​ប្រែ​សម្រួលៈ​បំណង​(​បាងកក​ប៉ុស្តិ៍​)៖ ក្រសួង​សុខាភិបាល​ថៃ​នៅ​ថ្ងៃ​សុក្រ​ទី​១៥​កក្កដា​នេះ​បានប្រកាស​អ្នកជំងឺ​កូវី​ដ​ចំនួន​២៣​នាក់​ទៀត​បាន​ស្លាប់​និង​មនុស្ស​១.៧៩៥​នាក់​បាន​ឆ្លងកូវី​ដ​១៩​ថ្មី​នៅ​២៤​ម៉ោង​កន្ល​​ង​ទៅ តែ​អ្នកជំនាញ​ផ្នែក​ជំងឺ​ផ្លូវដង្ហើម​ថៃ​នៅ​មន្ទីរពេទ្យ​ធំ​មួយ​បាន​និយាយថា ចំនួន​ឆ្លង​ពិត​ប្រា​​កដអាច​ដល់​ទៅ​៥០.០០០​នាក់​ឯណោះ​។​

​ថៃ​កាលពី​ថ្ងៃ​ព្រហស្បតិ៍​បាន​ប្រកាស​អ្នក​ស្លាប់​ដោយកូវី​ដ​ចំនួន​២៨​នាក់ និង​អ្នកឆ្លង​ថ្មី​២.២៥៧​នាក់​បាន​ចូល​សម្រាក​នៅ​មន្ទីរពេទ្យ​។​

​នី​ទី​ផា​តា​ណា ឈី​រ៉ា​គុល​(Nitipatana Chierakul) អ្នកជំនាញ​ជំងឺ​ផ្លូវដង្ហើម​នៅ​មន្ទីរពេទ្យ​ស៊ី​រី​រ៉ា​ច​(Siriraj)​បាន​និយាយ​កាលពី​ថ្ងៃ​ព្រហស្បតិ៍​ថា ចំនួន​ឆ្លង​ប្រចាំ​ថ្ងៃ​ពិតប្រាកដ​អាច​ខ្ពស់​ដល់​​ទៅ​៥០.០០០​នាក់ ។​ទោះជា​យ៉ាណា អ្នកជំងឺ​ភាគច្រើន​បង្ហាញ​រោគសញ្ញា​ស្រាល​ឬ​មិន​បញ្ចេញ​រោគសញ្ញា​។​

​សាស្ត្រាចារ្យ​និង​វេជ្ជបណ្ឌិត នី​ទី​ផា​តា​ណា ដែល​ជា​ប្រធាន​ផ្នែក​ជំងឺ​ផ្លូវដង្ហើម​និង​របេង​នៅ​មហាវិទ្យាល័យ​វេជ្ជសាស្ត្រ​ស៊ី​រី​រ៉ា​ច នៃ​សកល​វិទ្យាល័យ​ម៉ា​ហ៊ូ​ដូល​(Mahidol)​បាន​និយាយថា ពិចារណា​លើ​ការធ្វើ​តេស្តិ៍​​រហ័ស និង​របាយការណ៍​ពី​ក្រសួង​សុខាភិបាល​ចាប់ពី​ថ្ងៃ​៣​ដល់​៩​កក្កដា ការ​រក​ឃើញ​ចំនួន​ឆ្លង​តាម​ឧបករណ៍​តេស្តិ៍​រហ័ស​តែ​មួយ​អាច​មាន​ចំនួន​២០.០០០​នាក់​ក្នុង​មួយថ្ងៃ​។​

