​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖​សហរដ្ឋ​អាម៉េរិក​និង​អ៊ីស្រាអែល​បាន​ចុះហត្ថលេខា​លើ​កិច្ចព្រមព្រៀង​សន្តិសុខ​ថ្មី​មួយ​កាលពី​ថ្ងៃ​ព្រហស្បតិ៍​ទី​១៤​កក្កដា​ដើម្បី​ពង្រឹង​ការរួបរួម​របស់​ពួកគេ​​ប្រឆាំង​នឹង​អ៊ីរ៉ង់ ខណៈ​ប្រធានាធិបតី​ចូ បៃ​ដិនបាន​ប្តេជ្ញា​ថា​នឹង​ប្រើប្រាស់​អំណាច​អាម៉េរិក “​ទាំងអស់​” ដើម្បី​បញ្ឈប់​ទី​ក្រុងតេអេ​រ៉ង់​ពី​ការទទួល​បាន​អាវុ​ធ​នុយក្លេអ៊ែរ​។​

​សេចក្តីប្រកាស​នេះ​ត្រូវបាន​ចុះហត្ថលេខា​ដោយ​នាយក​រដ្ឋមន្ត្រី​អ៊ីស្រាអែល​លោក យែ​រ ឡា​ភី​ដ (Yair Lapid) និង​លោកបៃ​ដិនដែល​កំពុងធ្វើដំណើ​រ​លើកដំបូង​ទៅកាន់​មជ្ឈិ​ម​បូព៌ា​ក្នុងនាម​ជា​ប្រធានា​​ធិបតី​។​

​សេចក្តីប្រកាស​នេះ​បាន​ប្តេជ្ញា​ថា សហរដ្ឋ​អាម៉េរិក “​មិន​អនុញ្ញាត​ឱ្យ​អ៊ីរ៉ង់​ទទួលបាន​អាវុធ​នុយក្លេអ៊ែរ​នោះឡើយ​” ដោយ​បញ្ជាក់​ថា​ខ្លួន​បាន​ត្រៀមលក្ខណៈ​ដើម្បី​ប្រើប្រាស់​សមាសធាតុ​ទាំងអស់​នៃ​អំណាច​ជាតិ​​របស់​ខ្លួន​ដើម្បី​ធានាបាន​នូវ​លទ្ធផល​នោះ​។​

​កិច្ច​ព្រមព្រៀង​ជា​ប្រវត្តិសាស្ត្រ​ដែល​ដាក់​ការទប់ស្កាត់​លើ​កម្មវិធី​នុយក្លេអ៊ែរ​សង្ស័យ​របស់​អ៊ីរ៉ង់​ជា​ថ្នូរ​នឹង​ការបន្ធូរបន្ថយ​ទណ្ឌកម្ម​ត្រូវបាន​បំផ្លាញ​ក្នុង​ឆ្នាំ ២០១៨ ដោយ​អតីត​ប្រធានាធិបតី​អាម៉េរិក​លោក ដូ​ណា​ល់ ត្រាំ​។ កិច្ចខិតខំ​ប្រឹងប្រែង​ដើម្បី​ស្តារ​កិច្ចព្រមព្រៀង​នេះ​ឡើង​វិញ​បាន​ជាប់គាំង​តាំងពី​ខែ​មីនា​មក​។​

​នៅពេល​សួរ​កាលពី​ថ្ងៃ​ព្រហស្បតិ៍​ថា​តើ​សហរដ្ឋ​អាម៉េរិក​ត្រៀមខ្លួន​យូរ​ប៉ុណ្ណា​ដើម្បី​ផ្តល់​កិច្ចខិតខំ​ប្រឹងប្រែង​ទាំង​នោះ លោកបៃ​ដិ​ននិយាយថា “​យើង​នឹង​មិន​រង់ចាំ​ជា​រៀងរហូត​នោះទេ​”​សម្រាប់​ការឆ្លើយតប​​ពី​សាធារណរដ្ឋ​អ៊ីស្លាម​។​

​អ៊ីស្រាអែល ដែល​មាន​ឃ្លាំង​អាវុធ​នុយក្លេអ៊ែរ​តែមួយគត់​នៅ​មជ្ឈិមបូព៌ា​ប៉ុន្តែ​មិន​ដែល​ប្រកាស​នោះ​ទេ គឺ​ប្រឆាំង​យ៉ាង​ដាច់អហង្ការ​ចំពោះ​កិច្ចព្រមព្រៀង​ជាមួយ​អ៊ីរ៉ង់​ដែល​តែងតែ​បដិសេធ​មិន​ស្វែង​​រក​គ្រាប់បែកនុយក្លេអ៊ែរ​។​

​លោក​ឡា​ភី​ដ​បាន​ព្រមាន​ថា “​ពាក្យពេចន៍​” និង “​ការទូត​” គឺ​មិន​គ្រប់គ្រាន់​ដើម្បី​រារាំង​មហិច្ឆតា​នុយក្លេអ៊ែរ​របស់​អ៊ីរ៉ង់​នោះឡើយ​។​

​លោក​បាន​និយាយថា “​រឿង​តែ​មួយគត់ ដែល​នឹង​បញ្ឈប់​អ៊ីរ៉ង់​បាន គឺ ការ​ដឹងថា ប្រសិន​បើ​ពួកគេ​បន្ត​អភិវឌ្ឍ​កម្មវិធី​នុយក្លេអ៊ែរ​របស់​ពួកគេ ពិភពលោក​សេរី​នឹង​ប្រើប្រាស់​កម្លាំង​”​។​

​ប្រធានាធិបតី​អភិរក្សនិយម​ជ្រុល​របស់​អ៊ីរ៉ង់ លោក អេ​ប្រា​ហ៊ីម រ៉ៃ​ស៊ី (Ebrahim Raisi)​បាន​ព្រមាន​អាម៉េរិក​និង​សម្ពន្ធមិត្ត​របស់​ខ្លួន​ថា ប្រទេស​របស់​លោក​”​នឹង​មិន​ទទួលយក​វិបត្តិ​ឬ​អស​ន្តិ​​សុខ​ណាមួយ​នៅក្នុង​តំបន់​នោះឡើយ​”​។​

​លោក​រ៉ៃ​ស៊ី​បាន​និយាយ​ក្នុង​សុន្ទរកថា​តាម​ទូរទស្សន៍​ថា “​រាល់​កំហុស​ដែល​បាន​ធ្វើ​នៅក្នុង​តំបន់​នេះ​នឹង​ត្រូវ​ជួប​ជាមួយនឹង​ការឆ្លើយតប​ដ៏​ខ្លាំងក្លា​និង​គួរឱ្យ​សោកស្ដាយ​បំផុត​”៕

ប្រធានាធិបតី​អាម៉េរិក​ចូ បៃ​ដិ​ន​និង​នាយករដ្ឋមន្ត្រី​ចាំផ្ទះ​របស់​អ៊ីស្រាអែល យែ​រ ឡា​ភី​ដ ចាប់ដៃ​គ្នា​មុនពេល​ចុះហត្ថលេខា​លើ​ការសន្យា​អំពី​សន្តិសុខ​នៅ​ទីក្រុង​ហ្ស៊េ​រុយ​សាឡិម​