​ដោយៈ​ប​.​ខុន / ភ្នំពេញៈ ការ​បោ​សម្អាត​ខ្សាច់ នៅលើ​ផ្លូវ​ថ្មើរជើង និង​វិថី​ឆ្នេរ​អូរត្រេះ ដែល​បានធ្វើ តាំងពី​ថ្ងៃទី​១៤ ខែកក្កដា មកដល់​ព្រឹក​ថ្ងៃទី​១៥ ខែកក្កដា ដោយមាន​ការចូលរួម​ពី​ម​កម្លាំង​សាលាក្រុង មន្ទីរ​សាធារណការ និង​ក្រុមហ៊ុន​ដឹកជញ្ជូន​កាកសំណល់ មិនទាន់បាន​រួច​នៅឡើយ​ទេ ដោយសារ​ភ្លៀង ខ្យល់​នៅតែ​ខ្លាំង បក់បោក​ខ្សាច់​ពី​តាម​ឆ្នេរ មកដល់​លើផ្លូវ​ថែម​បន្តបន្ទាប់​ទៀត ដូចជា​នៅ​ព្រឹក​នេះ មាន​ភ្លៀង​ខ្លាំង ខ្យល់​ខ្លាំង ធ្វើឱ្យ​ដួលរលំ​បាក់​ដើម​ដូង​ដាំ​ថ្មី​មួយចំនួន និង​ប៉ម​យាម​នៅតាម​ឆ្នេរ​។

​លោក អ៊ី សុខ​ឡេង អភិបាលក្រុង​ព្រះសីហនុ បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​១៥ ខែកក្កដា ឆ្នាំ​២០២២​ថា​: ការ​បោសសម្អាត​ខ្សាច់ ដែល​បោកបក់​តាម​ខ្យល់ និង​ទឹករលក ពី​តាម​ឆ្នេរ មក​ទើរ​លើផ្លូវ​ថ្មើរជើង និង​វិថី​ឆ្នេរ​អូរត្រេះ ដែល​បានធ្វើ​តាំង​ពីថ្ងៃ​ម្សិលមិញ មកដល់​ថ្ងៃនេះ​មិនទាន់បាន​រួច​នៅឡើយ​ទេ ដោយសារ​ភ្លៀងខ្យល់​នៅតែមាន​ផាត់​ខ្សាច់ មកដល់​ផ្លូវ​ថែមទៀត គ្រាន់តែ​មិន​ច្រើន​ដូច​ថ្ងៃមុន​។

​លោក​អភិបាលក្រុង បាន​និយាយ​ឱ្យដឹងទៀតថា​: ក្រុមការងារ​បោស​ឈូស​សម្អាត​ខ្សាច់ នៅលើ​ផ្លូវ ព្រឹក​នេះ មានការ​ចូលរួម​ពី​កម្លាំង​សាលាក្រុង ក្រុមហ៊ុន​ដឹក​កាកសំណល់ និង​មន្ទីរ​សាធារណការ​ខេត្ត​។ នៅ​ព្រឹក​ថ្ងៃទី​១៥ ខែកក្កដា​នេះ មាន​ភ្លៀង​ខ្លាំង ខ្យល់​ខ្លាំង បាក់​រលំ​ដើម​ដូង​ដាំ​ថ្មី ជាង​១០ ដើម និង​រលំ​ប៉ម នៅតាម​ឆ្នេរ​មួយ និង​ទ្រេត​មួយ​។ ភ្លៀង​ខ្លាំង តែ​មិនបាន​ធ្វើឱ្យមាន​ការលិចលង់​ក្រុង​ទេ ដោយសារ​កម្លាំង​នៅតាម​មូលដ្ឋាន និង​កម្លាំង​អនាម័យ​ក្រុង បាន​បោ​សម្អាត​សំរាម​តាម​ដងផ្លូវ និង​មាត់​លូ​ជាប្រចាំ ជាពិសេស​នៅពេល​មាន​ភ្លៀង ដើម្បី​កុំ​ស្ទះផ្លូវ​ទឹក​ហូរ​។

​លោក ហេង សោភ័ណ​រិ​ទ្ធ ប្រធាន​មន្ទីរ​ធនធានទឹក​និង​ឧតុនិយម ខេត្ត​ព្រះសីហនុ បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​១៥ ខែកក្កដា​ថា​: ភ្លៀង​នៅតែ​បន្ត​ធ្លា​ក់លើ​ខេត្ត​ព្រះសីហនុ តែ​ខ្យល់​នៅថ្ងៃនេះ បាន​ថយឥទ្ធិពល​ទៅវិញ​ហើយ​។ បរិមាណ​ទឹកភ្លៀង ធ្លាក់​រយៈពេល ២៤ ម៉ោង លើ​ក្រុងព្រះសីហនុ ត្រឹម​ព្រឹក​ថ្ងៃទី​១៥ ខែកក្កដា​មាន​កម្រិត ៨២ មី​លី​ម៉ែត្រ​។

