​ប្រែ​សម្រួល : កញ្ញា​ដា​លី​ស (​ប៊ី​ប៊ីស៊ី​) ៖ ឥណ្ឌា​បាន​ប្រកាស​ការចាក់​ថ្នាំ​បង្ការ​ជំងឺ​កូវី​ដ​ដូ​ស​ជំរុញ​ដោយ​ឥតគិតថ្លៃ​សម្រាប់​មនុស្សពេញវ័យ​ទាំង​អស់​រយៈពេល ៧៥ ថ្ងៃ​ចាប់ពី​សប្តាហ៍​នេះ​តទៅ​។​

​រដ្ឋមន្ត្រី​សហព័ន្ធ​មួយរូប​បាន​និយាយថា ពេលវេលា​នេះ​គឺ​ដើម្បី​ប្រារព្ធ​ខួប​លើក​ទី ៧៥ នៃ​ទិវា​ឯករាជ្យ​របស់​ប្រទេស​នៅ​ថ្ងៃទី ១៥ ខែ​សីហា​។​

​រហូតមកទល់​ពេលនេះ មានតែ​បុគ្គលិក​ជួរមុខ បុគ្គលិក​សុខាភិបាល និង​មនុស្ស​ដែល​មាន​អាយុ​លើសពី ៦០ ឆ្នាំ​ប៉ុណ្ណោះ​ដែល​មាន​សិទ្ធិ​ទទួល​បានដូស​ជំរុញ​ដោយ​ឥតគិតថ្លៃ​។​អ្នក​ផ្សេង​ទៀត​ត្រូវ​ចំណាយ​​ប្រាក់​សម្រាប់​វា​។​

​ចំណាត់ការ​នេះ​កើតឡើង​ប៉ុន្មាន​ថ្ងៃ​បន្ទាប់ពី​ឥណ្ឌា​កាត់បន្ថយ​គម្លាត​រវាង​ការចាក់​វ៉ាក់សាំង​លើក​ទី​២ និង​ទី​៣ ពី​ប្រាំបួន​ខែ​មក​នៅត្រឹម​ប្រាំ​មួយខែ​។​

​សេចក្តីប្រកាស​នេះ​ត្រូវ​គេ​រំពឹងថា​នឹង​ពង្រីក​ការចាក់ដូស​ជំរុញឬ​ដូស​ប្រុងប្រយ័ត្ន ដែល​ឥណ្ឌា​ហៅ​ដូច្នេះ នៅក្នុង​ប្រទេស​នេះ​។​

​កាសែត Hindustan Times បាន​រាយការណ៍​កាលពី​ថ្ងៃ​ព្រហស្បតិ៍​ទី​១៤​កក្កដា​ថា ប្រជាជន​ឥណ្ឌា ៩២ ភាគរយ​ដែលមាន​សិទ្ធិ​ទទួល​បានដូស​ជំរុញ មិនទាន់​បាន​មក​ចាក់​នៅ​ឡើយ​ទេ​។​

​ឥណ្ឌា​បាន​ចាក់ដូស​ជំរុញ​ប្រហែល ៥០ លាន​ដូស​មកទល់ពេលនេះ ពោលគឺ​ប្រហែល​ប្រាំ​ភាគរយ​នៃ​ប្រជាជន​ដែល​មាន​សិទ្ធិ​ចាក់​ប៉ុណ្ណោះ​៕

​ឥណ្ឌា​ចាក់​វ៉ាក់សាំង ១,៩៩ ពាន់​លាន​ដូស​ចាប់តាំងពី​យុទ្ធនាការ​ចាក់​វ៉ាក់សាំង​កូវី​ដ​បានចាប់ផ្តើម