ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតី ស៊ី ជីនភីង បានធ្វើដំណើរលើកដំបូងទៅកាន់តំបន់ដាច់ស្រយាលស៊ីនជាំងរបស់ចិនចាប់តាំងពីបានបញ្ជាឱ្យមានយុទ្ធនាការប្រឆាំងភេរវកម្មកាលពីប្រាំបីឆ្នាំមុន។
ទីភ្នាក់ងារសារព័ត៌មានស៊ីនហួបានរាយការណ៍កាលពីល្ងាចថ្ងៃព្រហស្បតិ៍ ទី១៤ កក្កដាថា លោកស៊ីបានធ្វើការត្រួតពិនិត្យទីក្រុងអ៊ូរុមឈី (Urumqi) នៃតំបន់ភាគខាងលិចនេះ ជាកន្លែងដែលលោក “បានអំពាវនាវឱ្យពង្រឹងអង្គការបក្ស” និងផ្តល់សេវាកម្ម “ដើម្បីផ្តល់ផលប្រយោជន៍ដល់ប្រជាជននៃក្រុមជនជាតិទាំងអស់”។
មេដឹកនាំចិនបានចំណាយពេលកាលពីថ្ងៃអង្គារនិងថ្ងៃពុធនៅក្នុងតំបន់ ដែលលោកកោតសរសើរថាជា “មជ្ឈមណ្ឌលនៅក្នុងកិច្ចសហប្រតិបត្តិការក្រវ៉ាត់និងផ្លូវ”ដោយសំដៅទៅលើមហាគំរោងដែលគេហៅថា«គំនិតផ្តួចផ្តើមអំពីក្រវ៉ាត់និងផ្លូវ» ដែលជាកម្មវិធីហេដ្ឋារចនាសម្ព័ន្ធរបស់ទីក្រុងប៉េកាំងដើម្បីពង្រីកទំនាក់ទំនងរបស់ខ្លួននៅក្រៅប្រទេស។
លោកក៏បានចុះទៅមើលសារមន្ទីរមួយ ដែលគាត់ជំរុញឱ្យមានការអភិរក្សបេតិកភណ្ឌវប្បធម៌របស់ក្រុមជនជាតិភាគតិចឱ្យកាន់តែប្រសើរឡើងផងដែរ។
ដំណើរទស្សនកិច្ចរបស់លោកស៊ីទៅកាន់តំបន់ស៊ីនជាំងកើតឡើងតិចជាងពីរសប្តាហ៍បន្ទាប់ពីលោកបានធ្វើដំណើរទៅទីក្រុងហុងកុងដើម្បីប្រារព្ធខួបលើកទី ២៥ ឆ្នាំនៃការគ្រប់គ្រងរបស់ចិន។
ស៊ីនជាំងនិងហុងកុងធ្លាប់ជាកន្លែងដែលមានភាពរង្គោះរង្គើបំផុតរបស់ចិន ជាមួយនឹងការបង្ហាញជាទៀងទាត់នូវការប្រឆាំងបក្សកុម្មុយនីស្ត៕
លោកស៊ីចុះពិនិត្យទីក្រុងអ៊ូរុមឈីនៃតំបន់ស៊ីនជាំង