​ក្រសួង​ធនធានទឹក និង​ឧតុនិយម កាលពី​ថ្ងៃទី ១២ ខែកក្កដា ឆ្នាំ​២០២២ បាន​ជូនដំណឹង ស្តីពី​ការ​ព្យាករ​ស្ថានភាព​អាកាសធាតុ សម្រាប់​ពីថ្ងៃ​ទី​១៣ ដល់​ថ្ងៃទី​១៩ ខែកក្កដា​ថា​: ព្រះរាជាណាចក្រ​កម្ពុជា ក្នុងអំឡុង​មួយ​សប្តាហ៍​នេះ ទទួល​ឥទ្ធិពល​ជា​បន្តបន្ទាប់​ដោយនៅ​ថ្ងៃទី​១៣ និង​១៤ ខែកក្កដា ឥទ្ធិពល​ពី​ប្រព័ន្ធ​សម្ពាធ​ទាប ITCZ ភ្ជាប់​ទៅនឹង​សម្ពាធ​ទាប​សកម្ម នៅលើ​សមុទ្រ​ចិន​ខាងត្បូង និង​ខ្យល់មូសុង​និរតី ក្នុង​កម្រិត​ពី​មធ្យម​ទៅ​ខ្លាំង​។ ពីថ្ងៃ​ទី​១៥ ដល់​១៩ ខែកក្កដា​ឥទ្ធិពល​ពី​ជ្រលង​សម្ពាធ​ទាប​ឥណ្ឌា និង​ខ្យល់មូសុង​ក្នុង​កម្រិត ពី​ខ្សោយ​ទៅ​មធ្យម​។

​ក្នុង​សេចក្តី​ដំណឹង បាន​សរសេរ​ទៀតថា​: ស្ថានភាព​បែប​ខាងលើ នឹងធ្វើ​ឲ្យ​បណ្តា​ខេត្ត នៅ​តំបន់​វាលទំនាប​កណ្តាល មាន​សីតុណ្ហភាព អប្បបរមា មាន​ពី​២៣ ទៅ ២៥ អង្សា​សេ សី​តុ​ណ្ណ​ភាព អតិបរមា មាន​ពី ៣៣ ទៅ ៣៥ អង្សា​សេ​។ អាចមាន​ភ្លៀង ក្នុង​កម្រិត​ពី​តិច​ទៅ​បង្គួរ លាយឡំ​ទៅដោយ​ផ្គរ រន្ទះ និង​ខ្យល់​កន្ត្រាក់​។

​សម្រាប់​បណ្តា​ខេត្ត​ជាប់​ជួរ​ភ្នំ​ដងរែក និង​ខ្ពង់រាប​ឦសាន​មាន​សីតុណ្ហភាព អប្បបរមា​ពី ២៣ ទៅ ២៥ អង្សា​សេ សីតុណ្ហភាព អតិបរមា មាន​ពី ៣២ ទៅ ៣៤ អង្សា​សេ​។​អាចមាន​ភ្លៀង ក្នុង​កម្រិត​ពី​តិច​ទៅ​បង្គួរ លាយឡំ​ទៅដោយ​ផ្គរ រន្ទះ និង​ខ្យល់​កន្ត្រាក់ ។

​សម្រាប់​តំបន់​មាត់សមុទ្រ មាន​សីតុណ្ហភាព អប្បបរមា​ពី ២៣ ទៅ ២៥ អង្សា​សេ សី​តុ​ណ្ណ​ភាព អតិបរមា មាន​ពី ៣១ ទៅ ៣៣ អង្សា​សេ​។ នៅ​ថ្ងៃទី​១៣ និង​១៤ ខែកក្កដា អាចមាន​ភ្លៀង ក្នុង​កម្រិត​ពី​មធ្យម​ទៅ​ច្រើន​អាច​បង្ក​ជា​ជំនន់​ទឹកភ្លៀង នៅ​ផ្នែក​ខ្លះ​ក្នុងភូមិ​សាស្ត្រ​ខេត្តកោះកុង និង​ខេត្ត​ព្រះសីហនុ ។ នៅលើ​ផ្ទៃសមុទ្រ​មាន​ភ្លៀងខ្យល់​ខ្លាំង និង​រលក​សមុទ្រ​ខ្ពស់ ។ នៅ​អំឡុង​ពីថ្ងៃ​ទី​១៥ ដល់​១៩ ខែកក្កដា នឹង​អាចមាន​ភ្លៀង​ពី​តិច​ទៅ​មធ្យម ៕/V​