​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ គោ​ជល់មក​ពី​កសិដ្ឋាន​ចិញ្ចឹមសត្វ​មី​អ៊ូ​រ៉ា (Miura)​ដ៏​គួរឱ្យ​គោរព​របស់អេ​ស្ប៉ាញ​បានសម្តែង​នៅក្នុង​ការ​រត់វ​គ្គ​ផ្តាច់ព្រ័ត្រ​ដ៏​លឿន​និង​មិន​ស្មុគស្មាញ​នៅ​ឯ​ពិធី​​បុណ្យ​សាន​ហ្វើ​មីន (San Fermín) ឆ្នាំ​នេះ​កាលពី​ថ្ងៃ​ព្រហស្បតិ៍​ទី​១៤​កក្កដា​។​

​រដ្ឋបាល​ក្នុង​តំបន់​ណា​វ៉ា​រ៉ា (Navarra) បាន​និយាយថា មនុស្ស​ប្រាំមួយ​នាក់​ត្រូវបាន​ព្យាបាល​របួស​ស្រាល​បន្ទាប់ពី​ការរត់​កាលពី​ថ្ងៃ​ព្រហស្បតិ៍​ដែល​មាន​រយៈពេល​ជាង​ពីរ​នាទី​។ ដំបូង​ឡើយ​កាកបាទ​​ក្រហម​អេ​ស្ប៉ាញ​បាន​និយាយថា មនុស្ស​ពីរ​នាក់​ត្រូវការ​ការព្យាបាល​។​

​គ្មាន​ករណី​របួស​ដោយ​សារ​ស្នែងគោ​គាស់​ណាមួយ​ត្រូវបាន​រាយការណ៍​នោះទេ ខណៈ​គោ​នៅ​មី​អ៊ូ​រ៉ា ដែល​ល្បី​ខាង​ស្មារតី​ប្រុងប្រយ័ត្ន​ខ្ពស់​និង​ល្បឿន​ប្រតិកម្ម​រហ័ស​របស់​ពួក​វា​ត្រូវ​បាន​រក្សាទុក​ជា​ចម្បង​​នៅក្នុង​កន្លែង​តូច​មួយ​និង​មិន​សូវ​បានកត់សម្គាល់​ឃើញ​អ្នក​រត់ប្រណាំង​នោះទេ នៅ​ពេល​ពួកគេ​រត់​ប្រជែង​សំដៅទៅ​សង្វៀន​គោ​ជល់​។​

​អ្នក​រត់ប្រណាំង​ម្នាក់​បាន​រួចផុត​ពី​របួស​ធ្ងន់ធ្ងរ នៅពេល​ស្នែង​គោមួយ​ហាក់​ទម្លុះ​ផ្នែក​ខាងស្តាំ​នៃ​ក្បាល​របស់​គាត់ មុន​ពេល​គាត់​ដួល​ទៅ​ដី​។​

​ការ​រត់ប្រណាំង​លើក​ទី​ប្រាំបី​និង​លើក​ចុងក្រោយ​នៃ​ពិធី​បុណ្យ​នេះ​បាន​ឃើញ​មនុស្ស​រាប់រយ​នាក់ ដែល​ភាគច្រើន​ជា​បុរស​និង​ចូលរួម​តិចជាង​ធម្មតា​សាកល្បង​ភាពរហ័សរហួន​របស់​ពួកគេ​ដើម្បី​អមដំណើរ​​គោបា​ចំនួន​ប្រាំមួយ​ក្បាល​និង​ការរត់​កាច់ចង្កូត​លឿនៗ​របស់​ពួកគេ​តាម​បណ្ដោយ​ផ្លូវ​ប្រវែង ៨៧៥ ម៉ែត្រ​ឆ្លងកាត់​ទីក្រុង​ផាម​ផ្លូណា (Pamplona) ទៅកាន់​សង្វៀន​គោ​ជល់​របស់​ទីក្រុង​។ ​គោ​ជល់​ទាំងនោះ​នឹង​ត្រូវ​សម្លាប់​ដោយ​អ្នក​សម្លាប់​គោ​អាជីព​នៅ​យប់​ថ្ងៃ​ដដែល​។​

​អ្នកទស្សនា​រាប់ម៉ឺន​នាក់​ចូលរួម​ពិធីបុណ្យ​នៅ​ទីក្រុង​ផាម​ផ្លូណា ដែល​កត់ត្រា​ជា​អមតៈ​នៅក្នុង​រឿង​ប្រលោមលោក The Sun Also Rises​ឆ្នាំ ១៩៦២ របស់លោក អឺ​ណេ​ស ហេ​មីង​វ៉េ (Ernest Hemingway)៕

​អ្នកទស្សនា​រាប់ម៉ឺន​នាក់​ចូលរួម​ពិធីបុណ្យ​រត់ប្រណាំង​ជាមួយ​គោ​ជល់​នៅ​ទីក្រុង​ផាម​ផ្លូណា​កាលពី​ថ្ងៃ​ព្រហស្បតិ៍​