​លោក​បាន​បន្ថែមថា ដោយសារ​ថៃ​បច្ចុប្បន្ន​ស្ថិតក្នុង​អន្តរកាល​ពី​ការដោះស្រាយ​អ្នក​ឆ្លងកូវី​ដ​១៩​ដោយ​ប្រើ​ប្រព័ន្ធ​គ្រប់គ្រង​កណ្តាល​មួយ​ទៅកាន់​​ប្រតិបត្តិការ​សុខាភិបាល​ធម្មតា ដែល​អ្នក​ជំងឺ​ត្រូវ​ព្យា​​បាល​ក្រោម​កម្មវិធី​សុខាភិបាល​របស់​គេ អ្នក​ឆ្លង​ជំងឺ​នេះ​ប្រចាំ​ថ្ងៃ​ប្រមាណ​មួយ​ភាគ​បី​មិន​ត្រូវបាន​រាយការណ៍​ចូល​ក្នុង​របាយការណ៍​ថ្នាក់ជាតិ​។​នេះ​មានន័យថា អាច​មាន​អ្នក​ឆ្លង​ប្រមាណ​៣០.០០០​នាក់​ទៀត​តាមរយៈ​ការ​ធ្វើតេស្តិ៍​រហ័សដោយខ្លួនឯងក្នុង​មួយថ្ងៃៗ​។​

​ដោយសារ​អ្នកជំងឺ​ថ្មី​បង្ហាញ​រោគសញ្ញា​ស្រាលឬ​មិន​ចេញ​រោគសញ្ញា ពួកគេ​ភាគច្រើន​មិន​បាន​រាយការណ៍​ទៅ​អាជ្ញាធរ​ទេ​។​ជា​លទ្ធផល ចំនួន​ឆ្លង​សរុប​ក្នុង​មួយ​ថ្ងៃ​អាច​៥០.០០០​នាក់​។​

​អ្នកជំនាញ​សុខភាព​ពីរ​នាក់​ទៀត​ក៏​បង្ហាញ​ទស្សនៈ​ស្រដៀង​គ្នា​ផង​ដែរ​។​ពួកគេ​រួម​មាន​លោក យ៉ុង ពូ​វ៉ូ​រ៉ា​វ៉ាន​(Yong Poovorawan) ប្រធាន​មជ្ឈមណ្ឌល​វីរុស​វិទ្យា​នៅ​សកល​វិទ្យាល័យ​ជូឡា​ឡុងកន​ដែល​​បាន​ពណ៌នា​ការផ្ទុះកូ​វីដ​១៩​បច្ចុប្បន្ន​នៅថៃថាជា​រលក​ទី​ប្រាំមួយ​។​

​លោក​ថា​អូ​មី​ក្រុង​បំ​ប្លែងខ្លួន​BA.5 ទទួល​ខុសត្រូវ​ច្រើន​ចំពោះ​ការផ្ទុះកូ​វីដនៅ​មួយ​រយៈពេល​ចុង​ក្រោយនេះ ហើយ​រំពឹងថានឹង​កើនឡើង​ខ្ពស់​នៅ​ចុងខែ​កក្កដា ខែសីហា​មុនពេល​ធ្លាក់​មក​វិញ​។​

​វេជ្ជបណ្ឌិត ម៉ា​នូ​ន លី​ចា​វ៉េង​វ៉ុង​( Manoon Leechawengwongs) គ្រូពេទ្យ​រោគ​សួត​នៅ​មន្ទីរពេទ្យ​ឯកជន​មួយ​បាន​និយាយថា ចំនួន​ឆ្លង​ប្រកាស​ដោយ​ក្រសួង​សុខាភិបាល​ទាប ដោយសារ​តែ​ក្រសួងរាប់​យក​​តែ​អ្នក​ឆ្លងកូវី​ដតា​មរយៈ​ការពិនិត្យ​ម៉ាស៊ី​ន​ធំ​RT-PCR​។​

​សូមបញ្ជាក់​ថា ចាប់តាំងពី​កូវី​ដ​១៩​បង្ហាញ​ខ្លួន​នៅក្នុង​ព្រះរាជាណាចក្រ​នេះ​កាលពីដើមឆ្នាំ​២០២០ ថៃ​មាន​អ្នក​កើតកូ​វីដ​១៩​សរុប ៤.៥៥៤.៩៧៦​នាក់ ក្នុងនេះ​៤.៤៩៩.៩៧៥​នាក់​បាន​ជាសះស្បើយ និង​៣០.៩៥៨​នាក់​បាន​ស្លាប់​៕