសនី​ខ្លាំងក្លា​” ហើយ​អាច​បញ្ចេញ​កម្លាំង​អគ្គិសនី​នៅ​កម្រិត ៦០ គីឡូវ៉ាត់​។ ​ទោះ​យ៉ាងណា​គេ​មិនដឹងថា​តើ​អាវុធ​ឡាស៊ែរ​ក្រោយ​នេះ​មាន​ថាមពល​កម្រិត​ប៉ុន្មាន​នោះទេ ប៉ុន្តែ​វា​អាច​នៅ​ក្រោម ១០០ គីឡូវ៉ាត់​៕

​កងទ័ពអាកាស​អាម៉េរិក​បាន​ទទួល​អាវុធ​ឡាស៊ែរ​ថាមពល​ខ្ពស់​កាលពី​ថ្ងៃទី​១១​កក្កដា​ឆ្នាំ​២០២២​