​ដោយ​: ពៅ​និមល​/​ភ្នំពេញ​៖ ក្នុងជំនួប​ពិភាក្សា​ការងារ​កាលពី​កន្លងទៅនេះ លោក​រដ្ឋមន្ត្រី​ក្រសួងពាណិជ្ជកម្ម បានស្នើ​ឱ្យ​ភាគី​មី​យ៉ាន់​ម៉ា​ពិនិត្យ​លទ្ធភាព​ជួយ​ជំរុញឱ្យមាន​ការនាំ​ចូល​ផលិតផល​កសិកម្ម​មាន​សក្តានុពល​ពី​កម្ពុជា ដូចជា​៖ ស្វាយ ចេក​ស​ម្ងួ​ត មៀន ផ្លែ​បឺ​រ គ្រាប់ស្វាយចន្ទី ដំឡូងជ្វា ម្ទេស ល្ង និង​ស្ករត្នោត ទៅកាន់​ទីផ្សារ​មី​យ៉ាន់​ម៉ា​បន្ថែមទៀត​។​

​លោក​រដ្ឋមន្ត្រី ប៉ាន សូរ​ស័ក្តិ ជា​ប្រធាន នៃ​កិច្ចប្រជុំ​រដ្ឋមន្ត្រី​សេដ្ឋកិច្ច​អាស៊ាន និង​កិច្ចប្រជុំ​ក្រុមប្រឹក្សា​សហគមន៍​សេដ្ឋកិច្ច​អាស៊ាន​ឆ្នាំ​២០២២ បានស្នើ​ដូចនេះ​ក្នុងជំនួប​ការងារ​ជាមួយ​លោក Thit Linn Ohn ឯកអគ្គរដ្ឋទូត​វិសាមញ្ញ និង​ពេញ​សមត្ថភាព នៃ​សាធារណរដ្ឋ​សហភាព​មី​យ៉ាន់​ម៉ា​ប្រចាំ​កម្ពុជា ក្នុង​គោលដៅ​ពង្រឹង​កិច្ចសហប្រតិបត្តិការ​ពា​ណិ​ជ្ជ​កម្ម​ទ្វេភាគី​រវាង​ប្រទេស​ទាំងពីរ កាលពី​ថ្ងៃទី​១៤ ខែកក្កដា ឆ្នាំ​២០២២​នេះ នៅ​ទីស្តីការក្រសួង​។​

​ក្នុងជំនួប​នេះ​លោក​រដ្ឋមន្ត្រី​បាន​ជម្រាបជូន​អំពី​វឌ្ឍនភាព​នៃ​ការរៀបចំ​សមិទ្ធផល​សេដ្ឋកិច្ច​អាទិភាព​កម្ពុជា​ទាំង​១៩ ក្រោម​សសរស្តម្ភ​សហគមន៍​សេដ្ឋកិច្ច​អាស៊ាន និង​ស្នើឱ្យ​ប្រទេស​មី​យ៉ាន់​ម៉ា​បន្ត​ការចូលរួម​រៀបចំ និង​គាំទ្រ សំដៅ​អាច​សម្រេចបាន​ដោយ​ជោគជ័យ​ក្រោម​ភាពជា​ប្រធាន​អាស៊ាន​របស់​កម្ពុជា​។ ជាមួយគ្នានេះ លោក​ក៏បាន​ជម្រាបជូន​ភ្ញៀវ​អំពី​សក្តានុពល​ធុរកិច្ច​និង​វិនិយោគ​នៅ​កម្ពុជា​ក៏ដូចជា​យុទ្ធសាស្ត្រ​ដ៏​មុត​ស្រួច​របស់​រាជរដ្ឋាភិបាល​ក្នុងការ​ស្តារ និង​អភិវឌ្ឍ​សេដ្ឋកិច្ចកម្ពុជា ដែល​ធ្វើឱ្យ​សេដ្ឋកិច្ចកម្ពុជា​រំពឹងថា នឹងមាន​កំណើន ៦,៦​ភាគរយ សម្រាប់​ឆ្នាំ​២០២៣ និង ៧​ភាគរយ នៅ​ឆ្នាំ​បន្ទាប់​។​

​ជាការ​ឆ្លើយតប​ភាគី​មី​យ៉ាន់​ម៉ា​បានបង្ហាញ​ពី​ការប្តេជ្ញា​ពង្រឹង​និង​ពង្រីក​កិច្ចសហប្រតិបត្តិការ​ពា​ណិ​ជ្ជ​កម្ម​រវាង​ប្រទេស​ទាំងពីរ និង​ពាំ​នាំនូវ​សំណើ​របស់លោក​រដ្ឋមន្ត្រី​ទៅ​ជម្រាបជូន​ដឹកនាំ​ផងដែរ​។ បន្ថែម​ពីនេះ លោក​ក៏បាន​ស្នើសុំ​ភាគី​កម្ពុជា​ពិនិត្យ​លទ្ធភាព​ជំរុញ​កិច្ចសហប្រតិបត្តិការ​លើ​វិស័យ​សំខាន់ៗ​ដទៃទៀត រួមមាន​៖ ការចៀសវាង​ការយកពន្ធ​ត្រួតគ្នា​និង​ការជំរុញ និង​ការពារ​ការវិនិយោគ រវាង​ភាគី​ទាំងពីរ​ផងដែរ​។​

​ក្រសួងពាណិជ្ជកម្ម បាន​បញ្ជាក់ថា ក្នុង​កិច្ចប្រជុំ​នោះ ភាគី​ទាំង​ពីរបាន​ផ្លាស់ប្តូរ​យោបល់ និង​ពិភាក្សា​លើ​ការជំរុញ​ពាណិជ្ជកម្ម​ទ្វេភាគី ការលើកកម្ពស់​ការចូល​រួមសហការ​ឱ្យ​កាន់តែ​ជិតស្និទ្ធ រវាង​សភាពាណិជ្ជកម្ម និង​វិស័យ​ឯកជន​នៃ​ប្រទេស​ទាំងពីរ តាមរយៈ​ការ​ផ្គូរ​ផ្គង​ធុរកិច្ច ការផ្លាស់ប្តូរ​ទស្សនកិច្ច​រវាង​ធុរជន សកម្មភាព​ពិ​ព៍រ​ណ៌ ព្រមទាំង​ការកំណត់​ទំនិញ​សក្តានុពល រវាង​ប្រទេស​ទាំងពីរ​ក្នុងការ​ជំរុញ​ការនាំចេញ​បន្ថែមទៀត​។ ពិសេស​ជាងនេះទៅទៀត ភាគី​ទាំងពីរ​បាន​សម្តែង​នូវ​ការប្តេជ្ញាចិត្ត​បន្ត​កិច្ចសហការ​សម្របសម្រួល និង​ជំរុញ​សកម្មភាព​ធុរកិច្ច​និង​វិនិយោគ ដើម្បី​ជំរុញ​កំណើនសេដ្ឋកិច្ច និង​ពាណិជ្ជកម្ម រវាង​ប្រទេស​ទាំង​២ ឱ្យ​កាន់តែ​រីកចម្រើន​បន្ថែមទៀត​៕​សរន​