​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កងទ័ព​ជើង​អាកាស​អាម៉េរិក​បាន​និយាយថា​អាវុធ​ល្បឿន​លឿន​ជាង​សំឡេង​លំដាប់​កំពូល​របស់​កងទ័ពអាកាស​អាម៉េរិក​បានបញ្ចប់​ការសាកល្បង​ជោគជ័យ​​លើក​ទី​ពីរ​ជាប់ៗ​គ្នា​នៃ​ម៉ូទ័​ររុញ​របស់​វា​ក្នុងរយៈពេល​តិចជាង​ពីរ​ខែ ដែល​នេះ​ជា​របត់​ថ្មី​មួយ​បន្ទាប់​ពី​បរាជ័យ​បី​លើក​ផ្ទួនៗ​។​

​លោក​ឧត្តមសេនីយ៍ទោ ហ៊ី​ត ខូល​លីន (Heath Collins) ជា​អ្នក​គ្រប់គ្រង​កម្មវិធី​បាន​និយាយ​នៅក្នុង​សេចក្តីថ្លែងការណ៍​មួយ​កាលពី​ថ្ងៃ​ពុធ​ទី​១៣​កក្កដា​ថា អាវុធ​ដែល​ផលិត​ដោយ​ក្រុមហ៊ុន Lockheed Martin Corp “​បាន​ឈាន​ដល់​ល្បឿន​លឿន​ជាង​សំឡេង​” និង “​គោលដៅ​ចម្បង​និង​បន្ទាប់បន្សំ​ត្រូវបាន​បំពេញ​”​នៅក្នុង​ការបាញ់​សាកល្បង​កាលពី​ថ្ងៃ​អង្គារ​លើ​យន្តហោះ​ទម្លាក់​​គ្រាប់បែក B-52​។​

“​ឥឡូវ​នេះ​យើង​បានបញ្ចប់​ការសាកល្បង​ម៉ូទ័​ររុញ​របស់​យើង​ជាច្រើន​លើក​រួច​ហើយ ហើយ​ត្រៀមខ្លួន​ជា​ស្រេច​ដើម្បី​ឆ្ពោះទៅរក​ការសាកល្បង​គ្រប់​ជ្រុងជ្រោយ​នៅ​ចុងឆ្នាំ​នេះ​”​។​

​បរាជ័យ​បី​លើក​មុន​នេះ​បានធ្វើឱ្យ​ខូចផែនការ​សម្រាប់​ការផលិត​មី​ស៊ី​ល​នេះ​នៅ​ឆ្នាំ​នេះ​ដើម្បី​ឱ្យ​មន្ទីរ​បញ្ច​កោណ​អាច​ប្រកាស​នៅ​ថ្ងៃទី ៣០ ខែកញ្ញា​ថា អាវុធ​បាញ់​តាម​អាកាស​ដែល​គេ​ស្គាល់​ថា ARRW នឹង​ក្លាយជា​អាវុធ​លឿន​ជាង​សំឡេង​ដែល​មាន​សមត្ថភាព​ប្រយុទ្ធ​ដំបូងបង្អស់​របស់​សហ​រដ្ឋ​អាម៉េរិក​។​

​ចិន​និង​រុស្ស៊ី​មាន​សព្វាវុធ ដែល​អាច​បត់បែន​រលូន​ក្នុង​ល្បឿន​លឿន​បំផុត​រួចទៅហើយ​។​

​គោលដៅ​របស់​សហរដ្ឋ​អាម៉េរិក​នាពេលនេះ​គឺ​ប្រកាស “​សមត្ថភាព​ប្រតិបត្តិការ​ដំបូង​” សម្រាប់​មី​ស៊ី​ល Lockheed ក្នុងពេល​ណាមួយ​ក្នុង​ឆ្នាំសារពើពន្ធ​បន្ទាប់ នេះ​បើ​យោងតាម​សេចក្តីថ្លែងការណ៍​របស់​កងទ័ពអាកាស​មុននេះ​៕

​មី​ស៊ី​ល​លឿន​ជាង​សំឡេង ARRW​ត្រូវ​បាន​សាកល្បង​ចេញពី​យន្តហោះ​ទម្លាក់​គ្រាប់​ខ្នាត​យក្ស​B-52​