​ប្រែ​សម្រួលៈ​បំណង​(​ដេល្លី​ម៉េល​)៖ ការផ្ទុះកូ​វីដ​១៩​រលក​ថ្មី​កំពុង​រីក​រាលដាល​កាត់​អាស៊ី​យ៉ាង​លឿន បណ្តាល​អោយ​មាន​ការព្រមាន​អ្នកស្រុក​ចាប់ពី​នូវ៉ែល​សេ​ឡង់​ដល់​ជប៉ុន​អោយមាន​ការប្រុងប្រយ័ត្ន ដើម្បី​​បន្ថយ​ទំហំ​នៃ​ការផ្ទុះ​ជំងឺ​នេះ​ជា​ថ្មី​និង​ជួយ​កុំអោយ​ប្រព័ន្ធ​សុខាភិបាល​រង​សម្ពាធ​ពេក​។​

​កំណើន​នៃ​ការឆ្លង​ថ្មី ភាគច្រើន​ឆ្លង​អូ​មី​ក្រុង​បំប្លែង​ខ្លួន​ប្រភេទ​BA.4/5 វា​កាន់តែ​បង្ក​ការ​ប្រឈម​បន្ថែមទៀត​ដល់​អាជ្ញាធរ ដែល​បាននិងកំពុង​ប្រឈម​ដោះស្រាយ​ផលប៉ះពាល់​សេដ្ឋកិច្ច​បណ្តាល​មក​​ពី​ការផ្ទុះកូ​វីដ​នៅរលក​មុនៗ ក្នុងពេល​ពួកគេ​ក៏​ខិតខំ​ជៀសវាង​ការ​រឹតត្បិត​ឬ​ការបិទ​ខ្ទប់​ដែល​បង្ក​ការមិនសប្បាយចិត្ត​ក្នុងចំណោម​ប្រជាជន​ផងដែរ​។​

​រដ្ឋាភិបាល​នូវ៉ែល​សេ​ឡង់ កាលពី​ថ្ងៃ​ព្រហស្បតិ៍​បាន​ប្រកាស​ចែក​ម៉ាស់​និង​ឧបករណ៍​តេស្តិ៍​រហ័ស​ឥតគិតថ្លៃ​ដើម្បី​ជួយ​សម្រួល​ប្រព័ន្ធ​សុខាភិបាល​របស់​ប្រទេស ដែល​កំពុង​ដោះស្រាយ​ការហូរ​ចូល​អ្នកជំងឺ​កូវី​ដ​​និង​ផ្តាសាយ​ក្នុងពេល​អឌ្ឍគោល​ខាងត្បូង​ត្រជាក់​។​

​នូវ៉ែល​សេ​ឡង់ ដែល​មាន​ប្រជាជន​៥,១​លាន​នាក់ មាន​អ្នក​ឆ្លងកូវី​ដ​១៩​ជិត​៦៩.០០០​នាក់ ក្នុងនេះ ៧៦៥​នាក់​កំពុង​ព្យាបាល​នៅ​មន្ទីរពេទ្យ ។​

​នាយករដ្ឋមន្ត្រី​នូវ៉ែល​សេ​ឡង់ សុំអោយ​ប្រជាជន​មាន​ការប្រុងប្រយ័ត្ន​និង​ពាក់​ម៉ាស់ ចាក់​វ៉ាក់សាំង​ដូស​ជំរុញ​និង​ដាក់​ខ្លួន​នៅ​ដាច់​ពី​គេ​បើ​ឆ្លងកូវី​ដ​១៩

​នៅ​ជប៉ុន ការ​ឆ្លងកូវី​ដ​១៩​បាន​ឡើង​បាន​ឡើង​ដល់​កំរិត​ខ្ពស់​មិន​ដែល​ជួប​គិត​ចាប់តាំងពី​ដើមឆ្នាំ​។​រដ្ឋាភិបាល​បាន​អំពាវនាវ​អោយ​ប្រជាជន​មាន​ការប្រយ័ត្នប្រយែង​នៅមុន​ការ​ឈប់សម្រាក​ចុង​សប្តាហ៍​​ដ៏​វែង​និង​វិស្សមកាល​រដូវក្តៅ​របស់​សិស្សសាលា​នៅ​ពេលខាងមុខ​។​

