​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ នេះ​ជា​គ្រា​ដ៏​គួរ​ឱ្យ​រំភើបចិត្ត​បំផុត​ពេល​ដែល​មេ​ដំរី​ត្រូវបាន​ជួយសង្គ្រោះ នៅ​ពេល​គ្រូពេទ្យ​សត្វ​អនុវត្ត​ការសង្គ្រោះ​ដង្ហើម (CPR) ដោយ​លោត​ឡើង​លើ​ទ្រូង​របស់​វា ខណៈ​កូនដំរី​ញី​ដ៏​តូច​របស់​វា​កំពុង​សម្លឹង​មើល​ទាំង​បារម្ភ​។​

​មេ​ដំរី​អាយុ​១០​ឆ្នាំ និង​កូន​មួយ​ក្បាល​របស់​វា​បាន​រអិល​ធ្លាក់ចូល​លូ​បេតុង​មួយ ចំ​ពេល​មាន​ភ្លៀង​ធ្លាក់​ខ្លាំង​នៅ​ខេត្ត​ណា​ខន​ណា​យ៉ុក (Nakhon Nayok) ភាគ​កណ្តាល​ប្រទេស​ថៃ​កាលពី​រសៀល​ថ្ងៃ​ពុធ​ទី​១៣​កក្កដា​។​

​ភ្លៀង​ខ្លាំង​បានធ្វើឱ្យ​ស្មៅ​សើម​និង​បែក​ភក់ បណ្តាល​ឱ្យ​ដំរី​ទាំង​ពីរ​រអិល​ធ្លាក់​ចូល​ទៅ​ក្នុង​លូ​ជម្រៅ ២,១៣ ម៉ែត្រ​។​

​ភ្លៀង​មូសុង​ខ្លាំងក្លា​សឹងតែ​មិន​អាច​ឱ្យ​គេ​ទាញ​ដំរី​ទាំងពីរ​ឡើង​លើ​រួច ខណៈ​ក្រុម​គ្រូពេទ្យ​សត្វ​បាន​ហៅ​អេស្កាវ៉ាទ័រ​ឱ្យជួយ​ទាញ​ថនិកសត្វ​ដ៏​ធំ​នេះ​ចេញពី​លូ​។​

​ប៉ុន្តែ​បន្ទាប់ពី​មេ​ដំរី​ប៉ះទង្គិច​ចំ​ក្បាល​ហើយ​សន្លប់​ភ្លាមៗ ជីវិត​របស់​វា​ក៏​ជួប​គ្រោះថ្នាក់​។​

​វីដេអូ​មិន​គួរ​ឱ្យ​ជឿ​នេះ​បានបង្ហាញ​ប្រតិបត្តិការ​បី​ម៉ោង​ដើម្បី​ទាញ​ដំរី​ចេញ​មក​ដោយ​សុវត្ថិភាព ហើយ​បន្ទាប់មក​ទើប​អាច​ជួយសង្គ្រោះ​ជីវិត​មេ​ដំរី​។​

​លោកស្រី​វេជ្ជបណ្ឌិត ឆា​ណាន​យ៉ា កាន់​ឆា​ណា​សារ៉ាក់ (Chananya Kanchanasarak) នាយក​ឧទ្យាន​ជាតិ​បាន​និយាយថា “​គេ​សឹងតែ​មិន​អាច​ចូល​ទៅ​ជិត​កូនដំរី​បាន​ព្រោះ​មេ​វា​នៅ​ក្បែរ​វា​។​ពួកយើង​​បាន​ចាក់​ថ្នាំ​សន្លប់​៣​ម្ជុល​ដល់​មេ​វា ប៉ុន្តែ​មេ​វា​នៅតែ​កម្រើក​ទៅ​រក​កូន​វា មុន​ពេល​សន្លប់ ហើយ​បោក​ក្បាល​នឹង​ថ្ម​លូ​”​។​

​អនុរក្ស​ឧទ្យាន​បារម្ភ​ថា មេ​ដំរី​នឹង​ស្រែក​រក​ជំនួយ​ពី​ហ្វូង​ដំរី​ចំនួន ៣០ ក្បាល​នៅ​ក្បែរ​នោះ ប្រសិន​បើ​ពួកគេ​បង្ខំ​ទាញ​កូនដំរី ដូច្នេះ​ពួកគេ​បាន​ទូរស័ព្ទ​ទៅ​គ្រូពេទ្យ​សត្វ​។​

​ក្រុម​មួយ​បាន​បង្កើត​របាំង​បណ្ដោះអាសន្ន​ដើម្បី​ទប់ស្កាត់​ហ្វូង​សត្វ ដែល​អាច​មាន​ហិង្សា កុំឱ្យ​ចូល​ទៅ​ជិត​។​

​ខណៈ​មេ​ដំរី​រួចផុត​ពី​លូ​នោះ កូនដំរី ដែល​ជាប់​នៅ​មួយ​យប់​មុន​នោះ បាន​បឺត​ទឹកដោះគោ ដែល​ផ្តល់​ភាព​ធូរស្រាល​យ៉ាងខ្លាំង​ដល់​ពេទ្យសត្វ​។​

​រថយន្តស្ទូច​មួយ​ត្រូវបាន​ប្រើ​ដើម្បី​ទាញ​មេ​ដំរី​ចេញពី​លូ​មុនពេល​ពេទ្យសត្វ​បន្ត​ការងារ​របស់​ពួកគេ​។​

​គ្រា​ដែល​មេ​ដំរី​បាន​មក​ដល់​លើ​ដី​ដោយ​សុវត្ថិភាព ពេទ្យសត្វ​បី​នាក់​បាន​លោត​លើ​វា​ដើម្បី​សង្គ្រោះ​ដង្ហើម​វា និង​ដា​ស់វា​ឱ្យ​ក្រោក​ឡើង ព្រោះ​ផល​ប៉ះពាល់​ពី​ការ​បោក​ក្បាល​របស់​វា​អាច​ធ្វើឱ្យ​វា​ឈឺចាប់​។​

​សំណាងល្អ មេ​ដំរី​ភ្ញាក់ឡើង​។​

​អនុរក្ស​ឧទ្យាន​និង​គ្រូ​ពេទ្យសត្វ​បាន​ចាកចេញ​ពី​កន្លែងកើតហេតុ​ដើម្បី​ឱ្យ​ដំរី​ទាំងពីរ​ចូលរួម​ជាមួយ​ហ្វូង​របស់​វា​វិញ​នៅ​ក្នុងព្រៃ​៕

​ដំរី​មេ​និង​កូន​ត្រូវបាន​សង្គ្រោះ​ពី​លូ​កាលពី​ថ្ងៃ​ពុធ​នៅ​ខេត្ត​ណា​ខន​ណា​យ៉ុក