​ប្រែ​សម្រួលៈ​បំណង​(CNA)៖ ប្រធានាធិបតី​ស្រីលង្កា​បាន​ដាក់​ពាក្យសុំ​លាឈប់​ពី​តំណែង​ក្រោយ​លោក​ជិះ​យន្តហោះ​ទៅដល់​សិង្ហ​បុរី​ភ្លាម​កាលពី​ថ្ងៃ​ព្រហស្បតិ៍​ទី​១៤​កក្កដា នៅ​ពេល​តែ​មួយ​ថ្ងៃក្រោយ​លោក​​ជិះ​យន្តហោះ​យោធា​ភៀសខ្លួន​ទៅ​កាន់​កោះ​ម៉ាល់​ឌី​វ ចំ​ពេល​ពួក​បាតុករ​សំរុកចូល​គេហដ្ឋាន​ផ្លូវការ​របស់​លោក​ដើម្បី​បង្ខំ​អោយ​លោក​លាឈប់​ដោយសារតែ​វិបត្តិ​សេដ្ឋកិច្ច​មហា​ធ្ងន់ធ្ងរ​។​

​អ្នកនាំពាក្យ​ប្រធាន​សភាជាតិ​បាន​និយាយថា លោក ហ្គោ​តាបា​យ៉ា រ៉ា​ចា​ប៉ាក់​សា​(Gotabaya Rajapaksa)​បាន​អ៊ីម៉េល​ពាក្យសុំ​លាឈប់​របស់លោក​ហើយ​វា​នឹង​ត្រូវ​ពិនិត្យ​ហ្មត់ចត់​មុន​អាជ្ញាធរ​ស្រី​​លង្កា​ប្រកាស​ជា​ផ្លូវការ ប្រហែល​ជា​នៅ​ថ្ងៃ​សុក្រ​ទី​១៥​កក្កដា​នេះ ។​

​សូមបញ្ជាក់​ថា លោក​រ៉ា​ចា​ប៉ាក់​សា បាន​ភៀសខ្លួន​ចេញពី​ស្រីលង្កា​កាលពីដើម​ថ្ងៃ​ពុធ ក្រោយ​អ្នក​តវ៉ា​ប្រឆាំង​ចូលលុកលុយ​វិមាន​របស់​លោក​កាលពី​ចុង​សប្តាហ៍​ដោយ​ដំបូងលោក​ទៅ​ម៉ាល់​ឌី​វ និង​ឥឡូវ​នៅ​សិង្ហ​​បុរី​។​

លោក​ជា​ប្រធានាធិបតី​ដំបូង​គេ​ដែល​លាឈប់​កណ្តាល​អាណត្តិ​ចាប់តាំងពី​ស្រីលង្កា​ប្រកាន់​យក​ប្រព័ន្ធ​រដ្ឋាភិបាល​អាស្រ័យ​ប្រធានាធិបតី​នៅ​ឆ្នាំ​១៩៧៨​។​

​ហ្វូង​មនុស្ស​ដែល​ខ្លះ​គ្រវីទង់ជាតិ បាននាំគ្នា​រាំច្រៀង​នៅក្រៅ​ការិយាល័យ​ប្រធានា​ធិ​តី​ក្នុងទីក្រុង​កូឡុំបូ​ពេល​ឮ​ដំណឹង​លោក​រ៉ា​ចា​ប៉ាក់​សាលា​ឈប់ ដោយ​អ្នក​តវ៉ា​ប្រឆាំង​ម្នាក់​បាន​និយាយថា «​នេះ​ជា​ជោគ​​ជ័យ​ធំ​មួយ តែ​វា​គ្រាន់តែ​ជា​ជំហាន​ដំបូង​មួយ​ប៉ុណ្ណោះ​»​។​

​ក្រោម​រដ្ឋធម្មនុញ្ញ​ស្រីលង្កា នាយករដ្ឋមន្ត្រី រ៉ានី​ល វិក​ក្រេមេ​ស៊ីង​(Ranil Wickremesinghe)​នឹង​ក្លាយជា​ប្រធានាធិបតី​ស្តីទី​ជា​ស្វ័យប្រវត្តិ រហូត​ដល់​សភា​ជ្រើសរើស​បាន​ប្រធានាធិបតី​ថ្មី​ម្នាក់​។​

​លោក​រ៉ា​ចា​ប៉ាក់​សា ភរិយា​និង​អង្គរក្ស​ពីរ​នាក់​បាន​ទៅដល់​សិង្ហ​បុរី​ក្នុង​ដំណើរ​ចេញពី​ទីក្រុង​ម៉ាល់​តាម​ជើងហោះហើ​ររបស់​អារ៉ាប៊ីសាអូឌីត​មួយកា​លពី​ថ្ងៃ​១៤​កក្កដា

​គេ​ជឿ​ថា អតីត​ប្រធានាធិបតី​ម៉ាល់​ឌី​វ លោក ម៉ូ​ហា​ម៉េត ណា​ស៊ីដ​(Mohamed Nasheed)​បាន​ដើរតួនាទី​នៅ​ពីក្រោយ​ឆាក​ដើម្បីអោយ​លោក​រ៉ា​ចា​ប៉ាក់​សា​ចេញពី​ប្រទេស​ដោយខ្លាច​លោក​ត្រូវគេ​សម្លាប់​​បើ​បន្ត​នៅក្នុង​ប្រទេស​។​

​លោក​ណា​ស៊ីដ​បាន​សរសេរ​បង្ហោះ​ថា « ខ្ញុំ​ជឿថា​លោក​ប្រធានាធិបតី​នឹង​មិន​លាឈប់​ទេ​បើ​លោក​បន្ត​នៅ​ក្នុង​ស្រីលង្កា និង​បារម្ភ​តែ​លោក​អាច​បាត់បង់​ជីវិត​»​។​

​ក្នុងពេល​ជាមួយគ្នា ក្រ​សួង​ការបរទេស​សិង្ហ​បុរី​បាន​អះអាង​ថា លោក​រ៉ា​ចា​ប៉ាក់​សា ត្រូវបាន​អនុញ្ញាត​អោយ​ចូល​ក្នុងប្រទេស​សំរាប់​«​ដំណើរ​ទស្សនកិច្ច​ឯកជន​»​មួយ និង​ថា​«​លោក​មិន​បាន​សុំ​សិទ្ធិ​ជ្រកកោន​​និង​ក៏​គ្មាន​ការផ្តល់​សិទ្ធិ​ជ្រកកោន​ដែរ​»​។​

​យោងតាម​ប្រភព​ស្រីលង្កា លោក​ទំនងជា​នៅ​សិង្ហ​បុរី​មួយរយៈ មុន​បន្តដំណើរ​ទៅ​ក្រុង​ឌូ​បៃ នៃ​ប្រទេស​អារ៉ាប់​រួម​អេ​មី​រ៉ា​ត​៕