​ជប៉ុន​បាន​រកឃើញ​អ្នក​ឆ្លង​ថ្មី​ជិត​៩៥.០០០​នាក់​កាលពី​ថ្ងៃ​ពុធ ហើយ​ចំនួន​ឆ្លង​កើន​ជាង​ពីរ​ដង​ធៀប​នឹង​មួយ​សប្តាហ៍​មុន​។​

​ដូច​នូវ៉ែល​សេឡ​ង់​ដែរ កូរ៉េខាងត្បូង​បាន​ទទួល​ការ​សរសើរ​ចំពោះ​ចម្លើយ​តប​របស់ខ្លួន​ក្នុង​ការប្រយុទ្ធ​ប្រឆាំង​កូវី​ដ​១៩ តែ​ត្រឹម​ថ្ងៃ​ពុធ​ទី​១៣​កក្កដា​ចំនួន​ឆ្លង​មួយ​សប្តាហ៍​បាន​កើន​បី​ដង​ដល់​ចំនួន​ជាង​៣៩.០០០​នាក់​ហើយ​អ្នកជំនាញ​ព្រមាន​ថា​ចំនួន​ឆ្លង​អាច​នឹង​ឡើងដល់​២០០.០០០​នាក់​ក្នុង​មួយ​ថ្ងៃ​នៅ​យ៉ាងយូរ​ត្រឹម​ពាក់កណ្តាល​ខែ​ក្រោយ​ដល់​ចុង​ខែ​កញ្ញា​។​

​អូស្ត្រាលី ក្នុងពេល​ជាមួយគ្នា​ក៏​បាន​ព្រមាន​ថា​ខ្លួន​អាច​នឹងរង​ការវាយប្រហារ​ពី​កូវី​ដ​១៩​នៅ​ពីរ​បី​សប្តាហ៍​ខាង​មុខ​ជំរុញ​ឡើង​ដោយ​មេរោគ​ប្រភេទ​BA.4/5​។​អាជ្ញាធរ​ថែមទាំង​រំពឹងថា​នឹង​មាន​អ្នក​ឆ្លង​​ថ្មី​រាប់លាន​អ្នក​ឯណោះ តែ​ច្រាន​ចោល​ការ​រឹតត្បិត​តឹងតែង​។​

​នៅពេល​ការឆ្លង​នៅ​ថៃ​ស្ថិត​ជាង​២.០០០​នាក់​ថេរ​ក្នុង​មួយថ្ងៃ ការឆ្លង​នៅ​ឥណ្ឌូនេស៊ី​កើនឡើង​ខ្ពស់​បំផុត​គិត​ចាប់តាំងពី​ខែ​មីនា​មក​។​ចំនួន​ឆ្លង​និង​ចំនួន​ចូលដេក​ពេទ្យ​ដោយកូវី​ដ​១៩​នៅ​ហ្វីលីពីន​នៅ​ទាប តែ​រដ្ឋាភិបាល​បាន​ព្រមាន​ថា​ចំនួន​ឆ្លង​នឹង​កើនឡើង​យ៉ាងតិច​២០​ដង​នៅ​យ៉ាងយូរ​ត្រឹម​ចុងខែ​។​

​ចិនដីគោក​បាន​រាយការណ៍​ចំនួន​ឆ្លង​ជា​មធ្យម​មួយ​ថ្ងៃ​ជាង​៣០០​នាក់​នៅ​ខែ​កក្កដា​នេះ គឺ​ខ្ពស់ជាង​៧០​នាក់​កាលពី​ខែមិថុនា ៕