ដោយៈ ប​.​ខុន / ភ្នំពេញៈ ទឹកស្ទឹង​នៅ​ក្រុង​ពោធិសាត់ អាច​នឹង​ឡើងដល់ ៥,៤០ ម៉ែត្រ គឺ​លើសពី​កម្រិត​ត្រូវ​ប្រកាស ឱ្យមាន​ការប្រុងប្រយ័ត្ន ០,៤០ ម៉ែត្រ នៅ​ពាក់​កណ្តាលយប់​នេះ តែ​វា​ស្រក​ទៅវិញ នៅពេល​ព្រឹក ដោយសារ​តាម​បណ្តា​ស្ទឹង នៅ​ភាគ​ខាងលើ ទឹកបាន​ស្រក ទៅវិញ​អស់ហើយ​។ ឯ​នៅ​ក្រុង​បាត់ដំបង ទឹកស្ទឹង​សង្កែ ក៏បាន​ឡើង ជិត​ដល់​កម្រិត ត្រូវ​ប្រកាស ឱ្យ​មានការ​ប្រុង​ប្រ​យ័យ ហើយ​ដែរ នៅ​ល្ងាច​ថ្ងៃទី​១៤ ខែកក្កដា នេះ​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ ក្រសួង​ធនធានទឹក និង​ឧតុនិយម បាន​ប្រាប់​ឱ្យ​រស្មី​កម្ពុជា​ដឹង នៅ​ល្ងាច​ថ្ងៃទី​១៤ ខែកក្កដា​ថាៈ ទឹកស្ទឹង​នៅ​ក្រុង​ពោធិសាត់ នៅពេល​ល្ងាច​នេះ បាន​ឡើងដល់​កម្រិត​កម្ពស់ ៥,២៥ ម៉ែត្រ បានន័យថា ឡើង​លើស​កម្រិត ត្រូវ​ប្រកាស​ឱ្យមាន​ការប្រុងប្រយ័ត្ន ០,២៥ ម៉ែត្រ​ហើយ តែ​ទឹក​មិនទាន់បាន​ហៀរ​ចូល ក្រុង​នៅឡើយ​ទេ ចាប់ពី​ក្រោយពេល នៅតាម​មាត់​ស្ទឹង ត្រូវបានធ្វើ​ទំនប់ (​ឃឿន​សួនច្បារ​) ការពារ និង​មាត់​លូ ត្រូវបាន​បិទ​រួចមក​។​

​អ្នកនាំពាក្យ​ក្រសួង​ជំនាញ​ខាងលើ បាន​និយាយ​ឱ្យដឹងទៀតថាៈ ទឹកស្ទឹង​នៅ​ក្រុង​ពោធិសាត់ អាច​នឹង​ឡើងដល់​កម្រិត​កម្ពស់ ៥,៤០ ម៉ែត្រ នៅ​កណ្តាលយប់​នេះ តែ​វា​នឹង​ស្រក​ចុះទៅ​វិញ ជា​លំដាប់ នៅពេល​ព្រឹកស្អែក ដោយសារ​ស្ទឹង​វាលវែង ទឹកបាន​ស្រក​ចុះ​ដល់​បាទ​ស្ទឹង ឯ​ស្ទឹង​ក្រវាញ ទឹក​ក៏បាន​ស្រក​ចុះ ជា​លំដាប់​វិញ​ដែរ​។​

​ចំណែកឯ​ក្រុង​បាត់ដំបង់​វិញ លោក ចាន់ យុ​ត្ថា បានបញ្ជាក់​ថាៈ នៅពេល​ល្ងាច​នេះ ទឹកស្ទឹង​សង្កែ បាន​ឡើងដល់​កម្រិត ១៣ ម៉ែត្រ តែ​វា​មិនអាច​ឡើងដល់​កម្រិត ១៣,៨០ ម៉ែត្រ ដែលជា​កម្រិត​កម្ពស់ ត្រូវ​ប្រកាស​ឱ្យមាន​ការប្រុងប្រយ័ត្ន ដោយសារ​ទឹក​ហូរ ចូល​តាម​លូ នោះទេ ដោយសារ​យើង បាន​បិទទ្វារ​នៃ អាងទឹក​ពហុ​បំណង សេក​សក មួយរយៈ ដើម្បី ឱ្យ​ទឹកស្ទឹង​សង្កែ ស្រក​ចុះ ក្នុងពេលដែល​ភាគ​ខាងលើ លែងមាន​ភ្លៀង ធ្លាក់​ខ្លាំង​៕/V​