​ដោយ​៖ រ៉ា​ម៉ន / ភ្នំពេញ​៖ លោក ឃួ​ង ស្រេង អភិបាល​រាជធានី​ភ្នំពេញ និង​ជា​ប្រធាន គណៈបញ្ជាការ​ឯកភាព រាជធានី​ភ្នំពេញ បាន​ជំរុញ​ឱ្យ​គណៈបញ្ជាការ​ឯកភាព​ខ​ណ្ឌ ទាំង​១៤ និង​កម្លាំង​មាន​សមត្ថកិច្ច​ទាំងអស់ ត្រូវ​រួមគ្នា ធ្វើយ៉ាងណា រក្សា​ឱ្យបាន​នូវ​សន្តិសុខ ជូន​ប្រជាពលរដ្ឋ ព្រោះថា កិច្ចការងារ ការពារ​សន្តិសុខ សុវត្ថិភាព​ជូន​ប្រជាពលរដ្ឋ វា​ជា​កិច្ចការងារ​របស់​អាជ្ញា​ធរ និង​កងកម្លាំង​ចំណុះឱ្យ​គណៈបញ្ជាការ​ឯកភាព​នេះឯង ត្រូវអនុវត្ត​ឱ្យបាន​ល្អ​។​

​ការជំរុញ​បែបនេះ​របស់លោក ឃួ​ង ស្រេង បានធ្វើ​ឡើង នៅ​រសៀល​ថ្ងៃទី​១៤ កក្កដា ឆ្នាំ​២០២២ ក្នុង​កិច្ចប្រជុំ​គណៈបញ្ជាការ​ឯកភាព រាជធានី​ភ្នំពេញ នៅ​សាលា​រាជធានី​ភ្នំពេញ ។​

​លោក ឃួ​ង ស្រេង អភិបាល​រាជធានី​ភ្នំពេញ បាន​មានប្រសាសន៍ ក្នុង​កិច្ចប្រជុំ​នោះ​ថាៈ ប្រធាន​គណៈបញ្ជាការ​ឯកភាព ខណ្ឌ​ទាំង​១៤ និង​កម្លាំង​មាន​សមត្ថកិច្ច​ទាំងអស់ ត្រូវដាក់​ផែនការ ឱ្យបាន​ច្បាស់លាស់ ក្នុង​ជួរ​គណៈបញ្ជាការ​ឯកភាព​ខណ្ឌ ក្នុង​ការរក្សាសន្តិសុខ សុវត្ថិភាព ជូន​ប្រជាពលរដ្ឋ ពិសេស ការដាក់​កម្លាំង​ត្រួតពិនិត្យ​អាវុធជាតិផ្ទុះ នៅក្នុង​មូលដ្ឋាន និង​ការដាក់​កម្លាំង​ល្បាត នៅក្នុង​តំបន់​ដែល​យើង​គិតថា ស្មុគស្មាញ និង​ងាយ​រងគ្រោះ​។​

​លោក ឃួ​ង ស្រេង បានបញ្ជាក់​ថាៈ ក្នុងនាម អាជ្ញាធរ និង​កងកម្លាំង ត្រូវ​គិតថា សន្តិសុខ សុវត្ថិភាព ជូន​ប្រជាពលរដ្ឋ គឺជា​រឿង​សំខាន់ ដោយហេតុថា ទាំង​អ្នកមាន អ្នកក្រ ពួកគាត់ សុទ្ធតែ​ត្រូវការ​សន្តិសុខ ដូចគ្នា​។​

​បន្ថែម​ពីលើ​នេះ​ទៀត លោក ឃួ​ង ស្រេង ក៏បាន​ជំរុញ​ឱ្យ​អាជ្ញាធរ​ខណ្ឌ​ទាំង​១៤ ត្រូវការពារ ឱ្យបាន​នូវ​ទ្រព្យសម្បត្តិ​សាធារណៈ​របស់​រដ្ឋ ។ ប៉ុន្តែ​ទោះបីជា​យ៉ាងណាក្តី លោក ឃួ​ង ស្រេង ក៏បាន​ថ្លែង​នូវ​ការកោតសរសើរ​ផងដែរ ចំពោះ​កងកម្លាំង​ទាំង​ពីរភេទ ដែល​បាន​បង្ក្រាប ក្មេង​ទំនើង បានជា​ច្រើន​ករណី នា​ប៉ុន្មាន​ថ្ងៃ កន្លងមកនេះ​។ ក្មេង​ទំនើង​ទាំងនេះ ភាគច្រើន ជា​សិស្សសាលា ដូច្នេះ​លោក​ស្នើឱ្យ​អភិបាលខណ្ឌ និង​មន្ទីរអប់រំ យុវជន និង​កីឡា រាជធានី​ភ្នំពេញ ត្រូវ​សហការគ្នា មើល​សិស្ស​ដែល​គេច​សាលារៀន ឱ្យបាន​ម៉ឺងម៉ាត់ និង​រក​វិធី ដើម្បី​បង្ការ​ទប់ស្កាត់ ក្មេង​ទំនើង​ទាំងនេះ ឱ្យបាន​។​

​ក្នុង​កិច្ចប្រជុំ​នោះ លោក អភិបាល​រាជធានី​ភ្នំពេញ ក៏បាន​ស្នើអោយ​អាជ្ញាធរ​ខណ្ឌ​ទាំងអស់ ត្រូវ​ជំរុញ​ប្រជាពលរដ្ឋ ឱ្យទៅ​ទទួល​វ៉ាក់សាំង ដូ​ស​ជំរុញ ឱ្យបាន​គ្រប់គ្នា ព្រោះថា ជំងឺ​កូ​វីដ​-១៩ បាន​កំរើក​ឡើងវិញ​ហើយ ដែល​យើង​ត្រូវ​ប្រុងប្រយ័ត្ន​ទាំងអស់គ្នា​។​

​ក្នុងឱកាស​នោះដែរ លោក​ឃួ​ង ស្រេង ក៏បាន​ថ្លែង​នូវ​ការកោតសរសើរ​ផងដែរ​ចំពោះ​អាជ្ញាធរ និង​កងកម្លាំង​ទាំងអស់ ដែល​បាន​យក​អស់​កម្លាំងកាយ​ចិត្ត ក្នុង​កិច្ចការពារ​សន្តិសុខ សុវត្ថិភាព នៅពេល​បោះឆ្នោតក្រុមប្រឹក្សា​ឃុំ សង្កាត់ នាពេល​កន្លងមកនេះ ដែល​បានធ្វើឱ្យ​ការបោះឆ្នោត នេះ ដំណើរការ​ទៅដោយ​រលូន ជោគជ័យ និង​គ្មាន​អំពើហិង្សា ៕/V​