​ប្រែ​សម្រួលៈ​បំណង​(BLOOMBERG)៖​ធនាគារ​កណ្តាល​មី​យ៉ាន់​ម៉ា​បាន​បញ្ជា​ទៅ​បណ្តា​ក្រុមហ៊ុន​និង​អ្នក​ខ្ចី​លុយ​ផ្អាក​ការទូទាត់​បង់​សង​កំចី​បរទេស​នៅ​ក្នុង​វិធានការ​ចុងក្រោយ​មួយ​ដើម្បី​ការពារ​ទុនបំរុង​បរទេស​របស់​ជាតិ​ដែល​កាន់តែ​ខើច​ទៅ​។​

​សូមបញ្ជាក់​ថា នៅ​ខែ​នេះ អ្នកនាំពាក្យ​រដ្ឋាភិបាល​មី​យ៉ាន់​ម៉ា​បាន​ប្រាប់​អ្នកយកព័ត៌មាន​ថា មី​យ៉ាន់​ម៉ា​ត្រូវ​ចំណាយ​ប្រមាណ​៧០០​លាន​ដុល្លារ​សំរាប់​ទូទាត់​សង​ឥណទាន​ក្នុងស្រុក​និង​បរទេស​ក្នុង​មួយឆ្នាំៗ​។​

​ក្នុង​លិខិត​មួយ​ផ្ញើ​ទៅ​បណ្តា​ធនាគារ​ដែល​ទទួលបាន​សិទ្ធិ​ធ្វើ​អាជីវកម្ម​ដោះដូរ​រូបិយ​បណ្ណ​បរទេស ទេសាភិបាលរង​ធនាគា​រលោក វីន ថ​រ បាន​បញ្ជា​ទៅ​អ្នក​ខ្ចី​លុយ​អោយ​ផ្អាក​ការទូទាត់​កា​ប្រាក់​និង​ប្រាក់​ដើម​​របស់​ឥណទាន​បរទេស​ផ្សេងៗ​។​សេចក្តីណែនាំ​តំរូវអោយ​បណ្តា​ធនាគារ​ដែល​ទទួលបាន​សិទ្ធិ ជូនដំណឹង​ទៅ​អតិថិជន​អាជីវកម្ម​របស់​ខ្លួន​ដែល​ជំពាក់​បំណុល​បរទេស ត្រូវ​កែសម្រួល​កាលវិភាគ​ទូទាត់​សង​ប្រាក់​​ឡើង​វិញ​ជាមួយ​នឹង​ម្ចាស់​កំចី​បរទេស​។​

​សារាចរណ៍​ណែនាំ​បាន​និយាយទៀតថា អ្នកធ្វើអាជីវកម្ម​ដូរ​ប្រាក់​បរទេស ត្រូវ​ប្តូរ​រូបិយ​បណ្ណ​បរទេស​ទៅ​ជា​ប្រាក់ក្យាត​(kyat)​ក្នុង​តំលៃ​មួយ​ដុល្លារ​ស្មើនឹង​១.៨៥០​ក្យាត​។​

​យោង​តាម​ទិន្នន័យ​ចង​ក្រោង​ដោយ​សារព័ត៌មាន​Bloomberg បណ្តា​ក្រុមហ៊ុន​នៅ​មី​យ៉ាន់​ម៉ា​ទទួលបាន​ឥណទាន​ភាគច្រើន​ជា​ដុល្លារ​យ៉ាងតិច​១,២​ពាន់​លាន​ដុល្លារ​។​អ្នក​ខ្ចី​ប្រាក់​ទាំងនោះ រួម​មាន​ក្រុមហ៊ុន​​ទូរគមនាគមន៍​Ooredoo Myanmar Ltd ក្រុមហ៊ុន​អចលនទ្រព្យ​City Square Commercial Co. និង​ក្រម​ហ៊ុន​ទូរគមនាគមន៍​Apollo Towers Myanmar Ltd និង Irrawaddy Green Towers Ltd​។​

​សូមបញ្ជាក់​ថា រដ្ឋាភិបាលយោធា​មី​យ៉ាន់​ម៉ា បាន​តឹង​បន្តឹង​ច្បាប់​ដោះដូរ​រូបិយ​បណ្ណ​បរទេស​ក្រោយ​រូបិយ​បណ្ណ​ជាតិ​បាត់បង់​តំលៃ​ខ្លួន​អស់​មួយ​ភាគ​បី​ទល់​នឹង​ប្រាក់​ដុល្លារ​កាលពី​ឆ្នាំមុន ក្រោយ​រដ្ឋប្រហារ​ដែល​​នាំ​ដល់​ការ​បង្កក​ទុនបំរុង​របស់​ប្រទេស​នេះ​ខ្លះ​នៅ​អាម៉េរិក​និង​ការផ្អាក​ជំនួយ​ពហុភាគី ដែល​សុទ្ធតែ​ជា​ប្រភព​ផ្គត់ផ្គង់​រូបិយ​បណ្ណ​បរទេស​។​

​អ្នករកស៊ី​ដូរ​ប្រាក់​នៅ​មី​យ៉ាន់​ម៉ា តំរូវ​អោយ​ដូរ​រូបិយ​បណ្ណ​បរទេស​ទៅ​ជា​ប្រាក់ក្យាត​តាម​តំលៃ​កំណត់​ដោយ​ធនាគារកណ្តា​ល​

​រដ្ឋាភិបាល​មី​យ៉ាន់​ម៉ា បាន​ហាម​ការនាំ​ចូល​រថយន្ត​និង​ទំនិញ​ទំនើប ព្រមទាំង​រឹតបន្តឹង​ការនាំ​ចូល​ប្រេងឥន្ធនៈ រួម​ទាំង​ប្រេងឆា​ដើម្បី​រក្សា​ទុនបំរុង​អោយ​នៅ​ខ្ពស់​។​

​កាលពី​ថ្ងៃ​ព្រហស្បតិ៍​ទី​១៤​កក្កដា ធនាគារ​កណ្តាល​ក៏​អនុញ្ញាត​អោយ​បណ្តា​ក្រុមហ៊ុន​បរទេស​បង្កើត​ស្ថាប័នហិរញ្ញវត្ថុ​មិន​ជា​ធនាគារ​ទាំង​ស្រុងរ​បស់​ខ្លួន​ផ្ទាល់ ឬក៏​រកស៊ី​រួម​ជា​ម្ចាស់​ភាគហ៊ុន​មី​យ៉ាន់​ម៉ា ក្នុង​​បំណង​ជំរុញ​ទុន​បរទេស​៕