​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អាជ្ញាធរ​បាន​និយាយថា ការ​រអិល​បាក់​ភក់​បាន​សង្កត់​លើ​សាលាបឋមសិក្សា​ជនបទ​មួយ​កន្លែង​នៅលើ​ភ្នំ​ភាគខាងត្បូង​នៃ​ទីក្រុង​មេឌែល​លីន (Medellin) កាលពី​ថ្ងៃ​ព្រហស្បតិ៍​ទី​១៤​កក្កដា ដោយ​សម្លាប់​កុមារ​តូចៗ​បីនាក់ បន្ទាប់​ពី​ភ្លៀង​ធ្លាក់​ខ្លាំង​បាន​បោកបក់​លើ​ភាគ​ខាងជើង​និង​ខាងលិច​របស់​កូឡុំប៊ី​។​

​មន្ត្រី​នៅ​ក្នុង​ខេត្ត​អេ​នទី​អូ​គៀ (Antioquia) បាន​និយាយថា កុមារ​ប្រហែល ២០ នាក់​កំពុង​អង្គុយ​នៅក្នុង​អាហា​រដ្ឋា​ន​នៃ​សាលា​ឡាឡេ​ចៀ (La Lejia) នៅពេល​ការ​រអិល​បាក់​ភក់​វាយប្រហារ​។ ភាគច្រើន​នៃ​ពួកគេ​បាន​រត់គេចខ្លួន​ដោយ​គ្មាន​គ្រោះថ្នាក់ ប៉ុន្តែ​កុមារ​បី​នាក់​ដែល​មាន​អាយុ​ក្រោម ៦ ឆ្នាំ​បាន​ស្លាប់ ហើយ​ក្មេង​ពីរ​នាក់​ដែល​គេ​ជីក​យកចេញ​ពី​អគារ ត្រូវបាន​បញ្ជូន​ទៅ​មន្ទីរពេទ្យ​។​

​លោក វ័ន ប៉ា​ប្លូ ឡូប៉េស (Juan Pablo Lopez) លេខាធិការ​នៃ​ការអភិវឌ្ឍ​ដែនដី​របស់​ខេត្ត​អេ​នទី​អូ​គៀ បាន​និយាយថា​ដី​ដែល​ជ្រៀប​ទឹក​បាន​រលុង​ហើយ​រអិល​ធ្លាក់ចុះ​ពី​ជិត​កំពូលភ្នំ​គ្រប​លើ​សាលា​​រៀន​ដែល​ស្ថិតនៅ​តំបន់​ក្បែរ​ទីក្រុង​អេន​ដេស (Andes)​ចម្ងាយ​ធ្វើដំណើរ​ប្រហែល​បី​ម៉ោង​ពី​ទីក្រុង​មេឌែល​លីន​។​

​អាជ្ញាធរ​បាន​និយាយថា ការ​រអិល​បាក់​ដី​មួយ​ផ្សេងទៀត​នៅ​ជាយក្រុង​មេឌែល​លី​ន​បាន​សម្លាប់​មនុស្ស​ពីរ​នាក់​កាលពី​ថ្ងៃ​ព្រហស្បតិ៍​៕

​ក្រុម​អ្នក​ជួយ​សង្គ្រោះ​និង​អ្នកស្រុក​កំពុង​ស្វែងរក​អ្នក​នៅ​រស់​ក្នុង​ហេតុការណ៍​រអិល​បាក់​ភក់​នៅ​សាលា​ឡាឡេ​ចៀ